Ի՞նչ եմ անում մեդալները, եթե չեմ տեսնի որդուս գալը.Ապրիլյան պատերազմում զոհված Կարենի մայրը դեռ սպասում է որդուն (ֆոտո) news.am

2016թ-ի ապրիլյան պատերազմի օրերին բազում հայորդիների հետ  իր կյանքը զոհեց Նաեւ Կոտայքի մարզի Բջնի գյուղից 19-ամյա Կարեն Ներսիսյանը:

Կարենը ծնվել եւ մեծացել էր Բջնի գյուղում, հաճախել տեղի միջնակարգ դպրոցը, որն ավարտելուց հետո ընդունվել է Երեւանի Ճարտարագիտական համալսարանի էլեկտրատեխնկական բաժնի առաջին կուրս, սակայն նույն տարվա ամռանը 18 տարին լրանալուն պես մեկնել ծառայության: Այս մասին NEWS.am-ի հետ զրույցում պատմեց Կարենի հորեղբոր աղջիկը` Լուսինե Ներսիսյանը:

«Կարենը երբեք չի խուսափել ծառայությունից, նա մեծ ոգեւորությամբ է մեկնել բանակ: Կարենը ծառայության էր անցել Արցախի Ջաբրաիլի զորամասում: Մի քանի ամիս ծառայելուց հետո Հադրութում անցել է սերժանտական կուրսեր եւ սերժանտ դարձած հետ եկել իր զորամաս:

Ինը ամսվա ծառայող էր, երբ սկսվեց ապրիլյան պատերազմը: Ապրիլի 1-ին դիրք էր բարձրացել: Վերջին անգամ այդ օրն է խոսել հոր ու մոր հետ, ասել, որ ամեն ինչ նորմալ է: Էլ նրա հետ չենք խոսել: Հաջորդ առավոտյան է, հավանաբար, դեպքը տեղի ունեցել: Մենք մինչեւ ապրիլի 4-ը տեղեկություն չունեինք: Ճիշտ է, մեզ զինկոմիսարիատից ասեցին, որ հարձակվել են ու Կարենը զոհվել է, բայց մենք չէինք հավատում:

Ապրիլի 4-ին հորեղբայրն ու հայրս գնացին զորամաս: Իրենց հրամանատարներն ասացին, որ դիրքին չեն կարողանում մոտենալ, բայց զոհերը շատ են: Կարենը Ադամ Սահակյանի մոտ ընկերն էր, միասին սովորում էին, միասին էլ մեկնել էին ծառայության. Ադամը դիրքի ավագ էր, Կարենը` նրա օգնականը: Հրամանատարները մեզ ասել էին, որ Ադամին հաջողվել էր կապ հաստատել հրամանատարների հետ: Նա ասել էր, որ բոլորը զոհվել են, ինքն է մնացել: Հետո ինքն էլ զոհվեց: Ամբողջ ջոկը` 8 հոգի զոհվել են: Մենք էլի չէինք հավատում: Ապրիլի 8-ին իր ծննդյան օրն էր: Կարենի մայրն անհամբեր սպասում էր, որ տղան պիտի զանգի: Վերջնականապես ամսի 10-ին, երբ անունները պաշտոնապես հաղորդվեց, նոր իմացանք: Հիմա նրա եւ մահվան տարելիցի, եւ ծննդյան օրն ենք հիշատակում»,- պատմեց Լուսինեն:

Մանրամասն ` news.am