Լազարևը հայտնել է, թե ինչով է «Եվրատեսիլ»-ի նոր երգը տարբերվում նախորդից

Ռուս երգիչ Սերգեյ Լազարևը, որն այս տարի Scream երգով երկիրը կներկայացնի «Եվրատեսիլ» երգի մրցույթում, խոսելով իր ապագա ելույթի մասին, հայտարարել է, որ այս տարի չի լսի, թե ինչ են ասում մարդիկ մրցույթի մասին: Հարցազրույցի ժամանակ լրագրողը հարցրել է երգչին, թե ինչ խորհուրդ կարող էր տալ իրեն «2016թ.-ի Սերգեյը» 2019թ.-ին, որին նա պատասխանել է՝ չարժե ուշադրություն դարձնել բուքմեյքերներին: «Խորհուրդ կտայի չարձագանքել շրջապատող մարդկանց խոսքերին: Հիշում եմ՝ ինչպես էին 2016թ.-ին բոլորը մոտենում ինձ ու ասում, որ ես «100 տոկոսով» կհաղթեմ: Այդ ժամանակ հասկացա, որ պետք չէ եզրակացություններ անել, և որ կարող է ինչ ասես տեղի ունենալ, և ես ճիշտ դուրս եկա»,- ասել է Լազարևը: Նա նաև հավելել է, որ իր համար մեծ պատիվ է իր երկիրը կրկին մրցույթում ներկայացնելը և մի փոքր պատմել է նոր երգի մասին: Լազարևի խոսքով՝ նոր երգի զգայական երանգի պատճառով այն արմատապես տարբերվում է 2016-ին մրցույթին ներկայացված երգից: Հիշեցնենք, որ Scream երգը գրվել է երգիչ Ֆիլիպ Կիրկորովի կողմից՝ հույն կոմպոզիտոր Դիմիտրիս Կոնտոպուլոսի համահեղինակությամբ: Այս տարի «Եվրատեսիլ»-ն կանցկացվի մայիսի 14-18-ը Թել Ավիվում: