17-ամյա աղջիկը սիրած տղայի հետ նրա գյուղ է գնացել, բայց հոր վախից ասել է, թե իրեն առևանգել են

Շենգավիթ վարչական շրջանի ընդհանուր իրավասության դատարանում Ալեքսանդր Ազարյանի նախագահությամբ ավարտվել է 17-ամյա Աղավնի Մխոյանի (անուն-ազգանունը փոխված է) գործի դատական քննությունը:

Անչափահաս աղջիկը սովորում է մայրաքաղաքի ճարտարագիտական քոլեջում:

Նա մեղավոր է ճանաչվել ակնհայտ սուտ մատնություն կատարելու համար:

2014 թվականի փետրվարի 19-ին Աղավնին ոստիկանության Շենգավիթի բաժնում հաղորդում է տվել, թե նախորդ օրը՝ փետրվարի 18-ին, ժամը 14-ն անց 15 րոպեին ճարտարագիտական քոլեջի մոտից Շիրակի մարզի գյուղերից մեկի բնակիչ Գևորգը իր կամքին հակառակ առևանգել է իրեն:

Այսպիսով, Աղավնին Գևորգին մեղադրել է ծանր հանցագործության կատարման համար:

Սակայն անչափահաս աղջիկը երկար չի մնացել տուժողի կարգավիճակում:

Հունիսի 21-ին նա տուժողից վերածվել է մեղադրյալի: Աղավնուն մեղադրանք է առաջադրվել սուտ մատնություն կատարելու համար՝ ՀՀ քրեական օրենսգրքի 333 հոդվածի 2-րդ մասի 1-ին կետով:

Ընդհանուր իրավասության դատարանում 17-ամյա աղջիկն իրեն մեղավոր է ճանաչել ու պնդել է, որ Գևորգն իրեն չի առևանգել: 2014 թվականի փետրվարի 18-ին ինքը Գևորգի հետ նրանց գյուղ է գնացել իր կամքով: Իսկ Գևորգին սուտ մեղադրել է՝ վախենալով իր հայրիկից:

Գործով վկա Արթուրը նույնպես հաստատել է, թե իր քրոջ որդին Աղավնուն չի առևանգել: Աղջիկն իր կամքով Գևորգի հետ գյուղ է եկել: Երբ աղջկանից իմացել են, որ նրա ծնողները տեղյակ չեն նրա արարքի մասին, ինքը զանգահարել է Աղավնու մայրիկին ու տեղեկացրել է, որ Աղավնին իրենց գյուղում է:

Որոշ ժամանակ անց գյուղ է եկել Աղավնու հայրը և դստերը տարել է: Հաջորդ օրն իրենք իմացել են, որ աղջիկը, հորից վախենալով, ասել է, թե Գևորգն իրեն առևանգել է, և այդ մասին հաղորդում է տվել ոստիկանությունում:

Գևորգի ընկերը, ում մեքենայով նա Երևան էր եկել ու կանգնել ճարտարագիտական քոլեջի մոտ, հայտնել է, թե Գևորգը ճանապարհին ասել է, որ ընկերուհուն ուզում է տանել գյուղ՝ մոր հետ ծանոթացնելու:

Քոլեջի մոտ Գևորգը հանդիպել է ընկերուհուն: Նրանք մի քիչ զրուցել են, ապա նստել են մեքենա: Նրանց կամքով նրանց տարել է Գևորգի գյուղը:

1-in.am