«Քոչարյանի հրապարակային ելույթներից դատելով կարելի է ասել, որ կան շատ ընդհանուր դրույթներ».Հայկ Բաբուխանյան
Երեկ «Հայելի.ամ» կայքի եթերում «Ս.Ի. ՄԻՈՒԹՅՈՒՆ» կուսակցության նախագահ եւ «Ուժեղ Հայաստանը Ռուսաստանի հետ. հանուն նոր ՄԻՈՒԹՅԱՆ» շարժման գործկոմի անդամ Հայկ Բաբուխանյանը նշեց, որ տեղեկացված չէ ՀՀ երկրորդ նախագահ Ռոբերտ Քոչարյանի ծրագրերին մոտակա ընտրություններում: News media կայքի հարցին, թե արդյոք դա նշանակում է, որ «Հանուն նոր միության» շարժումը շփումներ չունի Ռոբերտ Քոչարյանի հետ Հ. Բաբուխանյանը պատասխանեց:
- Այն պահից սկսած, երբ պարոն Քոչարյանը ենթարկվեց քաղաքական հետապնդումների Նիկոլի ապօրինի խունտայի կողմից, մեր կուսակցությունը միանշանակ պահանջեց դադարեցնել այդ ռեպրեսիաները, որակավորելով դրանք որպես քաղաքական հաշվեհարդար: Բացի այդ, մեր կուսակցությունը իր բոլոր ռեսուրսներով աջակցեց , որպեսզի Քոչարյանի հանդեպ դադարեցվեն հետապնդումները: Այս շրջանակներում, իհարկե, մենք ունեցել ենք շփումներ Քոչարյանի վստահված անձանց հետ: Եվ այսօր ուրախ ենք, որ եղավ դատարանի համապատասխան որոշումը: Ինչ վերաբերվում է մեր շարժման կամ անձամբ իմ շփումներին անմիջապես պարոն Քոչարյանի հետ, ապա դրանք այս պահի դրությամբ չկան:
Կայքի լրագրողի այն հարցին, թե արդյոք դրանք նախատեսվում են ապագայում, ՍԻՄ նախագահը պատասխանեց:
- Մեր շարժումը հայտարարել է իր ծրագիրը եւ նպատակը` սերտ ու բազմակողմանի հարաբերություններ Ռուսաստանի հետ, ընդհուպ մինչեւ միութենական պետության ձեւավորումը: Այդ գաղափարով մենք հանդես ենք գալու նաեւ ընտրություններին առաջարկելով մեր ժողովրդին նշված ճանապարհը` ապահով եւ բարեկեցիկ ապագա ստեղծելու համար: Մենք պատրաստ ենք համագործակցել բոլոր այն ուժերի հետ, ովքեր կիսում են մեզ հետ վերոհիշյալ ծրագիրը: Այս առումով պարոն Քոչարյանի հրապարակային ելույթներից դատելով կարելի է ասել, որ կան շատ ընդհանուր դրույթներ: Սակայն ինչ վերաբերում է ՀՀ երկրորդ նախագահի ծրագրի մանրամասներին, ապա մենք դրանց դեռեւս ծանոթ չենք: