«Կերամա Մարացի»-ի համասեփականատերը՝ օրենքով գող Սուրոյի հետ կապի, իրենց ընկերության հետ կապվող ամենատարբերի սկանդալների, ինչպես նաեւ նույն ընկերությունում մարդ խոշտանգելու մասին

«Կերամա Մարացիի» ՇՈՒՐՋ ՆՈՐ ՍԿԱՆԴԱԼ Է ՀԱՍՈՒՆԱՆՈՒՄ, ԻՍԿ ՍԵՓԱԿԱՆԱՏԵՐԸ ՄԵԶ ՈՒՂՈՐԴՈՒՄ Է ԴԵՊԻ ՔՆՆԻՉՆԵՐ

Newsmedia.am-ը առիթ ունեցել է անդրադառնալու «Կերամա Մարացիի» սեփականատերի շուրջ տարբեր ժամանակներում առկա տարբեր աղմկահարույց դրվագներին: Ինչպես օրինակ, բարձրաձայնել էինք այն մասին,որ  «Կերամա Մարացիի» խանութի պահեստում խոշտանգման է ենթարկվել քաղաքացի Ա. Գյուրջյանը, ով դիմել էր ՀՀ վարչապետ Փաշինյանին, քանի որ իրավապահները իր գործին ընթացք չէին տալիս:

Սա օրինակներից մեկն էր ընդամենը: Նախօրեին ՌՈ նախկին աշխատակից Վարդան Ղուկասյանը եւս   անդրադարձել Էր վերը նշված ընկերության սեփականատերի շուրջ առկա արատավոր երեւույթներին եւ, թե ով է նրանց, այսպես ասած  "կռիշավատ"  անում:

Մասնավորապես, ըստ Վարդան Ղուկասյանի, ընկերության  համասեփականատեր Անդրանիկ Գասպարյանը սերտ հարաբերությունների մեջ է օրենքով գող  Սուրեն Ավետիսյանի  Լենինականցի Սուրոյի հետ եւ, որ հենց գողական աշխարհն է նպաստում վերջիններս անխափան ու անվարան գործունեությանը՝ հատկապես մարդկանց  հետ ամենատարբեր բնույթի հարցեր լուծելու ճանապարհին: 

Newsmedia.am.-ը հավատարիմ մնալով իր որդեգրած գործելաոճին` այն է ցանկացած խնդիր ներկայացնել օբյեկտիվորեն՝լսելով բոլոր կողմերի տեսակետն ու դիտարկումները  դիմեց  անձամբ «Կերամա Մարացիի» սեփականատեր Անդրանիկ Գասպարյանին, ով դեռ հարցը մինչեւ վերջ չլսած արձագանքեց.

-Չգիտեմ ինչի համար եք զանգել, բայց ինչ ասում են էդպես չի: 

-Բայց ախր սպասեք հարցը ավարտենք:

-Ես գիտեմ մի սուտ պետք է լինի:

-Սուտ է՞, որ Ձեր ընկերությունում մարդ են խոշտանգել, կա հարուցված քր. գործ:

-Դե դիմեք քննիչներին, ես ասելիք չունեմ: Ես տնօրենը չեմ:

-Բայց սեփականատերն եք:

-Հետո ինչ:

-Ձեզ չի հետաքրքրում, թե ի՞նչ է կատարվում Ձեր ընկերությունում:

-Ինձ քիչ է հետաքրքրում այդ ամենը, ով ինչ ուզում է,թող ասի:

-Իսկ, ինչպե՞ս է ստացվում, որ ամենատարբեր դրվագներով,  մարդիկ  բարձրաձայնում են  ամենատարբեր  տարաբնույթ  արատավոր երեւույթների մասին, որոնք  անուղղակիժորեն կապվում են  Ձեր, եւ Ձեր ղեկավարած ընկերության հետ: Ի՞նչ կասեք սրա վերաբերյալ: 

-Ես ինչ անեմ, թող խոսեն:

-Պարզաբանեք, ոչինչ մի արեք:

-Գնացեք իրավապահներից հարցրեք, թողեք ապրեմ:

-Ապրեք, բայց մեր աշխատանքն էլ մի խոչընդոտեք:

-Դուք մեկա գրելու եք էն ինչ ուզեք:

-Եթե նման կերպ վարվեինք,  Ձեզ չէինք զանգահարի, մենք կողմ ենք օբյեկտիվ լրատվությանը որքան էլ այն Ձեզ զարմանալի թվա:

-Դե ես ասեցի գնացեք իրավապահներից հարցրեք:

-Շատ լավ, իսկ ի՞նչ կասեք այն լուրերի վերաբերյալ, որ Դուք բավականին ջերմ հարաբերություների մեջ եք գողականների հետ, մասնավորապես  օրենքով  գող լենինականցի Սուրոյի հետ:

-Սխալ բաներ եք գրում ազիզ ջան, էլ մի զանգեք ինձ էդ հարցերով:

Պատրաստեց՝ՆՈՆԱ ԱԴԱՄՅԱՆԸ 

NewsMedia.am

Լուրեր  Հայաստանից եւ Աշխարհից