Երևանում աղբահանության հետ կապված կրիտիկական վիճակ է, երկրում սանիտարահամաճարակային վիճակը պայթունավտանգ է․ փորձագետներ
Երևանում աղբահանության հետ կապված կրիտիկական վիճակ է։ Այսօր լրագրողների հետ զրույցում նման տեսակետ հայտնեց բնապահպան Սիլվա Ադամյանը։ Նրա խոսքով՝ սրանից վատ վիճակ ինքը չի պատկերացնում։
«Մենք հիմա մի շարք են սկսել, որը կոչվում է «կարգին աղբ»։ «Սիվիլվոյս» հասարակական կազմակերպության կամավորները մեկնում են մայրաքաղաքի տարբեր մասեր ու ֆիքսում են աղբի հետ կապված իրավիճակը։ Սա միայն քննադատության համար չէ, այլև արվում է, որ խնդիրը բարձրաձայնվի, ու քաղաքային իշխանությունն իմանա, թե որտեղ ինչ պետք է արվի, սակայն սայլը տեղից չի շարժվում։ Ուզում եմ, որ հասկանան, որ իրենց հարաբերությունները «Սանիտեկի» հետ քաղաքացիներին բացարձակ հետաքրքիր չէ, թե ով է ում դատի տալիս, մեզ հետաքրքիր չէ: Եթե քաղաքապետը եկել է ու փորձում է խնդիրը լուծել, ապա ամեն միջոցով պետք է խնդիրը լուծվի»,- ընդգծեց Սիլվա Ադամյանը։
ՍԱՊԾ նախկին պետ Գրիգոր Գրիգորյանն էլ, համաձայնելով գործընկերոջ հետ, հավելեց, որ վատ աղբահանությունը կարող է լուրջ խնդիրներ առաջացնել։
«Վատ աղբահանությունը խոլերայի ու մի շարք այլ հիվանդությունների բուն է։ Առ այսօր մի հայտարարություն չկա լիազոր մարմնի կողմից, իսկ Հիվանդությունների կանխարգելման ազգային կենտրոնն ասում է՝ թող տեսչական մարմինը զբաղվի։ Տեսչական մարմինը զբաղվում է իր գործառույթներով, բռնում պետին հանում են գործից, Այս պայմաններում, ո՞ր մի պետն իր գործառույթը կկատարի՝ դուրս կգա, մի խնդիր կներկայացնի, որը դուր չի գալիս կառավարությանը, եթե գիտի, որ դրա համար իրեն աշխատանքից հեռացնելու են։ Այս աղբահանության խնդիրը շատ լավ հիմնավորում է վարակիչ հիվանդություններ բռնկման համար։ Երկրում սանիտարահամաճարակային վիճակը պայթունավտանգ է»,- ընդգծեց Գրիգոր Գրիգորյանը։