170 հազար դոլարի դիմաց թոռը հայտնել էր, թե որտեղ է գտնվում տատի դիակը

Գործարար Սիլվա Գալստյանի սպանության գործով այսօրվա դատական նիստում վերջինիս իրավահաջորդ ու որդի Հովհաննես Մոմջյանը, ով միաժամանակ գործով ամբաստանյալի հայրն է, օգտվեց մերձավորի դեմ ցուցմունք չտալու իր սահմանադրական իրավունքից և հրաժարվեց ցուցմունք տալուց:

Դատարանում հրապարակվեցին տուժողի իրավահաջորդի նախաքննական ցուցմունքները: Առաջին ցուցմունքը տրվել էր, երբ գործարար կինն անհայտացել էր, և դիակը դեռևս չէր հայտնաբերվել: Ըստ այդ ցուցմունքի, ձեռնարկատիրությամբ զբաղվող իր մայրը թշնամիներ ու գումարային խնդիրներ չի ունեցել: Իրավահաջորդը միաժամանակ կարծիք էր հայտնել, որ իր մայրը սպանվել է և որ նրան սպանել է իր որդին՝ Ալբերտը: Նա իր ապօրինի որդին է մեկ այլ կնոջից, սակայն ինքը հոգացել է որդու ապրուստի ծախսերը:

Հայրը հայտնել էր, որ որդին վատ շրջապատ էր ընկել, դարձել խաղամոլ, մասնավորապես, բուքմեյքերական գրասենյակներում խաղադրույքներ էր անում ու մեծ գումարներ տանուլ տալիս, ինքն էլ նրա պարտքերը փակում էր: Հայրը որդուն որոշ ժամանակ անց տեղավորել է Ձորաղբյուր գյուղում՝ գործարար տատի մոտ, որպեսզի որդին կտրվի իր շրջապատից: Թոռան ու տատի փոխհարաբերություններն, իր իմանալով, եղել են շատ ջերմ:

Սպանվածի որդին նախաքննական ցուցմունքում հայտնել էր, որ տատ ու թոռ մեկնել են Ձորաղբյուրից ու ուղևորվել դեպի Երևան, հաջորդ օրն, երբ մայրն իր հարազատներին չի զանգահարել, ինչպես սովորաբար անում էր, անհանգստության տեղիք է տվել: Իրավահաջորդի քույրն ու մորաքույրը հայտնաբերել են, որ սպանվածի տնից անհայտացել է մոտ 20 հազար ԱՄՆ դոլար արժեցող ոսկյա ու ադամանդյա զարդերը, որոնք պատկանում էին տուժողին: Իրավահաջորդը նաև զարմանք էր հայտնել, թե ինչպես կարող էր որդին 85կգ կշռով կնոջ մարմինը տեղափոխել շենքի 11-րդ հարկից:

Ավելի ուշ, լրացուցիչ ցուցմունքում տուժողի իրավահաջորդը հայտնել էր, որ որդին իրեն առաջարկել է 200 հազար ԱՄՆ դոլարի դիմաց հայտնել տատի դիակի գտնվելու վայրի մասին, ի վերջո 170 հազար դոլարի դիմաց հայտնել է, թե որտեղ է գտնվում կնոջ դիակը:

Դատարանում տուժողի իրավահաջորդը պնդեց իր նախաքննական ցուցմունքները:

մանրամասները՝pastinfo.am-ում: