12 մարդ է զոհվել «Շարլի Էբդո»-ի վրա հարձակման ժամանակ. ո՞վ է կանգնած ահաբեկչության հետևում

«Շարլի Էբդո» ֆրանսիական պարբերականի գրասենյակի վրա ահաբեկչական հարձակման արդյունքում զոհերի թիվը հասել է 12-ի, ևս չորս մարդ գտնվում է ծայրահեղ ծանր վիճակում:

Երգիծական ամսագրի խմբագրությունում հրաձգությունը, տարբեր տեղեկություններով, իրականացրել են երկու կամ երեք անհայտ անձինք, որոնց հաջողվել է փախչել:

Ականատեսների վկայությամբ՝ հարձակվողները լավ զինված են եղել, կրակել են ինքնաձիգներից և իրենց մոտ ունեցել են նռնականետ:

Ինչպես հայտնում է, «Россия 24» ալիքի թղթակիցը Փարիզից, կրակողներն ասում էին շատ լրագրողների անուն-ազգանունները: Բացի այդ, նրանք, դատելով տեղի ունեցածից, գիտեին հարձակման օրը աշխատող լրագրողների ժամանակացույցը: Հետևաբար, նրանք հրաշալի գիտեին, թե ում հետևից են եկել: Դա, ռուսաստանյան հեռուստաալիքի թղթակցի գնահատմամբ, վկայում է այն մասին, որ չարագործները մանրակրկիտ ծրագրել են իրենց հարձակումը:

Ֆրանսիայի նախագահ Ֆրանսուա Օլանդն արտակարգ խորհրդակցություն է հրավիրել միջադեպի առնչությամբ: Երկրի ղեկավարը տեղի ունեցածը որակել է որպես «բարբարոսական ահաբեկչական ակտ»:

Փարիզում արտակարգ իրավիճակ և ահաբեկչական սպառնալիքի բարձրագույն աստիճան է մտցվել:

Բոլորին հետաքրքրում է՝ ով է կատարել այդ հարձակումը: Տեղական մամուլի բոլոր հնարավոր վարկածները կապվում են ոմն մուսուլմանական ռադիկալների հետ: Նրանց հարձակումներին ամսագրի գրասենյակն արդեն ենթարկվել է: Խոսքը գրասենյակում տեղի ունեցած մի շարք հրդեհների մասին է, որոնք, ըստ նրանց եղել են իսլամիստների խղճին:

Ականատեսների վկայությամբ՝ ներկայիս հարձակվողների դեմքերը ծածկված են եղել դիմակներով, նրանք խոսել են վատ ֆրանսերենով: Որոշ վկաներ լսել են «Ալլահ աքբար» և «վրեժխնդիր լինել մարգարեի համար» կոչերը: