«Այս կոնվեցիան հանցագործություն է աճող սերնդի դեմ».Մանուշակ Ստեփանյան

Հայտնի է, որ Հայաստանի խորհրդարանի կողմից վավերացված «Սեռական շահագործումից եւ սեռական բնույթի բռնություններից երեխաների պաշտպանության մասին» Եվրոպայի խորհրդի կոնվենցիան («Լանսարոտեի կոնվենցիա») միանշանակ չի ընդունվել հանրության կողմից` հաշվի առնելով կոնվեցիայում տեղ գտած բազում վտանգավոր դրույթները: Եվ պատահական չէ, որ շատ իրավաբաններ, բժիշկներ, մանկավարժներ, հոգևորականներ, պարզապես ծնողներ ահազանգում են, որ Լանսարոտեի կոնվենցիայի վավերացումը՝ հատկապես իր մի քանի դրույթներով հանդերձ, հակառակ էֆեկտն է ունենալու , և ավելի խոցելի է դարձնելու մեր երեխաներին։ Բանն այն է, որ կոնվենցիայի միջոցով առաջին անգամ Հայաստանի իրավական համակարգ է ներդրվելու «սեռական կողմնորոշում» հասկացությունը՝ որպես խտրականության արգելքի կարգավիճակ:

Նկատենք, որ բուռն քննադատությունների տեղիք է տվել հատկապես կոնվենցիայի 6-րդ հոդվածը՝ համաձայն որի, «յուրաքանչյուր կողմ պետք է ձեռնարկի անհրաժեշտ օրենսդրական կամ այլ միջոցներ՝ ապահովելու համար, որ երեխաները տարրական և միջնակարգ կրթության ընթացքում, ստանան սեռական շահագործման ու սեռական բնույթի բռնությունների հետ կապված վտանգների, ինչպես նաև ինքնապաշտպանության միջոցների մասին տեղեկություններ»։ Շատ մանկավարժներ և ծնողներ, լուրջ մտահոգություններ ունեն, որ նման կրթական ծրագրերի ներդրումը՝ երեխայի մոտ անառողջ հետաքրքրություններ կարող է առաջացնել:

Վերը նշված խնդրահարույց կետերի, եւ դրանց հնարավոր ռիսկերի շուրջ , NEWSMEDIA.am-ը զրուցել է «Արշակ Դաբաղյանի անվան Մայր Մանե» ՍՀԿ հիմնադիր, մանկավարժ Մանուշակ Ստեփանյանի հետ, ով անդրադառնալով կոնվեցիային նախ նկատեց.

-Այս կոնվեցիան հանցագործություն է՝ աճող սերնդի դեմ: Գիտեք, որ տիկին Բախշյանը ստորագրահավաք է կազմակերպել՝ ընդդեմ կոնվեցիայի, եւ այնտեղ ես նկատեցի մի այսպիսի մեկնաբանություն: Մեկը գրել էր, որ այդ կոնվեցիան ընդունվել է նախկինների կողմից, եւ որ այս նոր իշխանությունը ընդամենը վավերացրել է այն: Ես այսպես եմ մտածում. ի՞նչ ասել է՝ նախկին իշխանություն: Եթե մենք հեղափոխություն ենք իրականացրել, ուրեմն դա նշանակում էր, որ մենք դեմ ենք եղել նախկին իշխանությունների կայացրած որոշումներին, եւ նրանց կողմից իրականացված գործընթացներին: Եթե այսօր ոչ թե իշխանափոխություն է, այլ հեղափոխություն` մենք պետք է պետք է հեղափոխենք եւ վերացնենք նախկինների կայացրած աննորակ որոշումները, պայմանավորվածություններ, փոխադարձ համաձայնությունները: Գիտեք, օտարամոլ շատ լավ բաներ էլ կան, որ մենք կարող ենք վերցնել… Բայց թողե՛ք. մենք մեր ունեցած արժեքները պահպանենք, հետո նոր ուրիշ գեղեցիկ հավելումներ մտցնենք:

Տպավորություն է, որ մենք ուզում ենք պղծել երեխաների մանկական հոգին

Անդրադառնալով կոնվեցիայի դրույթներին, մեր զրուցակիցը ընդգծեց.

-Այս կոնվեցիայում տեղ գտած դրույթներն ուսումնասիրելիս տպավորություն է, որ մենք ուզում ենք պղծել երեխաների մանկական հոգին: Տպավորություն է, որ արվում է ամեն բան, որպեսզի սերունդները լցվեն ագրեսիայով: Արվում է ամեն բան, որպեսզի խեղաթյուրվի մեր մանուկների ապագան: Մենք չպետք է խառնվենք երեխաների բնականոն աճի ընթացքին: Իսկ սեռական դաստիարակություն դասավանդելը տարրական դասարանների երեխաների համար` լի է վտանգներով: Այսօր դասավանդող ուսուցիչները՝ ի վիճակի են շատ նրբանկատորեն անդրադառնալ երեխաներին հուզող ցանկացած հարցի: Բա դասղեկի գործը. ինչո՞ւմն է կայանում: 

Ինչ վերաբերում է «սեռական կողմնորոշում» տերմինին, ապա տիկին Ստեփանյանի խոսքերով.

-Կողմնորոշումը ո՞րն է. ծնվելիս՝ մենք արդեն կողմնորոշված ծնվում ենք: Տղան՝ տղա է, աղջիկը` աղջիկ: Երրորդ սեռ գոյություն չունի. ինչումն է հարցը: Կամ, որ խոսում են կանանց իրավունքների մասին… Ես կարող եմ ասել, որ կանանց իրավունքներն այսօր շատ ավելի լայն են, քան երբեւէ: Միշտ էլ կնոջ խոսքը անցնող է եղել, թե՛ ընտանիքում, թե՛ առհասարակ: Նույնիսկ ամենաուժեղ զորավարն էլ՝ կնոջ խոսքի հետ հաշվի է նստել. գուցե դա արտահայտված չի եղել, բայց այդպես է եղել:
Նորից եմ կրկնում, երեխայի մանկությունից շատ բան է կախված: Չի՛ կարելի, երեխայի մանկությունը խեղաթյուրել: Պատահական չէ, որ բռնարար, հանցագործ դառնում են այն երեխաները, որոնց ընտանիքներում ա՛յ այդ սեռական փոխհարաբերությունները բաց են լինում: Չի՛ կարելի երեխային ստիպել՝ ժամանակից շուտ մեծանալ, դա մեծ սթրես է նրանց համար: Երեխան պետք է դաստիարակվի բարի հեքիաթներով: Ուզում են երեխաներին դաստիարակեն` թող մանկական համերգեներ, ներկայացումներ կազմակերպեն, թող երեխաներին ներգրավվեն մանկական ծրագրերում. թող նման բաների մասին մտածեն:

Դրական ենթատեքստ ունեցող արարքը՝ միշտ շատ բաց է, եւ տեսանելի

Ամփոփելով մեր զրույցը մանկավարժը փաստեց.

-Եթե մի բան գաղտնի է արվում, ուրեմն նա լավը լինել չի կարող: Ցանկացած մարդ՝ եթե մի արարք գաղտնի է անում, ուրեմն նա բացասական ենթատեքստ ունի, որովհետեւ դրական ենթատեքստ ունեցող արարքը՝ միշտ շատ բաց եւ տեսանելի է արվում: Իսկ այս կոնվեցիան վավերացվեց՝ շատ հապճեպ, ու շատ գաղտնի:Մտածել է պետք:

NewsMedia.am

Լուրեր Հայաստանից եւ աշխարհից