Տարիներ առաջ, ոստիկանական բաժանմունքում խոշտանգված Ա. Մարտիրոսյանի առողջական վիճակը վատթարացել է. այժմ նա գտնվում է Արմավիր ՔԿՀ-ում

Երեկ Արմավիր ՔԿՀ-ից  առողջական վիճակի կտրուկ վատթարացման պատճառով, դատապարտյալ Արմեն Մարտիորսյանին տեղափոխել են Վաղարշապատի հիվանդանոց: Տեղում առաջին բուժօգնություն, եւ որոշակի բուժզննում  իրականացնելուց հետո, Ա. Մարտիրոսյանին նորից տեղափոխել Արմավիր ՔԿՀ, նշելով որ նրա կյանքին վտանգ չի սպառնում:

Ահազանգից անմիջապես հետո, դատապարտյալն իհարկե տեղափոխվել է հիվանդանոց, սակայն նրա հարազատները մտահոգված են, որ Ա. Մարտիրոսյանն իրականում շատ ավելի լուրջ առողջական խնդիրներ ունի, եւ որ նրան առավել համակարգված եւ խորքային բուժզննում է հարկավոր:

Դատապարտյալի առողջական վիճակի վատթարացումից հետո, ինչպես NewsMedia.am-ի հետ զրույցում նշեց դատապարտյալի բարեկամուհի Մերի Գրիգորյանը. «Արմենի առողջական վիճակի վատթարացումից հետո, ուզում եմ նշել, որ այդ մասին տեղեկացված է ՄԻՊ գրասենյակը, «Լրագրողներ հանուն մարդու իրավունքների» ՀԿ-ն, եւ ՔԿՀ-ներում դիտորդական խմբի ներկայացուցիչը: Ի դեպ ուզում եմ Ձեզ տեղեկացնել նաեւ, որ ՄԻՊ գրասենյակից Հովհաննես Ղուկասյանը մեզ հայտնել է, որ Արմենը հիմա բուժմասում է. դեղորայքային բուժում է ստանում, եւ որ ամենակարեւորն է՝ նրա կյանքին վտանգ չի սպառնում: Շնորհակալ լինելով Արմավիր ՔԿՀ-ին,  մեր պահանջը ՀՀ իշխանություններից եւ պետությունից մեկն է. այն է, որ դատապարտյալը ունենալով լուրջ առողջական խնդիրներ՝ լինի պետական հոգածության եւ ուշադրության ներքո: Երկրորդ՝ մեր պահանջն այն է, որ ինչպես Փաշինյանն է ասում. պետության ներկայացուցիչ կոչված, եւ ոստիկան կոչվածների կողմից խոշտանգված Արմեն Մարտիրոսյանի նկատմամբ՝ գոնե մեղմացվեն սահմանափակումները:

Արմեն իր բնավորությամբ պահանջողներից, բարձրաձայնողներից չէ. բայց նրա մոտ առկա է հիպերտոնիա, եւ փաստ է , որ պարբերաբար նրա մոտ ճնշման տատանումները կարող են լուրջ բարդությունների ու խնդիրների պատճառ դառնալ»,-մեզ հետ զրույցում իր մտահգությունը հայտնեց Մ. Գրիգորյանը:

Հ.Գ

Որքան էլ որ ապրում ենք քաոսի, ամենաթողության ու անտարբերության պայմաններում, միեւնույնն է, պետություն կոչվածը պարտավոր է չմոռանալու՝ որ ՀՀ քաղաքացու իրավական, սոցիալական ապահովության թիվ մեկ երաշխավորը՝ինքն է որ կա…

Հիշեցնենք, որ 2019 թ. Նոյեմբերին 21-ին, NewsMedia.am էլ. օրաթերթը հրապարակել էր «Հայրենի ոստիկանները՝ մահակով ու հակագազով ցուցմունք են կորզում» վերտառությամբ տեսանյութ, որում երեւում էր, թե ինչպես են երեք հոգի բռնություն գործադրում քաղաքացու նկատմամբ: Տեսանյութի հիման վրա ՀՔԾ-ում հարուցվել էր քրեական գործ՝ ՀՀ ՔՕ-ի 309-րդ հոդվածի 2-րդ մասով (պաշտոնեական լիազորություններն անցնելը, որը զուգորդվել է բռնություն գործադրելով)։ Նախաքննության ընթացքում պարզվել էր, ենթադրյալ բռնության ենթարկված անձի ինքնությունը:
Հիշեցնենք, որ Մահակով և հակագազով ցուցմունք կորզելու վերաբերյալ հրապարակման կապակցությամբ հարուցված քրեական գործով մեղադրանք էր առաջադրվել Ոստիկանության Ճամբարակի բաժնի պետ Նարեկ Սարգսյանին՝ ՀՀ քրեական օրենսգրքի 309-րդ հոդվածի 2-րդ մասով՝ պաշտոնեական լիազորություններն անցնելը, որը զուգորդվել է բռնություն, զենք կամ հատուկ միջոցներ գործադրելով։

Ն. Ս.-ին մեղադրանք է առաջադրվել այն բանի համար, որ նա, 2007 թվականի փետրվարից 2010 թվականի մայիսն ընկած ժամանակահատվածում զբաղեցնելով Ոստիկանության Երևան քաղաքի վարչության Արաբկիրի բաժնի ավագ օպերլիազորի պաշտոնը, առերևույթ դիտավորությամբ կատարել է բռնություն և հատուկ միջոց գործադրելով զուգորդված այնպիսի գործողություններ, որոնք ակնհայտորեն դուրս են եկել իր լիազորությունների շրջանակից:

 NewsMedia.am

Լուրեր Հայաստանից եւ Աշխարհից