Փաշինյանը պարտավոր է մաքուր էջից սկսել բանակցությունները. իր ձախողումները, կամ իր կողմից ընդունված որոշումները՝ չբարդելով նախորդների վրա

Ապրիլի 21-ին, ՌԴ արտաքին գործերի նախարար Սերգեյ Լավրովը հայտարարել էր, որ ակտիվ քննարկվում են նախորդ տարի Մոսկվայում՝ Հայաստանի, Ադրբեջանի, Ռուսաստանի արտաքին գերատեսչությունների ղեկավարների հանդիպմանը ներկայացրած առաջարկությունները: Իսկ դրանք ենթադրում են փուլային կարգավորում:
Վերոնշյալ հայտարարությունը մեծ արձագանք գտավ ինչպես հայկական երկու պետություններում, այնպես էլ միջագային հարթակներում: Զարմանալիորեն, սակայն,վերը նշված հայտարարությանը չարձագանքեց ՀՀ ղեկավար Նիկոլ Փաշինյանը:
Ինչեւէ, փաստ է, որ Արցախի բանակցային գործընթացի մասին ՌԴ արտգործնախարար Սերգեյ Լավրովի հայտարարությունն աննախադեպ էր թե՛ դիվանագիտական, թե՛ քաղաքական առումով: Եւ թե ինչո՞վ է պայմանավորված ՀՀ վարչապետի լռությունը այս համատեքստում, NewsMedia.am-ը այս եւ այլ հարցերի շուրջ, փորձեց զրուցել հայտնի քաղաքագետ, վերլուծաբան ԳԱԳԻԿ ՀԱՄԲԱՐՅԱՆԻ հետ, ով նախ նկատեց.

-Պարոն Փաշինյանը, ով պատեհ-անպատեհ առիթով լայվ է մտնում, զարմանալիորեն լռեց այն ժամանակ՝ երբ հասարակությունը սպասում էր վարչապետի արձագանքին: Փոխարենը մենք ականատես եղանք, որ պարոն Փաշինյանը նման կարեւորագույն հայտարարությանը՝ արձագանքում է իր հայտնի ֆեյքերով: Ավելին, այդ ֆեյքերի միջոցով, ամենավերջին լուտանքներն ու վիրավորանքները ուղղվեցին՝ ՌԴ արտգործնախարարի հասցեին: Ամենամեղմը, որը ես կարդացել եմ՝ դա Փաշինյանի բառապաշարին բնորոշ վիրավորանքներից էր. «Լավրովը ում շունն է՞, ո՞ր…»: Չնայած որ, ՌԴ-ում շատ քիչ են ուշադրություն դարձնում հայաստանյան, այսպես ասած ֆեյք հասարակության կարծիքին, քանի որ արհամարած ունեն, եւ շատ լավ գիտեն՝ թե ով է կանգնած այդ ամենի հետեւում:
Լավրովի հայտարարությանը արձագանքեցին միայն ԱԳՆ նախարարն ու իր խոսնակը՝ այդպես էլ հստակ չպատասխանելով այն հարցերին, որոնք հետաքրքրում են հայ հասարակությանը:
Այն դեպքում, երբ Լավրովը հայտարարում է, որ բանակցությունները ընթանում են համապատասխան փաստաթղթի շուրջ: Մինչդեռ մեզ մոտ բառախաղ է գնում, եւ այդ բառախաղի մեջ ներգրավված պաշտոնյանները՝ այդ թվում եւ ԱԳՆ նախարարը հայտարարում են, որ քննարկումներ չկան. ընդամենը հանդիպում է: Եթե պարոն Մնացականյանի համար դրանք ընդամենը հանդիպումներ են, ապա հայ հասարակությանը հետաքրքրում է, թե օրինակ ինքը՝ հունվարի 29-30-ին  տասնմեկ ժամ իր նշած հանդիման ժամանակ, Ադրբեջանի ԱԳՆ նախարարի հետ ի՞նչ էր խոսում, կամ քննարկում:
Պետք է նշեմ, որ ինձ համար ուղղակի անընդունելի է, երբ այսպիսի կարեւորագույն հարցին անդրադառնալիս՝ ինչպիսին  Արցախյան հարցն է, գործող իշխանությունները կրկին անցնում են դեմագոգիայի եւ կեղծ օրակարգի ձւավորմանը՝ փորձելով կրկին անդրադառնալ նախորդ իշխանություններին: Այն դեպքում, երբ բոլորս շատ լավ գիտենք, որ ՀՀ գործող իշխանությունները՝ Փաշինյանի գլխավորությամբ իրավասու են, եւ պարտավոր են բանակցությունները սկսել մաքուր էջից: Ոչ ոք նրանց չի պարտադրել՝ նախորդների օրոք տեղի ունեցած բանակցությունների շարունակությունը, իրենք իրենց վրա վերցնեն: Պարոն Փաշինյանը, որպես նոր ղեկավար իրավասու է, եւ պարտավոր է մաքուր էջից սկսել բանակցությունները՝ չփորձելով իր ձախողումները, կամ իր կողմից ընդունված որոշումները, բարդել նախորդների վրա: Հայ ժողովուրդը՝դա նրան երբեւէ չի ների:

-Պարոն Համբարյան, իսկ ինչպե՞ս կմեկնաբանեք Դուք՝ Լավրովի հայտարարությունը, եւ այնտեղ տեղ գտած մտքերը:

-Ինձ, որպես ՀՀ քաղաքացի, հետաքրքրում է հետեւյալ հարցը. եթե պարոն Մնացականյանը ադրբեջանական կողմի հետ հանդիպումները, (որտեղ ներգրավված են նաեւ Մինսկի խմբի համանախագահները) համարում է ընդամենը հանդիպումներ, ապա ինձ հետաքրքրում է. այդ հանդիպումների ժամանակ հնչող կարծիքների մեջ՝ արդյո՞ք քննարկվում է արցախյան հիմնահարցի փուլային տարբերակը: Եթե դա այդպես է՝ ուրեմն դա հակահայկական, հակապետական քայլ է: Արցախյան հիմնահարցի լուծումը մեկն է. դու՝ ինձ, ես՝ քեզ, եւ վերջ: Բոլոր մնացած տարբերակները՝ անընդունելի են հայկական կողմի համար:
Հայաստանի եւ ոչ մի իշխանավոր՝ այդ թվում իր լեգիտիմության մասին շատ մեծ կարծիք ունեցող Նիկոլ Փաշինյանը, իրավասու չէ առանց հայության կարծիքը հաշվի առնելու՝ գնալ ինչ-որ քայլերի: Իսկ Լավրովին ֆեյքերի միջոցով լուտանքներ հասցնելու փոխարեն՝ լավ կլինի պարոն Փաշինյանը մտնի հերթական ուղիղ եթերը, եւ բացատրի, թե ՌԴ արտգործնախարար Լավրովը. ի՞նչ նկատի ուներ՝ իր պարզաբանումների մեջ:

-Պարոն Համբարյան, ամփոփելով զրույցը կցանկանայինք անդրադառնալ նաեւ ՀՀ-ում տեղի ունեցող ներքաղաքական գործընթանցներին:Ըստ Ձեզ, ի՞նչ է կատարվում այսօր հայաստանյան ներքաղաքական կյանքում:

-Պարոն Փաշինյանը եւ իր թիմը,  ջանք ու եռանդ չեն խնայում, որպեսզի հասարակության ուշադրությունը շեղեն բարդագույն խնդիրներից, որոնք ծառացել են եւ ապագայում էլ ծառանալու են հասարակության առաջ:

Դա սոցիալ-տնտեսական վիճակի վատթարացումն է: Կորոնավիրուսի տարածման առաջին իսկ օրերից, երբ ՀՀ-ում արտակարգ դրություն  հայտարարվեց, պարոն Փաշինյանը կրկին խրոխտ հայտարարություններ արեց, որ մենք ունենալու ենք տնտեսական աճ, եւ այլն: Բայց երեկ՝ կառավարության նիստում պարզ դարձավ, որ բյուջեն վերանայվում է, իսկ նախնական տվյալներով՝ տնտեսական հետընթացը կազմելու է երեք տոկոս:
Իհարկե ,  ես շատ ուրախ կլինեմ, որ իրականում դա  երեք տոկոս լինի, որովհետեւ ըստ իս, այդ թիվը  ֆանտաստիկայի ժանրից է: Ես համարում եմ, որ տնտեսությունը ավելի մեծ անկումներ է ունենալու:

Քաղաքական առումով պետք է նշեմ, որ իրավիճակը կրկին լարված է, եւ այդ լարվածությունը եւս կապված է գործող իշխանությունների քայլերի հետ: Լինի դա նույն Ռոբերտ Քոչարյանին կալանքի տակ պահելը, որը թունավորում է ոչ միայն երկրի ներքաղաքական իրավիճակը, այլ նաեւ հայ-ռուսական հարաբերությունները: Անկախ նրանից՝ ուզում են իշխանությունները, եւ նրանց երկրպագուները ընդունել դա որպես իրողություն,  թե ոչ: Փաստը՝ մնում է փաստ:

Վերջացրած հետհեղափոխական շրջանի քայլերի իրականացմամբ, որի միջոցով իշխանությունները կրկին փորձում են հասարակության ուշադրությունը շեղել կարեւորագույն խնդիրներից:
Թեեւ հասարակությանը՝ այդ քալերը գրեթե այլեւս չեն հետաքրքրում:

ՆՈՆԱ ԱԴԱՄՅԱՆ 

NewsMedia.am 

Լուրեր  Հայաստանից եւ աշխարհից