Լիպարիտ Սիմոնյան. «Կամ ինքը պետք է դատվի, կամ այլ անձանց դեմ սխալ ցուցմունք տա»

Տավուշի մարզի առաջին ատյանի դատարանի Իջեւանի նստավայրում, նոյեմբերի հոկտեմբերի 24-ին դատավոր Ռաֆիկ Մելքոնյանի նախագահությամբ շարունակվեց 2016թվականի փետրվարի 1-ից ընթացող Տավուշի մարզի Աչաջուր համայնքի 4 բնակիչների դատավարությունը:
Հիշեցնենք՝քննվում է քրեական գործըն ըստ մեղադրանքի Սաշա եւ Հովհաննես Ղալթախչյանների՝ ՀՀ քր. օրի. 131 հոդվածի 1-ին եւ 2-րդ կետերով, 235 հոդվածի 1-ին մասով, Արտակ Մանուչարյանի՝ քր. օրի 131 հոդվածի 2-րդ մասի 1-ին կետով, Գագիկ Ալավերդյանի՝ քր. օրի 131 հոդվածի 2-րդ մասի 1-ին եւ 2-րդ կետերով:Աչաջուր գյուղի վերոհիշյալ բնակիչները մեղադրվում են 2015թ. հունվարի 17-ին նույն նույն գյուղի բնակիչ Մեխակ Մելիքբեկյանին առեւանգելու մեջ: 4 ամբաստանյալները գտնվում են կալանքի տակ:
Ամբաստյալները չեն ընդունում մեղքը, հայտարարելով, որ իրականում առեւանգում չի եղել: Նիստի ընթացքում դատավոր Ռաֆիկ Մելքոնյանը, ամբաստանյալների պաշտպաններ՝ Լիպարիտ Սիմոնյանը, Ավագ Լալայանը, Մ. Մելիքբեկյանին հարցեր տվեցին դեպքի հանգամանքների մասին: Հոկտեմբերի 25-ի դատական նիստում հրապարակվեցին քրեական գործով տուժող Մ. Մելիքբեկյանի նախաքննական ցուցմունքները, որպեսզի պարզվեն նրա նախաքննական եւ դատաքննական ցուցմունքների միջեւ առկա հակասությունները:Մ. Մելիքբեկյանը նախաքննական ցուցմունքներում նշել էր , որ իրեն բռնությամբ առեւանգել են, խոստովանություններ կորզելու նպատակով, իսկ դատաքննության ընթացքում տուժող՝ Մ. Մելիքբեկյանը ասաց, որ չի հիշում նման բան եղած լինի: Պարզ ասած՝ գործով տուժողի նախաքննական, դատաքննական ցուցմունքների մեջ առկա հակասությունները պարզելիս՝ դատավոր Ռաֆիկ Մելքոնյանը փորձում էր նրա ասածների մեջ տրամաբանություն տեսնել: Տուժողը դատավորի հարցերին հաճախ պատասխանում էր՝ չեմ հիշում, հոգեճնշված վիճակում եմ եղել, այդ մասին քննիչները ինձ հարցեր չեն տվել, բավական ժամանակ է անցել, եւ այլն: Երբ հրապարակվեցին տուժողի ցուցմունքներն այն մասին, թե ինչպես է տեսել Սարիգյուղի մատուռի մոտ իրեն հանդիպած անծանոթներին, նկարագրել վերջիններիս արտաքինի վերաբերյալ խիստ մանրամասն տվյալներ, Մ. Մելիքբեկյանն ասաց, որ քննիչներն են իրեն ցույց տվել այդ մարդկանց նկարները, ինքը նկարներին նայելով, նրանց արտաքինը մանրամասն նկարագրել է:

Մ. Մելիքբեկյանը իր նախաքննական եւ դատաքննական ցուցմունքներում նշել է, որ առեւանգման ընթացքում իրեն պարտադրել են խոստովանել, թե Աչաջրի գյուղապետ Կամո Ղալթախչյանի եւ վերջինիս որդու նկատմամբ մահափորձն ինքն իրականացրել է Աչաջրի նախկին գյուղապետ Տաթեւ Գասպարյանի հրահանգով, մինչդեռ փորձագետների կողմից առանց մոնտաժված ապացույց ճանաչված տեսանյութում Մեխակ Մելիքբեկյանն ասել է, որ ինքը մահափորձ կատարելիս գործել է ինքնուրույն, վրեժ կատարելու դրդմամբ: Առկա հակասությունները մեկնաբանելու նպատակով զրուցեցինք մեղադրյալների պաշտպան Լիպարիտ Սիմոնյանի հետ, ով գործով տուժողի հակասական ցուցմունքների հետ կապված ասաց. « Տուժողը իր սկզբնական ցուցմունքը տալիս տեղյակ չի եղել, որ այդ ամենը տեսաձայնագրվել է, եւ գործի հանգամանքները ներկայացրել է իրեն ցանկալի ձեւով: Մ.Մելիքբեկյանը իր ցուցմունքներից մեկում նշում է, որ Գ.Ալավերդյանը դանակով հարվածել է դեմքին, իսկ դատաքննության ժամանակ ասաց, որ քերծել է, բացի այդ նա իր նախաքննական ցուցմունքներում նշել էր, թե վնասել են աչքը, մինչդեռ չմոնտաժված տեսաձայնագրության մեջ նկատվում է, որ վնասվածք չի երեւում: Իսկ ամենամեծ հակասությունն այն է, որ իբրեւ թե իրեն ստիպել են Տաթեւ Գասպարյանի գլխին սարքել, սակայն ձայնագրություններում պարզ երեւում է, որ նա հակաճառում է եւ փոխարենը փաստեր է բերում»: Ակնհայտ հակասությունները արդյո՞ք միտումնավոր կարող են լինել թե ոչ, վերջինս ավելացրեց .
« Ժամանակի, սպառնալիքների եւ մյուս հանգամանքների անձի հետ կապված հակասությունները հորինվածքի խնդիր է , անձը ձայնագրվել է եւ որոշակի հանգամանքներում խոստովանել է , որ ինքը կրակել է մարդկանց սպանելու նպատակով եւ տեղեկանալով, որ ձայնագրվում է, սակայն գիտակցելով իր արարքի լրջությունը իրավապահ մարմինների հետ հիշյալ ձայնագրության առումով, որոշել է կամ իրեն դրդել են այս առեւանգման հեքիաթը հորինել:Կամ ինքը պետք է դատվի կամ այլ անձանց դեմ սխալ ցուցմունք տա», -ասում է պաշտպան Լիպարիտ Սիմոնյանը:
Մեխակ Մելիքբեկյանի նախաքննական ցուցմունքների եւ առերեսումների արձանագրությունների հրապարակումները կշարունակվեն դատական հաջորդ նիստին՝ նոյեմբերի 15-ին:

Կ. Սարգսյան