Այսօր ամենաբարձր գոռացող ընդդիմախոսները Նիկոլի մարզպետներն էին ու նախարարները. Բաբուխանյան
Նախորդ շաբաթ սկսած եւ մինչեւ երեկ շարունակվող խորհրդարանական թեժ նիստերի առանցքային շեշտադրումների շուրջ «Իրավունք TV»-ին զրուցել է «Ուժեղ Հայաստան Ռուսաստանի հետ. հանուն նոր Միության» շարժման գործադիր կոմիտեի անդամ, ՍԻՄ կուսակցության նախագահ ՀԱՅԿ ԲԱԲՈՒԽԱՆՅԱՆԻ հետ:
«ՊԵՏՔ Է ՀԱՍԿԱՆԱՆՔ, ԹԵ ԻՆՉ Է ԿԱՏԱՐՎՈՒՄ ԸՆԴԴԻՄՈՒԹՅԱՆ ՄԵՋ»
- ԱԺ նիստերն այս անգամ սկսվեց նրանով, որ խորհրդարանական թիվ մեկ ընդդիմությունը փորձում էր ամեն կերպ իշխանությունից պարզել, թե, ի վերջո, ինչո՞ւ ՀԱՊԿ-ի կազմում Ղազախստան զորք ուղարկվեց Հայաստանից: Օրինակ, ԱԺ «Հայաստան» խմբակցության պատգամավոր Ագնեսա Խամոյանը հարց էր բարձրացնում. «Մենք Ղազախստանի նկատմամբ ի՞նչ պարտավորություններ ունենք, որ հայ զինվորը գնացել էր Ղազախստանի ներքաղաքական իրավիճակը հանգուցալուծելու»:
- Նախ պետք է հասկանանք, թե ինչ է կատարվում ընդդիմության մեջ, որովհետեւ տպավորությունն է, թե որեւէ գաղափարական եւ քաղաքական ընդհանրություն այդ մարդկանց մեջ չկա: Եվ երկրորդ՝ մինչեւ դառնում են պատգամավոր, մի՞թե հնարավոր չէր նախ սովորել, թե ինչ պարտականություններ ունի ՀԱՊԿ անդամ Հայաստանի զինվորը Ղազախստանում: Հիմա, որ չեն սովորել, բա ամոթ չէ՞, որ այդպիսի հարցեր են տալիս: Ստացվում է՝ խորհրդարանական ընդդիմությունը չի հասկանում, որ ՀԱՊԿ-ը Ղազախստանում կանխում էր թուրքական-թուրանական ծրագրի ծավալապաշտական ընթացքը: ՀԱՊԿ-ը եւ Ռուսաստանը, որպես ՀԱՊԿ-ի կենտրոնացնող երկիր, կանխում էին Թուրքիայի ընդլայնումը Միջին Ասիայում, որովհետեւ այդ գործընթացը Ղազախստանով չէր սահմանափակվելու, միանգամից տսարածվելու էր Ղրղզստանում եւ այլն: Իսկ այդ դեպքում՝ Հայաստանի սեպ լինելը եւ խանգարիչ լինելը թուրանական ծավալապաշտական գործընթացների համար շատ ավելի արտահայտիչ էր դառնում ու Հայաստանի հարցերը շատ արագ կլուծեին թուրքերը: Եթե այս ամենը ընդդիմությունը չի հասկանում, շատ տխուր է, իսկ եթե հասկանալով է ասում՝ էլ ավելի տխուր է ու այդ դեպքում այլ հարցեր են առաջանում, թե ընդդիմությունն ինչո՞վ է զբաղված, ի՞նչ է ուզում եւ ո՞ւմ վրա է աշխատում:
Հայ զինվորը Ղազախստանում կատարել է իր պարտականությունը ՀԱՊԿ-ի հանդեպ եւ նաեւ կանգնել է Ռուսաստանի կողքին: Հետեւապես, նույն այդ հարց տվողները ինչո՞ւ չեն հարցնում, թե ՌԴ զինվորը բա ի՞նչ է անում Արցախում, հայ-թուրքական սահմանում, Գյումրիի բազայում, Կապանի, Գորիսի ճանապարհներին:
-Նույն խմբակցության մեկ այլ պատգամավոր էլ՝ Գեղամ Նազարյանն ասում է, որ «անգամ մեկ զինվոր չպետք է ուղարկենք արտերկիր, այն էլ Ղազախստան, որտեղ ընդամենը ներկլանային հարցեր են լուծվում։ Կրկնում եմ՝ ոչ թե միջկլանային, այլ ներկլանային»: Ի՞նչ կասեք այս մասին:
- Սա նշանակում է, որ մարդիկ առնվազն չեն հասկանում աշխարհաքաղաքական գործընթացները: Այ ընկներներ, դուք, ըստ էության, ասում եք՝ թող թուրքը ծավալապաշտ իր ծրագրերը իրականացնի եւ հաջողությամբ տիրի ամբողջ Միջին Ասիային՝ Ռուսաստանին դուրս մղելով այստեղից: Սա նշանակում է հակառուսական եւ պրոթուրքական դիրքորոշում: Էլի եմ ասում՝ եթե սա հասկանալով եք ասում, ուրեմն՝ մենք ձեզ հարցեր ունենք, եթե չեք հասկանում, գոնե ցույց մի տվեք, ինչքան քիչ խոսեք այդ դեպքում՝ այնքան լավ: Ցավոք, մեր պառլամենտի ինտելեկտուալ, քաղաքագիտական աշխարհայացքային մակարդակն այսօր պլինտուսից ցածր է: Իշխանության մասին էլ չեմ ասում, ընդհանրապես թյուրիմացություն է: Նախարար է մոտենում ԱԺ ամբիոնին ու չգիտես՝ կայֆի տա՞կ է, թե ի՞նչ է՝ օրենք է ներկայացնում ու անկապ ծիծաղում է: Մի ուռեք, հետո եկեք ԱԺ ամբիոնից ելույթ ունեցեք, իսկ եթե նորմալ եք ու ձեզ այդպես եք դրսեւորում, ավելի վատ:
«ԵԹԵ ԿԱՐՈՂ Է ՆԻԿՈԼԸ ԻՐ ՆԱԽԱՐԱՐԻՆ ԻՆՉ-ՈՐ ԲԱՆ ԱՐԳԵԼԵԼ, ՈՒՐԵՄՆ՝ ԿԱՐՈՂ Է ՆԱԵՎ ԹՈՔՈՎ ՄԱՆ ՏԱԼ»
- Դուք նկարագրեցիք ՀՀ շրջակա միջավայրի նախարար Հակոբ Սիմիդյանի պահվածքը, որն արդարացել էր, թե, պարզապես, առաջին անգամ էր ելույթ ունենում ու հուզվել էր, մինչդեռ 3 տարի նույն խորհրդարանում պատգամավոր է եղել…
- Ո՞ւմ են բերել ու լցրել Ազգային ժողովում, գոնե մի քիչ իրենց հետեւեն, ամո՛թ է: Մի ուրիշ ԱԺ պատգամավոր էլ նստած «շարիկ» է խաղում նիստի ժամանակ՝ փոխանակ մի բան կարդա, որ դատարկ գլուխները մտնի: Մյուսն էլ, էլի նախարար, խոսելով երկրի տնտեսական աճի մասին՝ ասում է, թե կատակ է արել: Եթե կլոուն ես, գնա կրկեսում կլոունություն արա կամ ժամանակին եթե պիցցա էիր ուղարկում մարդկանց, էլի շարունակի հին գործդ, ի՞նչ եք ընկել ժողովրդի ջանին, այ կատակասեր անգրագետներ:
- Ընդ որում՝ պարզվեց, որ Էկոնոմիկայի նախարար Վահան Քերոբյանը բոլորովին էլ կատակ չի արել՝ ասելով, թե երկնիշ տնտեսական աճ չապահովելու դեպքում հրաժարական է տալու, պարզապես, Նիկոլ Փաշինյանն է արգելել նրան հրաժարական տալ: Սա խոսում է ստրկատիրական կարգերի հաստատմա՞ն մասին, թե՞, ուղղակի կան նախարարներ, որոնց «գերեվարել են» կառավարությունում:
- Եթե կարող է Նիկոլը իր նախարարին ինչ-որ բան արգելել, որը կապված չէ աշխատանքային գործունեության հետ, այդ դեպքում՝ կարող է թոքով ման տա իր նախարարներին: Մի քիչ արժանապատվություն է պետք ունենալ, ոչ թե էժանագին, ցածրորակ խաբեության փորձեր անել ու գեղցու շուստրիություն բանեցնել: Մեկն էլ կա, դիպլոմ է կեղծել՝ մարզպետ դառնալու համար: Այսինքն՝ մարզպետ լինելով՝ ինչքա՜ն բան է ի վիճակի կեղծել, խաբել ու թալանել, որ նույնիսկ դիպլոմ է կեղծում: Ախր ժամանակին դպրոց գնայիք, մի երկու գիրք կարդայիք, դիպլոմ էլ կունենայիք:
«ԱՅՍՕՐ ԱՄԵՆԱԲԱՐՁՐ ԳՈՌԱՑՈՂ ԸՆԴԴԻՄԱԽՈՍՆԵՐԸ ՆԻԿՈԼԻ ՄԱՐԶՊԵՏՆԵՐՆ ՈՒ ՆԱԽԱՐԱՐՆԵՐՆ ԷԻՆ»
- Կրկին վերադառնալով ՀԱՊԿ-ի վերաբերյալ «Հայաստան» խմբակցության հարցադրումներին՝ նրանք նաեւ իշխանությանն ասում են, որ եթե կարողանում էիք Ղազախստանում ՀԱՊԿ-ն արդյունավետ գործարկել, ինչո՞ւ հիմա չեք դիմում ՀԱՊԿ-ին, երբ ՀՀ սահմաններից ներս ադրբեջանցիներ կան: Կամ սահմանային լարվածության ժամանակ ինչո՞ւ ՀԱՊԿ-ին դիմեց Հայաստանը ոչ թե 2-րդ հոդվածով, որպեսզի զորք տրամադրի, այլ 4-րդով՝ զուտ խորհրդատվության համար:
- Այսօրվա ընդդիմության զգալի մասը ՀՅԴ-ն է, որը երբ Նիկոլը 2018 թվականին գալիս էր իշխանության, դուրս եկավ ՀՀԿ-ի հետ կոալիցիայից եւ աջակցեց նրան: Հիշո՞ւմ եք, որ ՀՅԴ-ն ստացավ պաշտոններ, այսօր ամենաբարձր գոռացող ընդդիմախոսները Նիկոլի մարզպետներն էին, նախարարները, վարչության պետերը եւ այլն: Մինչդեռ, ովքեր քիչ, թե շատ զբաղված էին քաղաքականությամբ, գիտեին, թե ով է Նիկոլը: Այսօր ձայնագրություն են միացնում ԱԺ նիստի ժամանակ, թե ինչպես է Նիկոլը ՀԱՊԿ-ին հայհոյում, բա էն ժամանակ այդ ձայնագրությունը չէի՞ք լսել, որ Նիկոլին էիք աջակցում, որպեսզի պաշտոնի անցնի ու սկսի ՀԱՊԿ-ը քանդել, գլխավոր քարտուղար Յուրի Խաչատուրովին էլ կալանավորել: Նիկոլն ուզում էր ցույց տար իր արեւմտյան, սորոսական տերերին, թե տեսեք ՀԱՊԿ-ը քանդում եմ: Այսօր ՆԱՏՕ-ի գլխավոր քարտուղարին, որ տեսնում են, ոտքի են կանգնում, ՀԱՊԿ-ի գլխավոր քարտուղարին դու կարո՞ղ ես կալանավորել: Ընդ որում՝ հետո էլ պարզվեց, որ Խաչատուրովը մեղավոր չէ ու ոչ մեկ էլ պատասխան չտվեց: Եվ երբ այսօր հարց տվողները հարցնում են, թե ինչու ՀԱՊԿ-ը չեկավ, սառը վերաբերվեց, պետք է նախ իրենք պատասխանեն, թե ինչու ՀՀԿ-ից անջատվեցին ու Նիկոլին բերեցին իշխանության, հետո էլ դարձան Նիկոլի թիմի կարկառուն ներկայացուցիչներ եւ սկսեցին ՀԱՊԿ-ի դեմ գործողություն անել: Ու հիմա էլ ուզում եք, որ ՀԱՊԿ-ին Նիկոլը դիմի, իրենք էլ արագ արձագանքե՞ն: Պարզ չէ՞, որ այդպես չի լինելու: Երբ բերում էիք Նիկոլին, այդ ժամանակ մտածեիք, որ կարող է լինել իրավիճակ, որ ՀԱՊԿ-ը մեզ անհրաժեշտ լինի եւ պետք է մարդ, որը ՀԱՊԿ-ի հետ ունի վստահելի հարաբերություններ, որ ՀԱՊԿ-ին չի հայհոյել, դեմ գործողություններ չի արել, եւ երբ Պուտինը գա Երեւան, ոչ թե կընդունի իր կաբինետում, այլ կգնա օդանավակայանում կդիմավորի: Այնպես որ, հարգելիներս, մինչեւ այդ հարցը տալը՝ թե ինչու Նիկոլը չի դիմում կամ ինչու ՀԱՊԿ-ը սառը վերաբերմունք ունի նիկոլական Հայաստանի հանդեպ, պետք է հիշել, թե յուրաքանչյուրն ինչով էր զբաղված 2018 թվականի ապրիլ-մայիս ամիսներին:
- Այդուհանդերձ, միտում տեսնո՞ւմ եք, թե ինչո՞ւ հնարավոր չէր ճիշտ այն մեխանիզմներով, ինչպես Ղազախստանը դիմեց ՀԱՊԿ-ին, նույն կերպ էլ Հայաստանը դիմեր եւ ստանար աջակցություն:
- Իսկ ինչպե՞ս կարող է Նիկոլը դիմել ՀԱՊԿ-ին եւ ստանալ լուրջ վերաբերմունք: Ամբողջ պատերազմի ընթացքում գոռում էինք, պահանջում, ամեն ձեւ հուշում, որ դիմի Ռուսաստանին խաղաղապահներ մտցնելու համար, դիմի ՀԱՊԿ-ին՝ համապատասխան կետով արձագանքելու համար: Բայց արվում էր հակառակը՝ թաքցվում էր այն բազմաթիվ փաստերը, որ ոչ միայն Արցախում էր պատերազմական գործողություններ, այլ պատերազմի առաջին իսկ րոպեներից՝սեպտեմբերի 27-ից, հարվածներ էր հասցվել ՀՀ տարածքում գտնվող ՀՕՊ-ի օբյեկտներին: Թաքցվում էր, որպեսզի ՀԱՊԿ-ին չդիմեն: Իսկ ո՞վ էր թաքցնում, իհարկե՝ Նիկոլը: Հիմա ուզում եք, որ նա, ով իշխանության գլուխ է բերվել ՀԱՊԿ-ը քանդելու համար, դիմի ՀԱՊԿ-ի՞ն: Ոչ, Նիկոլը դրա համար չի եկել եւ դրա համար էլ չի դիմում ՀԱՊԿ-ին եւ չի էլ դիմելու կամ դիմելու է այնպես, որպեսզի ՀԱՊԿ-ը միայն խորհրդատվական աջակցություն ցուցաբերի: Մյուս կողմից էլ ՀԱՊԿ-ն իմանալով, որ Նիկոլը եկել է, որպեսզի ՀԱՊԿ-ին վարկաբեկի ու թուլացնի, Հյաստանը դուրս գա ՀԱՊԿ-ից եւ այլն, այդքանից հետո՝ ի՞նչ եք կարծում՝ սրտատրոփ սպասում է, թե ե՞րբ է Նիկոլը դիմելու, որ իրենք էլ արձագանքեն «հարազատ բարեկամին»: Հետեւաբար, երբ խորհրդարանական որոշ ընդդիմադիրներ հարցեր են հնչեցնում, նախ թող իրենք իրենց հարց տան՝ իրավունք ունե՞ն այն հնչեցնելու, թե՝ ոչ: