«Վերադարձրեք իմ որդուն, եւ ես Ձեզ կտամ այնքան գումար, որքան որ ցանկանաք, մենակ թե իմ հերոսին, իմ միակին ինձ հետ վերադարձրեք».Անուշ Հակոբյան
Կառավարության շենքի մոտ են հավաքվել Արցախյան շարժման սկզբից մինչև օրս ծառայողական պարտականությունների կատարման ժամանակ զոհված զինծառայողների ընտանիքները։ Նրանց պահանջը Կառավարությունից մեկն է՝ ուշադրություն դարձնել նաև այն զինծառայողների ընտանիքներին, որոնք ծառայության ընթացքում զոհվել են ոչ թե հակառակորդի գնդակից, այլ ծառայողական այս կամ այն պարտքը կատարելու ժամանակ:
Ցավակցելով 2008 թվականի Մարտի 1-ի դեպքերի ժամանակ զոհվածների ընտանիքներին՝ զոհված զինծառայողների մայրերը հիշեցնում են, որ Կառավարությունը Մարտի 1-ի զոհերի ընտանիքներին 30 մլն դրամ է հատկացրել, մինչդեռ իրենք ստիպված են Կառավարությանը հիշեցնել, որ կա զոհվածների 5646 ընտանիք, որոնք ապրում են սոցիալական ծայրահեղ ծանր պայմաններում։«Ինչո՞ւ փողոցային բանավեճի, աթոռակռվի ժամանակ զոհվածների ընտանիքներին տրամադրում են 30 մլն դրամ, իսկ Արցախյան շարժման օրվանից մինչև օրս զոհվածների ընտանիքներին՝ անտեսում։
Հասկանում եմ, որ ժողովրդի աշխատող հատվածը 1000 դրամ փոխանցում է Զինծառայողների ապահովագրության հիմնադրամին, պետք է հիմնադրամի դրույթներն այնպես փոխեին, որ բոլորին գումար հատկացվեր։ Մամուլի ասուլիսին վարչապետը հայտարարեց, որ ունենք 602.000 աշխատող, եթե նրանցից յուրաքանչյուրն ամսական 1000 դրամ փոխանցում է հիմնադրամին, ապա հիմնադրամի գումարը պետք է ավելանա։ Կառավարությունից պահանջում ենք, որպեսզի հավասարության սանդղակով. զոհվածների ընտանիքներին նույնպես գումար հատկացվի։ Վարչապետն ասում է, որ փողի խնդիր չունենք, այսքան ժամանակ որևէ Կառավարություն չի հայտարարել, որ փողի խնդիր չունենք, ուստի ակնկալում ենք, որ մեր զոհվածների ընտանիքներին նույնպես կտան 30 մլն դրամ»,- ընդգծում է Մարգարիտա Խաչատրյանը։
Մայրերն ահազանգում են, որ եթե Կառավարությունն իրենց դիմումին հստակ պատասխան չտա, ապա հացադուլ և գործադուլ են սկսելու:
Ստեղծված իրավիճակի շուրջ, NewsMedia.am-ի հետ զրույցում արցունքն աչքերին հերոս Արամայիս Ոսկանյանի մայրը` տիկին Անուշը, հուզմունքը զսպելով ասաց.
-Ես համայն աշխարհին կտամ իմ ունեցած ամենավերջին շապիկը, միայն թե ինջ հետ վերադարձնեն ինձ իմ որդուն: Հարցը գումարը չէ, դրանով իրենք երբեք մեր ցավը, մեր հերոսներին հետ չենք վերադարձնի: Պարզապես ես որպես որդեկորույս մայր`բոլոր որդեկորույս մայրերի անունից միայն մի բան եմ խնդրում Կառավարությունից` հանձինս վարչապետից: Պարոն վարչապետ, Ձեր կառավարությունով բարձրացեք դիրքեր, 2 տարի ծառայեք այն նույն դիրքերում, որտեղ զոհվել են այն մայրերի որդիները, ովքեր այսօր ծնկաչոք` իմ կողմից հարգելի Մարգարիտա Խաչատրյանի գլխավորությամբ, աղերսում են, որ Դուք նրանց ընդունեք:
Գնացեք, ու երկու տարի ծառայեք, այ էդ ժամանակ ես Ձեզանից ոչինչ չեմ պահանջի: Որպես որդեկորույս մայր, միայն այդ ժամանակ հանգիստ կզգամ: Ինչի՞ ես քառասուն տարեկանում որդի ունեցա, որ էսօր կողքիս չլինի…Խնդրում եմ, հետ վերադարձրեք իմ որդուն, եւ ես Ձեզ կտամ այնքան գումար, որքան որ ցանկանաք, մենակ թե իմ հերոսին, իմ միակին ինձ հետ վերադարձրեք(արտասվում է.)…
Հիշեցենք, Արամայիս Ոսկանյանը ծնվել է 1996թվ.Գեղարքունիքի մարզի` Գավառ քաղաքում: Ընտանիքում երեք քույրերի ամենափոքր, սպասված եղբայրն էր: Դպրոց մեկ տարի շուտ է ընդունվել քանի որ փոքր տարիքից խելացի ու շատ տաղանդավոր երեխա էր :
Դպրոցում առանձնահատուկ կերպով սիրվել է, միշտ աչքի է ընկել իր խելացի ու նպատակասլաց բնավորությամբ: Ավարտելով Գավառի N9 հիմանական դպրոցը շարունակել է ավագ դպրոցում: Դպրոցն ավարտելուց հետո ընդունվել է Երևանի Ագրարային համալսարանի ֆինանսներ բաժինը:
Նա մեծ սեր ուներ համակարգիչների ծրագրերի հետ, միշտ աշխատում ու նոր գաղտնիքներ էր բացահայտում:
Արամայիսին ճանաչող մարդիկ նրան բնութագրում են որպես իրականում չափից շատ բարի, նվիրված, բարեխիղճ, ազնիվ, դաստիարակված, հասուն, լուրջ ու գիտակից մարդ:
2014թվ. ծառայության է անցել ԱՀ Մարտունիի N պաշտպանական զորամասում:
2016թվ. հունվարի 9-ին՝ ժամը 21:30-ի սահմաններում, ՊԲ արևելյան ուղղությամբ տեղակայված զորամասերից մեկի պահպանության տեղամասում, հակառակորդի կողմից արձակած կրակոցից մահացու հրազենային վիրավորում է ստացել ՊԲ զինծառայող Արամայիս Յուրիկի Ոսկանյանը։
Արամայիս Ոսկանյանը հետմահու պարգևատրվել է ՀՀ նախագահի կողմից
«Արիության համար», ԱՀ նախագահի կողմից «Մարտական ծառայություն» մեդալներով:
Ի պատասխան Հերոսի սխրանքի դպրոցներում, որտեղ սովորել է Արամայիսը դասասենյակներ ու փառքի անկյուններ են բացվել, որպեսզի նոր կրթվող ու դաստիարակվող սերունդները ճանաչեն նրան իրենց դպրոցում սովորած հերոսին։
Հավերժ փա՛ռք...
Պատրաստեց՝ՆՈՆԱ ԱԴԱՄՅԱՆԸ