ՀՀ Պաշտպանության նախկին նախարարը՝ Արցախի Հանրապետության անկախության ճանաչման մասին

Պատրաստ եմ ոչ միայն սահման մեկնել, այլեւ 18 տարեկան զինվորի հետ շարք կանգնել ՝ Զինված ուժերի առջեւ դրված խնդիր իրականացնելու համար. ՀՀ ՊՆ նախկին նախարար Սեյրան Օհանյան

Սեպտեմբերի 27-ի առավոտյան Ադրբեջանի զինված ուժերը հարձակում են սկսել Արցախի ուղղությամբ, օդային եւ հրթիռային հարվածներ են հասցվել սահմանագոտու գրեթե ողջ երկայնքով, թիրախավորվել են թիկունքում գտնվող խաղաղ բնակավայրերը, այդ թվում՝ մայրաքաղաք Ստեփանակերտը: Դժբախտաբար, արդեն իսկ կան զոհեր եւ վիրավորներ։ Արցախում եւ Հայաստանում հայտարարվել է ռազմական դրություն եւ համընդհանուր զորահավաք։
Իրավիճակով պայմանավորված Արցախի նախկին վարչապետ Անուշավան Դանիելյանը ֆեյսբուքյան իր էջում գրել է. «ՀՀ վարչապետը անհապաղ պետք է հայտարարի Արցախի Հանրապետության անկախության ճանաչման մասին։ Հապաղումը կլինի Հայաստանի Հանրապետության իշխանությունների աններելի սխալը։ Կոչ եմ անում նաև ՀՀ քաղաքական կուսակցություններին` դիմել ՀՀ վարչապետին, Արցախի անկախության ճանաչման հարցով»:
Արդյոք ԱՀ նախկին վարչապետի տեսակետը կիսում է ՀՀ ՊՆ նախկին նախարար գեներալ-գնդապետ ՍԵՅՐԱՆ ՕՀԱՆՅԱՆԸ, NEWSMEDIA.am-ը փորձել է հետաքրքրվել անձամբ գեներալից, ով նախ նկատեց.

-Կարծում եմ, որ դրա ժամանակը կգա: Իրադարձությունների զարգացման հետ մեկտեղ` Հայաստանի հանրապետության ղեկավարությունը պետք է զգա այդ ռազմաքաղաքական պահը, որից ելնելով որոշում ընդունի՝ Արցախի անկախության ճանաչման հարցի հետ կապված:

Թեեւ պայքարի հենց սկզբից էլ կարելի է ասել, որ Արցախի անկախությունը՝ ՀՀ-ն դե ֆակտո ճանաչել է, արցախի անվտանգության համար պայքարել է, եւ պատահական չէ, որ Արցախի անվտանգության երաշխավորն ենք այսօր:

-Պարոն Օհանյան, եթե հարկ լինի մեկնել սահման՝ պատրաստ ե՞ք, որպես հմուտ զինվորական կանգնել սահմանը պահող մեր զինվորների կողքին:

-Մինաշանակ, ինքս պատրաստ եմ ոչ միայն սահման մեկնել, այլեւ 18 տարեկան զինվորի հետ շարք կանգնել ՝ Զինված ուժերի առջեւ դրված խնդիրները իրականացնելու համար: Պարտավոր ենք մինչեւ վերջին շունչը մարտնչել մեր հայրենի հողի համար: Այսօր, ինչպես երբեւէ պետք է ամուր կանգնենք մեր հողի վրա, եւ մեր պարտավորությունների համաձայն կատարել պաշտպանողական խնդիրները: Ինքս էլ, արդեն ասացի. անհրաժեշտության դեպքում կանգնած եմ զինվորների, զինվորականների կողքին:

NewsMedia.am 

Լուրեր  Հայաստանից եւ աշխարհից