NASA-ն կյանքի քիմիական նշանների առկայություն է ենթադրում 17 էկզոմոլորակների վրա
ԱՄՆ-ի Օդագնացության և տիեզերական տարածության հետազոտությունների ազգային վարչությունը (NASA) նոր վերլուծության մեջ ցույց է տվել, որ հայտնաբերված 17 էկզոմոլորակները կարող են ունենալ ստորգետնյա օվկիանոսներ՝ թաղված սառույցի հաստ շերտերի տակ: Այսպիսով, այս աշխարհները, ինչպես Յուպիտերի սառցե արբանյակները, կարող են խոստումնալից վայրեր լինել կենսավկայությունների՝ կյանքի քիմիական նշանների որոնման համար:
Հետազոտության արդյունքները հրապարակվել են Astrophysical Journal-ում։
Թեև այս աշխարհների ճշգրիտ կազմը մնում է անհասկանալի, սակայն նախորդ ուսումնասիրությունների արդյունքում դրանց մակերևույթի ջերմաստիճանի գնահատականները ցույց են տալիս, որ դրանք զգալիորեն ավելի սառն են, քան Երկիրը: Բացի այդ, նրանցից յուրաքանչյուրը ավելի պակաս խիտ է, քան Երկիրը, չնայած չափերով նման են:
«Մեր վերլուծությունները կանխատեսում են, որ այս 17 աշխարհները կարող են ունենալ սառույցով ծածկված մակերևույթ, սակայն կարող են բավարար ներքին տաքություն ստանալ ռադիոակտիվ տարրերի քայքայման և իրենց տեր--աստղերից հորդացող ուժերի շնորհիվ, որպեսզի պահպանեն ներքին օվկիանոսները»,- ասվում է ՆԱՍԱ-ի Գոդարդի անվան Տիեզերական թռիչքների կենտրոնի փորձագետ Լին Քուիքի հայտարարության մեջ:
Այլ կերպ ասած, այն դեպքում, երբ դրանց տեր-աստղերը չեն կարողանում բավարար տաք պայմաններ ապահովել դրանց մակերևույթին ջուրը հեղուկ վիճակում պահելու համար, այս մոլորակներում, ենթադրաբար գործընթացներ են տեղի ունենում, որոնք կարողանում են տաքություն գեներացնել իրենց մակերևույթի տակ։