Հրանուշ Հակոբյանը մասնակցել է Բեռլինի հայ համայնքի 90-ամյակի հանդիսավոր արարողությանը

ՀՀ սփյուռքի նախարար Հրանուշ Հակոբյանը մասնակցել է Բեռլինի հայ համայնքի 90-ամյակի հանդիսավոր արարողությանը, որին մասնակցում էին նաև Շարլոտենբուրգ-Վիլմերսդորֆի քաղաքապետ Ռեյնհարդ Նաումանը, Գերմանիայի Դաշնային Հանրապետությունում ՀՀ դեսպանության ներկայացուցիչներ, հյուրեր, այս մասին տեղեկացնում է նախարարության մամուլի ծառայությունը: Բացման խոսքով հանդես է եկել Բեռլինի հայ համայնքի ղեկավար Վարդգես Ալյանաքը: Ողջունելով արարողության մասնակիցներին՝ ՀՀ սփյուռքի նախարար Հրանուշ Հակոբյանը շնորհավորել է համայնքի ստեղծման 90 ամյա հոբելյանը: Նա բարձր գնահատեց համայնքի կերտած պատմությունն ու նրա նորօրյա ջանքերը, հայապահպանությանն ուղղված աշխատանքի, նվիրումի և ազգասիրության համար: «Ձեր ջանքերի շնորհիվ է, որ գործում են մեկօրյա դպրոցներ ու մշակութային տներ, եկեղեցի ու համալսարանական հայկական կենտրոններ: Ձեր ամենօրյա աշխատանքի արդյունքում է, որ փորձում եք փոքրիկներին, պատանիներին և աղջիկներին փոխանցել ձեր լեզուն, ստեղծել մշակութային խմբեր, տեղյակ պահել պատմությանը և, իհարկե, Հայրենիք այցելելով՝ երիտասարդներին ծանոթացնել իրենց պատմական Հայրենիքին»,– ասել է նա: Դասախոսությամբ հանդես է եկել Բոխումի Սփյուռքի և ցեղասպանության հարցերն ուսումնասիրող գիտահետազոտական ինստիտուտի ղեկավար Միհրան Դաբաղը: Երաժշտական կատարումներով հանդես են եկել Հրաչուհի Բասսենզը, Սիլվա Շմեդինգ-Ֆարմասյանը, Գոռ Հարությունյանը: Բեռլինում հայ համայնքը հիմնադրվել և պաշտոնապես գրանցվել է 1923թ, եղել է Գերմանիայում գոյություն ունեցող առաջին հայկական համայնքը: 2006թ համայնքը վերանվանվեց «Բեռլինի Հայ Եկեղեցական և Մշակութային համայնք» այնտեղ ապրում է շուրջ 1500 հայ : Համայնքն ունի կենտրոն, որն անդամներն անվանում են «Հայ Տուն»: Յուրաքանչուր ուրբաթ ժամը Հայ Տունը հաճելի հավաքատեղի է համայնքի անդամների և բոլոր հայերի համար: Հայ Տանը գործում է կիրակնօրյա հայկական դպրոց և պարախումբ: Վերջերս բացվել է նաև համայնքի գրադարանը, որտեղ կարելի է գտնել մանկական, ինչպես նաև հայկական գրականությանը, արվեստին, պատմությանը, լեզվին, եկեղեցուն և կրոնական թեմաներին վերաբերող գրքեր, հանրագիտարաններ : Համայնքն ունի նաև եկեղեցական երգչախումբ: