«1000 դրամ բանակին» սոցիալական խավին ուղված, բայց պաշտպանական բնույթի քաղաքականություն է.ՀԱՍԱԿ

«1000 դրամ բանակին» սոցիալական խավին ուղված, բայց պաշտպանական բնույթի քաղաքականություն է. ՀԱՍԱԿ Fnews.am-ի զրուցակիցը Հանուն Սոցիալական արդարության կուսակցության խորհրդի անդամ Սևան Աղաջանյանն է:

-Սեւան, անցնող շաբաթ ԱԺ-ում քննարկվում էր Հայաստանի պաշտպանության ժամանակ զինծառայողների կյանքին կամ առողջությանը պատճառված վնասների հատուցման համար յուրաքանչյուր քաղաքացուց ամսական 1000 դրամ գանձելու օրինագիծը։ Այս նախաձեռնությունը բուռն հակազդեցություն է առաջացրել հասարակության շրջանում։ Ինպե՞ս կմեկնաբանեք այն:

1000 դրամ գանձելու օրինագիծը իր հետ բարձրացրեց բողոքի և տարատեսակ մեկնաբանությունների մեծ ալիք, ինչպես դուք նշեցիք: Միլիոնների հասնող և անցնող կարողություների տեր քաղաքական էլիտայի համար, այդ 1000 դրամը իրենից ոչինչ չի ներկայացնում, իսկ եթե համադրենք մեր մյուս ցավալի իրականության հետ, ըստ որի պաշտոնական վիճակագրության տվյալներով, մեր երկրի բնակչության մեկ երրորդը կամ՝ ավելի քան 900 հազար մարդ աղքատ է, իսկ ավելի քան 80 հազար մարդ՝ ծայրահեղ աղքատ է կգանք այն համոզման, որ վերջիններիս զգալի մասի համար 1000 դրամը կյանքի ու մահու պես անհրաժեշտություն է:

-Իսկ «1000 դրամ բանակին» նախաձեռնությունն արդյո՞ք կարող է համախմբման հիմք հանդիսանալ, ինչպես պնդում է իշխանությունը, թե՞ ականատես կլինենք հակառակ արդյունքին։

-Սա սոցիալական խավին ուղված, բայց պաշտպանական բնույթի քաղաքականություն է: Այո, սա ազգ-բանակ գաղափարախոսության վրա հիմնված քաղաքականություն է, բայց համախմբում արդեն կա բանակի ու զինվորի կողքին, չպետք է նոր համախմբան մասին մտածել, այն մենք տեսել ենք ապրիլյան պատերազմի օրերին:

-ՊՆ խոսնակ Արծրուն Հովհաննիսյանը հայտարարեց, որ վերանայել ու փոփոխության են ենթարկել նախագիծը: Խոսվում էր նաև դրա թափանցիկության մասին: Ձեր կարծիքով դա կարո՞ղ է վստահություն ներշնչել:

-Բողոքողներ միշտ էլ կլինեն, բայց վերանայման մասին, միայն մի հարց, կարող են հստակեցնել, որ վերոհիշյալ նախագծում` 1000 դրամ գանձումը լինի տոկոսային հարաբերակցությամբ` կապված ֆիզիկական անձի աշխատավարձի չափի հետ:

-Հնարավո՞ր է, որ այս քայլով կառավարությունը փորձում է մեղմել ժողովուրդ-իշխանություն անջրպետը և հանրության մոտ մի փոքր վստահություն առաջացնել:

-Ըստ իս, առկա է խորը անվստահություն իշխանության կողմից ստեղծված հիմնադրամների, հանձնաժողովների և նման կառույցների հանդեպ ու ընդհանրապես իշխանությունների հանդեպ: Այս նախագիծը կապված է բանակի հետ, և փաստում եմ, որ սա իրոք ազգանվեր գործ է և պետք է կանգնել այս նախագծի կողքին:

Ա. Սահակյան