Սա ոչ թե Հայաստանի եւ Արցախի խնդիրն է, այլեւ ողջ քաղաքակիրթ աշխարհի. Խաչատուր Քոքոբելյան

«Ազատ դեմոկրատներ» կուսակցության նախագահ Խաչատուր Քոքոբելյանը հայտարարությամբ է հանդես եկել, որում մասնավորապես ասված է.

«Սիրելի՛ հայրենակիցնե՛ր, մեր քաջարի զինվորնե՛ր, այլևս ավելի քան ակնհայտ է, որ Արցախի եւ Ադրբեջանի սահմանի ողջ երկայնքով գործ ունենք ոչ միայն ադրբեջանական, այլեւ ադրբեջանաթրքական լայնածավալ հարձակման եւ սանձարձակ ագրեսիայի հետ: Կոչ ենք անում ԵԱՀԿ Մինսկի խմբի համանախագահող երկրներին, ՄԱԿ-ին, ՀԱՊԿ-ին, ՆԱՏՕ-ին (որի անդամն է Թուրքիան), քաղաքակիրթ ողջ աշխարհին եւ բոլոր նրանց, ում համար կարեւոր է տարածաշրջանի կայունությունը եւ խաղաղ բնակչության ապրելու իրավունքը, հերթապահ եւ անհասցե հայտարարություններից անցնել հստակ եւ կանխարգելիչ գործողությունների եւ զսպել Թուրքիայի եւ Ադրբեջանի կողմից հայ-ադրբեջանական սահմանին սանձազերծված լայնածավալ եւ նախապես պլանավորված պատերազմական գործողությունները, քանզի աներկբա է, որ այդ գործողությունները հաշված ժամերի ընթացքում կարող են վտանգել ողջ տարածաշրջանի առանց այն էլ փխրուն կայունությունը՝ այն վերածելով ռազմական գործողությունների ամենաթեժ կետի:

Սա ոչ թե Հայաստանի եւ Արցախի խնդիրն է, այլեւ ողջ քաղաքակիրթ աշխարհի, այս իրավիճակը չափազանց վտանգավոր մարտահրավեր է ողջ տարածաշրջանի եւ քաղաքակիրթ աշխարհի համար, ինչը հղի է անկանխատեսելի հետեւանքներով:

Այս վճռորոշ պահին, մենք բոլորս ունենք մեկ անուն եւ ազգանուն, չկան ջրբաժաններ, աջեր եւ ձախեր, սա պայքար է հանուն խաղաղ ապրելու եւ արարելու իրավունքի, այս պատերազմը չի կարող լինել միայն մերը, քանզի սա պատերազմ է հանուն արդարության, հանուն ապրելու իրավունքի եւ հանուն քաղաքակիրթ եւ խաղաղ գոյակցության: Այս պատերազմում ջրբաժանը մեկն է՝ քաղաքակիրթ աշխարհի եւ ագրեսորների միջեւ, եւ ողջ քաղաքակիրթ աշխարհը պարտավոր է համախմբվել սանձարձակ ագրեսորի դեմ՝ հանուն արդարության եւ հանուն քաղքակիրթ աշխարհի համընդհանուր շահերի եւ ժամ առաջ կանգնեցնելու մարդասպան պատերազմը: Փա՛ռք ու պատի՛վ հանուն խաղաղության եւ ապրելու իրավունքի համար պայքարող մեր մարտիկներին, հավերժ փա՛ռք հանուն ազատության իրենց կյանքը զոհած հերոսներին: Հաղթելու ենք»: