«Ես ամուր կգրկեի Ադամին ու կասեի.Կներե՛ս, Ադամ ջան, իմ հզոր Տղա՛, որ քո արածի մեկ տոկոսն անգամ ես չկարողացա անել քեզ համար... իսկ ամենավերջում կասեի. Մինչ հանդիպում...»

Newsmedia.am-ը  Հայոց բանակի 30-ամյա տարելիցին ընդառաջ շարունակում է ներկայացնել մեր Հերոսածին Մայրերի հետ զրույցների շարքը: Այս անգամ զրուցել ենք Ապրիլյան քառօրյա պատերազմի ամենալուսավոր Հերոսներից` Հերոս ԱԴԱՄ ՍԱՀԱԿՅԱՆԻ Հերոսածին Մայրիկի` Գայանե Անտոնյանի հետ:

-Տիկին Անտոնյան, Ինչպիսի՞ հայրենիքի մասին էր  երազում մերօրյա հաղթանակած Հերոս Ադամ Սահակյանի մայրիկը` տիկին Գայանեն:

-Որպես հաղթանակած Հերոսի մայր` երազում եմ հարատև խաղաղ ու բարեկեցիկ հայրենիքի մասին, որպեսզի մեր թոռներն ու ծոռներն ապրեն ու ծաղկեցնեն մեր հայրենիքը։

-Ինչպիսի՞ բանակ էին  թողել մեզ Ադամն ու իր անմահացած ընկերները, ու ինչպիսին է այն այսօր:

-Պատասխանեմ կարճ` Ադամը և իր զինակից ընկերները թողել էին մեզ հաղթանակած բանակ...

-Եթե  հրաշքով Ադամին մի ակնթարթով տեսնելու հնարավորություն ունենայիք, ի՞նչ կանեիք, ի՞նչ կասեիք մեր հՀերոսին, Ձեր որդուն:

-Ես ամուր կգրկեի Ադամին ու կասեի.«Կներես, Ադամ ջա՛ն, իմ հզոր Տղա՛, որ քո արածի մեկ տոկոսն անգամ ես չկարողացա անել քեզ համար... իսկ ամենավերջում կասեմ.Մինչ հանդիպում ...»: 

-Տիկին Գայանե, Դուք այն Մայրերի շարքին եք դասվում, ով ցավը արժանապատվորեն է տանում, լուռ, անտրտունջ։ Ինչն՞ է Ձեզ ուժ տվել ու տալիս այդքան մեծ, անչափելի ցավը այդքան լուռ տանելու համար։

-Դժվարունում եմ  պատասխանել, բայց երևի Ադամս` իր հերոսությունը,  իր համեստ ու համարձակ, հզոր , անսահման սիրված կերպարը..

-Եվ վերջում, որպես Հերոսի մայր, ի՞նչ պատգամ կհղեք մեր սպաներին, այսօր սահմանը պահող մեր  զինվորներին: 

-Ես մեր սպաներին և զինվորներին, որպես Հերոսի Մայր և առհասարակ որպես Մայր կցանկանայի` զգոնություն, առողջություն, հոգատարություն մեկը մյուսի հանդեպ և թող միշտ իմանան, որ մենք աղոթում ենք իրենց համար ու հպարտանում իրենցով։

NewsMedia.am 

Լուրեր  Հայաստանից եւ աշխարհից