35-ամյա որդին ծեծել է մորը և սպառնացել, որ կսպանի

Փաստինֆոն գրում է. Երևանցի Արթուրը մեղադրվում է մորը ծեծելու և նրան սպանելու սպառնալիքներ տալու մեջ:

Ըստ մեղադրանքի՝ Արթուրն իրենց բնակարանում կենցաղային հարցերի շուրջ վիճաբանել է մոր հետ, որի ընթացքում մարմնական վնասվածքներ պատճառելու դիտավորությամբ ձեռքերով ու ոտքերով բազմաթիվ հարվածներ է հասցրել նրան:

Բացի այդ, նախաքննական մարմինը հաստատված է համարել, որ նա վերցրել է ծալովի շեղբով բացված դանակ և դիտավորությամբ ցուցադրել է մորը՝ սպառնալով, որ կսպանի վերջինիս:

Արթուրին մեղադրանք է առաջադրվել ՀՀ քրեական օրենսգրքի 117-րդ հոդվածով՝ դիտավորությամբ առողջությանը թեթև վնաս պատճառելը, և 137-րդ հոդվածի 1-ին մասով՝ սպանության, առողջությանը ծանր վնաս պատճառելու, եթե այդ սպառնալիքն իրականացնելու իրական վտանգ է եղել:

Նրա նկատմամբ որպես խափանման միջոց է ընտրվել չհեռանալու մասին ստորագրությունը: