Խորհրդարանի այսօրվա մեծամասնությանը պետք է լուրջ անհանգստացնի Սահմանադրության նոր տարբերակը

Այսօր խորհրդարանի մեծամասնությանը պետք է լուրջ անհագստացնի մի քանի օր առաջ ներկայացված Սահմանադրական բարեփումների նախնական տարբերակը, քանի որ նրանցից ոմանք Սահմանադրության ընդունվելուց հետո, ամենայն հավանականությամբ, չեն հայտնվելու խորհրդարանում: Սա վերաբերում է ինչպես մեծամասնականով ընտրվածներին, այնպես էլ համամասնականով: Այժմ մեծամասնականով ընտրվածները վստահ են, որ իրենք տեղ են գտնելու համամասնական ցուցակում և այնպիսի համարի ներքո, որը կապահովի մուտքն ԱԺ: Մոտավորապես հաշվարկն այնպես է տարվում, որ նոր խորհրդարանում կլինի գրեթե նույնքան պատգամավոր, որքան՝ այժմ: Սակայն դա այդպես չի լինելու:

Այսօր Հայաստանում խնդիրներն շատ են ու ահագին լուրջ: Վերջին շրջանում իրեն զգացնել է տալիս ևս մեկ լուրջ խնդիր, այս անգամ արդեն իշխանությունների համար: Խոսքն այն մասին է, որ մեր ընտրյալները չեն կարողանում լցնել բյուջեն և ամեն օր մի նոր գյուտ են անում պակասը լրացնելու համար: Հաշվի առնելով այն, որ նույնիսկ քվեաթերթիկների գումարը բարդ է գտնել՝ կարելի է ենթադրել, որ խորհրդարանական ընտրությունների երկրորդ փուլ չի լինելու և մեծամասնությունը կազմվելու հենց առաջին փուլի արդյունքում, իսկ պատգամավորների թիվը լինելու է հենց 101:

Այժմ խորհրդարանում գտնվող ուժերից առնվազն երեքը (բացի մեծամասնությունից) հայտնվելու են խորհրդարանում ցանկացած դեպքում, դրանցից ինչ-որ մեկը «փողին մունաթ», մյուսը՝ քանի որ ունի վստահություն  և այլն: Մինչ ընտրությունները կարող են ի հայտ գալ նաև մի քանի այլ ուժեր, որոնք հնարավոր է հայտնվեն խորհրդարանում:

Կա ևս մեկ խնդիր. Նոր Սահմանադրությունում շատ աբսուրդ հոդվածներ կան, հետևաբար չի բացառվում, որ մեծամասնության ղեկավարությունն ինչ-որ պահի սկսի ցույց տալ, որ պատրաստ է զիջումների գնալ պատգամավորական աթոռների տեսքով:

Այս ամենը հաշվի առնելով` կարելի է հաշվել, որ նոր խորհրդարանում վերարտադրվել  և մեծամասնություն կազմել ցանկացող այսօրվա մեծամասնությունը կունենա ոչ թե 70 պատգամավոր, այլ մինչև 55: Ստացվում է, որ ոմանք հրաժեշտ են տալու այդքան սիրելի կարմիր աթոռին: Իսկ ովքեր են լինելու հրաժեշտ տվողները: