38 համայնքներում ՏԻՄ ընտրություններ կանցկացվեն. Չարենցավանում քաղաքապետ կնտրեն

Մինչև տարեվերջ 38 համայնքներում կանցկացվեն տեղական ինքնակառավարման մարմինների ընտրություններ: Դրանցից 3-ում նախատեսված են արտահերթ, 35-ում՝ հերթական ընտրություններ:

Այսպես՝ նոյեմբերի 23-ին Կոտայքի մարզի Հանքավան գյուղական համայնքի ղեկավարի արտահերթ ընտրությանը քվեարկվելիք միակ թեկնածուն ինքաառաջադրված անկուսակցական, գյուղապետի տեղակալ Շահեն Հակոբյանն է, ով նախկին գյուղապետի եղբայրն է: Նախկին գյուղապետ Հակոբ Հակոբյանը հրաժարական է տվել՝ պայմանավորված առողջական վիճակի վատթարացմամբ և արտերկրում բուժման անհրաժեշտությամբ:

Դեկտեմբերի 7-ին Արագածոտնի մարզի Ջամշլու գյուղական համայնքի ղեկավարի արտահերթ ընտրությանը մասնակցելու համար գրանցված է երկու ինքնաառաջադրված թեկնածու՝ ՀՀԿ անդամ Միրազմ Ուռուսյանը և անկուսակցական Մերալի Սադոյանը:

Նախկին գյուղապետ Տիտալ Ալոյանն իր լիազորությունները դադարեցնելու վերաբերյալ դիմում է ներկայացրել դեռևս հուլիսի 7-ին: Այս համայնքում թեկնածուները կարող են ինքնաբացարկի իրավունքից օգտվել մինչև նոյեմբերի 27-ի ժամը 18-ը:

Դեկտեմբերի 14-ին ՏԻՄ հերթական ընտրություններ կանցկացվեն Արագածոտնի, Արարատի, Արմավիրի, Գեղարքունիքի, Լոռու, Կոտայքի, Շիրակի, Սյունիքի, Վայոց ձորի, Տավուշի մարզերի 35 համայնքներում: Դրանցից 26-ում կընտրեն համայնքի ղեկավար, իսկ 9-ում՝ ավագանու անդամներ:

Ընդ որում՝ 35 համայնքներից միակ քաղաքային համայնքը Չարենցավանն է, որտեղ նախատեսված է քաղաքապետի ընտրություն: Քաղաքապետի պաշտոնին հավակնում է երկու թեկնածու՝ գործող քաղաքապետ, ՀՀԿ-ի կողմից առաջադրված նույն կուսակցության անդամ Հակոբ Շահգալդյանը, ով Կոտայքի նախկին մարզպետ Կավալենկո Շահգալդյանի որդին է, և ինքնաառաջադրված անկուսայցական, «Կար-Կոր» ՍՊԸ հերթափոխի պետ Արտավազդ Ալեքսանյանը:

26 համայնքների ղեկավարի ընտրություններին ընդհանուր առմամբ գրանցված է 60 թեկնածու:

25 գյուղական համայնքներից միակը Վայոց ձորի Թառաթումբն է, որտեղ գործող գյուղապետը չի առաջադրվել:

Մնացած 24 համայնքներում գործող գյուղապետերը վերընտրվելու հայտ են ներկայացրել: Նրանցից 20-ը ՀՀԿ անդամներ են, 4-ը՝ անկուսակցականներ:

9 համայնքներում, որտեղ դեկտեմբերի 14-ին ավագանի են ընտրելու, ընդհանուր առմամբ գրանցված է 61 թեկնածու:

Հիշյալ 35 համայնքներում թեկնածուների ինքնաբացարկ հայտնելու վերջնաժամկետը դեկտեմբերի 4-ն է:

Ընթացիկ տարում վերջին ընտրությունը նախատեսված է դեկտեմբերի 21-ին: Այդ օրը Արմավիրի մարզի Բաղրամյան համայնքում ավագանու անդամի արտահերթ ընտրություն է: Թեկնածուների առաջադրումը կմեկնարկի նոյեմբերի 26-ին: