«Լրագրողներս ամեն օր հայտնվում ենք. հիվանդ, անդաստիարակ մարդկանց հայհոյանքների, ու վիրավորանքների թիրախում». ԹԱԳՈՒՀԻ ԱՍԼԱՆՅԱՆՆ ԸՆԴԴԵՄ ՍՏՅՈՊԱ ՍԱՖԱՐՅԱՆԻ ՆԻՍՏԸ՝ ՇԱՐՈՒՆԱԿՎՈՒՄ Է…

Երևան քաղաքի ընդհանուր իրավասության դատարանում (Արաբկիր նստավայր) շարունակվում է լրագրող Թագուհի Ասլանյանի կողմից ներկայացված հայցի քննությունը` ընդդեմ ՀՀ հանրային խորհրդի նախագահ Ստյոպա Սաֆարյանի` վիրավորանք հասցնելու համար հրապարակային ներողություն խնդրելու պահանջի մասով: Այսօր պետք է տեղի ունենար հերթական դատական նիստը, սակայն, ինչպես տեղեկացրեց մեր գործընկերը, այն հետաձգվել Է:
Իսկ դատական նիստի հետաձգման պատճառների, արդարադատություն իրականացնող մարմնի կողմից սպասվող ակնկալիքների շուրջ, Newsmedia.am-ը զրուցեց ԹԱԳՈՒՀԻ ԱՍԼԱՆՅԱՆԻ հետ:

-Թագուհի, հերթական դատական նիստն այսօր հետաձգվեց՝ ինչո՞ւ: Հետաքրքիր է նաեւ իմանալ, թե ի՞նչ ակնկալիքներ ունեք ՝ դատական գործի վերջնարդյունքի հետ կապված:

-Այսօր՝ մայիսի 27-ին, ժամը 14:00-ին Երևան քաղաքի ընդհանուր իրավասության դատարանում (Արաբկիր նստավայր) նախատեսված էր իմ կողմից ՀՀ հանրային խորհրդի նախագահ Ստյոպա Սաֆարյանի դեմ ներկայացված հայցի քննության շարունակությունը` վիրավորանք հասցնելու համար հրապարակային ներողություն խնդրելու պահանջի մասին: Սա երկրորդ նիստն է, որը մեկ անգամ արդեն հետաձգվել էր՝ նոր կորոնավիրուսի դեմ պայքարի համար հայտարարված համավարակի և արտակարգ դրության պատճառով: Բայց այսօր էլ ընդամենը մեկ ժամ առաջ, Սաֆարյանը միջնորդություն էր ներկայացրել դատարան՝ նիստը հետաձգելու համար՝ պատճառաբանելով, թե դատարանում իր շահերը ներկայացնող փաստաբանը հիվանդ է. ուստի պատճառը հարգելի է: Չնայած որևէ ապացույց և հիմք չէր ներկայացվել՝ հիվանդության հավաստիության մասին:

Դատարանում, իմ ներկահացուցիչ փաստաբան Լուսինե Վիրաբյանն այն հիմքով, որ հիվանդությունը հավաստող որևէ փաստաթուղթ չէր կցվել միջնորդությանը, դատավորին խնդրեց այնուամենայնիվ դատական նիստը շարունակել, քանի որ (նախորդ անգամ էլ հետաձգելով) դատական գործընթացը պարբերաբար ձգձգվում է: Այնուհանդերձ, գործը քննող դատավոր Զարուհի Նախշքարյանը բավարարեց միջնորդությունը՝ նկատի ունենալով կորոնավիրուսով պայմանավորված վիճակը հանրապետությունում, և դատարան ներկայացնողների առողջության ապահովումը, ինչպես նաև հաշվի առնելով, որ պատասխանողն առաջին անգամ է, որ չի նեկայանում դատական նիստին: Հաջորդ նիստը նշանակվել է հուլիսի 2-ին:

Ինչ վերաբերում է սպասելիքներին, ապա ես նախ եւ առաջ վստահում եմ իմ փաստաբանի պրոֆեսիոնալիզմին և սրտացավությանը՝ արդարությունը վերականգնելու հարցում: Քանի որ Ստյոպա Սաֆարյանի կողմից՝ իմ անձին վիրավորանք հասցնելու հանգամանքը վրդովվեցրել էր փաստաբան, փաստաբանների պալատի անդամ Լուսինե Վիրաբյանին, ով անձամբ ինձ հետ կապ հաստատեց , եւ պատրաստակամություն հայտնեց՝ անշահախնդրորեն իմ շահերը ներկայացնել դատարանում: Նրա շնորհիվ է, որ դատական գործընթաց է սկսվել, ինչի համար ես երախտապարտ եմ իմ փաստաբանին:

Վստահում եմ նաև գործը քննող դատավոր տիկին Նախշքարյանին, դատական համակարգի հետ երբևէ առնչված ծանոթներից, տարբեր փաստաբաններից՝ նրա անաչառության, անկողմնակալության, և անկաշառության մասին միայն դրական գնահատականներ եմ լսել, և հույս ունեմ, որ արդարադատություն կլինի:

Այս գործն ինձ համար կարևոր է այն առումով, որ կարող է շատ լավ նախադեպ դառնալ՝ ատելության խոսքը, վիրավորանք հացնելը, հայհոյախոսությունը պատժելու և դրանով իսկ կանխարգելման գործիք դառնալու առումով: Յուրաքանչյուր մեկը, ով չի կարողանում մանկուց հոգում կուտակված իր ցավերն ու բարդույթները զսպել, ով փորձում է այլոց նսեմացնելու, դիտավորյալ վիրավորելու, անամոթ հայհոյանքներ հասցնելու միջոցով ինքնահաստատվել, ով զազրախոսություններից, հայհոյելուց գերագույն հաճույք է ստանում, կվախենա իր ներսում եղած մաղձը հանրայնացնել: Եւ քանի որ դաստիարակությունն ու պատասխանատվության զգացումը նրանց համար զսպող գործոններ չեն, ուստի դատական գործընթացն ու մեծ փոխհատուցումը՝ գոնե այսուհետ զսպող գործիքի դերում կլինեն:

Իսկ մենք՝ լրագրողներս, կապ չունի որ դաշտոմ ենք աշխատում. ամեն օր հայտնվում ենք հիվանդ, անդաստիարակ մարդկանց թիրախում, նրանց հայհոյանքների, վիրավորանքների թիրախում: Ես չեմ խոսում կեղծ օգտատերերի մասին, որոնց ևս պատժելու գործիքակազմ է պետք ստեղծել:

Գիտեք, այս դատական գործընթացի մեջ ներգրավվելու իմ նպատակը ավելի ընդհանրական է, քան անձնական՝ նման երևույթների դեմ պայքարը, նման երևույթներին մեր հասարակությունից արմատախիլ անելը: Ստյոպա Սաֆարյանի օրինակով՝ յուրքանաչյուրը պետք է իմանա, որ իր համար անմեղ թվացող վիրավորնանքը, ինչպես որ նախորդ դատական նիստի ժամանակ փորձում էին ներկայացնել Սաֆարյանն ու իր փաստաբանը, անպատիժ չեն մնալու, և որ ինքը չի կարողանալու ազատորեն ինքնահաստատվել՝ հայհոյախոսություններով զրպարտություններով, մարդկանց սևացնելու, վարկաբեկելու ու մոլորեցնելու ճանապարհով:

Եւ որ չի կարողանալու իր բարոյազրկությամբ հանրությանը, եւ մյուսներին ևս՝ ներքաշելու իր կեղտոտ խաղերի մեջ: Շատ կարևոր է նաև, որ նման մարդկանց թիրախում հայտնված մարդիկ՝ կլինեն կանայք, տղամարդիկ, երեխաներ, հանրային, ոչ հանրային դեմքեր, հավատան, որ դատարան դիմելու դեպքում կարող են վերականգնել իրենց վիրավորված արժանապատվությունը, եւ փրկել իրենց վարկաբեկված անունը: Եվ այս առումով նաև, կարևորում եմ փաստաբանական ծառայությունների մատչելիությունն այն մարդկանց համար, ովքեր այդքան վճարունակ չեն, որպեսզի իրենց համար որակյալ պաշտպանություն ապահովեն:
Ցավոք, Ստյոպա Սաֆարյանի օրինակով պետք է արձանագրեմ, որ այսօրվա իշխանությունները, որ միայն տրամադրված ու պատրաստակամ չեն պայքարելու, գործիքակազմ ստեղծելու՝ ատելության, հայհոյախոսության դեմ, այլև հայհոյողներին, հատկապես կանանց կեղտոտ բառապաշարով վիրավորողներին՝ խրախուսում ու ոգևորում են՝ պաշտոններ տալով: Մասնավորապես՝ Սաֆարյանը ՀԽ նախագահ նշանակվեց այն ժամանակ, երբ իր դեմ վիրավորանքի և զրպարտության հիմքով դատարակում երկու հայց կար ներկայացված, եւ վարույթ ընդունված:

-Թագուհի, հնարավոր համարում ե՞ք, որ ի վերջո Ստյոպա Սաֆարյանը կզղջա իր արտահայտությունների համար, եւ ներողություն խնդրի:

-Ստյոպա Սաֆարյանը այսքան ժամանակ երբևէ չի եղել, որ զղջա տարբեր հայտնի և անհայտ կանանց վիրավորելու համար: Ավելին, դատական առաջին նիստի ժամանակ, նա խոստովանեց. որ եթե երկրորդ անգամ առիթ լիներ, նա նույն ձևով կանվանարկեր ինձ և նույն արտահայտությունները կկրկներ, որոնց համար նա այսօր հայտնվել է դատարանում: Այնպես որ, ես դեռ անգամ կասկածում եմ, որ դատարանի որոշումից հետո անգամ, նա որոշումը կկատարի: Իսկ մենք արդեն արատավոր և շատ վտանգավոր նախադեպ ունենք, երբ պաշտոնյան հրապարակավ հայտարարում է, որ չի պարտաստվում կատարել դատարանի իրավական ուժի մեջ մտած որոշումը, և ներողություն խնդրել:

Պատկերացնում ե՞ք. պաշտոնյան խրախուսում է, որպեսզի ՀՀ բոլոր քաղաքացիները հրաժարվեն կատարել դատարանների իրավական ուժի մեջ մտած որոշումներն ու վճիռները: Եվ որևէ մեկը, ՀՀ իշխանություններից չի հակադարձում. ուրեմն մենք ի՞նչ ակնկալիք կարող ենք ունենալ: Ստացվում է, որ իշխանությունները խոսում են դատարանների կոռումպացված լինելու մասին, մինչդեռ իրենք են ամենաթողություն քարոզում: Եվ այսպես մենք գնում ենք իրավական պետություն կառուցելու ճանապարհո՞վ, հարց է… Բայց չշտապենք. ես միայն փաստեր ներկայացրեցի, իսկ դատական գործընթացը նոր է սկսվել, հետևենք զարգացումներին:Շնորհակալ եմ նաև Ձեր լրատվամիջոցին, այս թեման ուշադրության կենտրոնում պահելու համար: