Ադրբեջանական գերությունից վերադարձածները առողջական խնդիրներ ունեն

Fnews.am-ի զրույցում Բերդաշեն համայնքի ղեկավար Մխիթար Սարգսյանը տեղեկացնում է, որ վերջերս Ադրբեջանից Հայաստան վերադարձված գերիներից Անդրանիկ Գրիգորյանի մասին, որևէ տեղեկություն չունեն.«Նրան չենք տեսել, գյուղ չի եկել: Նրա հայրիկից տեղեկացել եմ, որ առողջական խնդիրներ ունի, մասնավորապես իրեն շատ տարօրինակ է պահում, կարծում եմ, որ այդպես էլ պետք է լիներ, այլ կերպ հնարավոր չէր: Այնտեղ ինչքան էլ լավ պահեին, ինչքան էլ Կարմիր Խաչի կողմից  վերահսկողության տակ լիներ, միևնույն է նա հոգեպես տանջվել է, անհավասարակշիռ իրավիճակում է եղել, երևի հոգեբանական խնդիրներ ունի շուտով ամեն ինչ կկարգավորվի»,-ասաց գյուղապետը:

Հիշեցնենք, որ այս տարի մարտի 22-ին՝ ժամը 13:50-ի սահմաններում, ՊԲ արևելյան ուղղությամբ տեղակայված զորամասերից մեկի մարտական դիրքից, զենք-զինամթերքը թողնելով մարտական հենակետում, հակառակորդի կողմն էր անցել ՊԲ զինծառայող, 1991թ. ծնված շարքային-պայմանագրային Անդրանիկ Արարատի Գրիգորյանը: Սույն դեպքի առթիվ հարուցվել էր քրեական գործ: Տավուշի մարզի Վերին Կարմիր Աղբյուր գյուղի բնակիչ գերությունից վերադարձած Արսեն Խոջոյանը ևս առողջական խնդիրներ ունի: «Իմ որդուն  էլ երբ վերադարձրեցին, նա  նույնպես հոգեպաս տաննջված էր, ոչ մեկի հետ չէր խոսում ինքնամփոփ էր դարձել, այդ ամենը շատ տարօրինակ է, չգիտեմ հիմա կամաց-կամաց կազդուրվում է, արդեն աշխատանքի  է գնում, բայց ես հո նրա մայրն եմ գիտեմ, որ դեռ հոգեպես ծանր վիճակում է, իսկ փսորիազ հիվանդությունն էլ օր օրի բարդանում է»,--ասաց  տիկին Սվետլանան:

Հիշեցնենք նաեւ, որ գերությունից վերադառնալուց հետո նրա մոտ ախտորոշվել է «վուլգար փսորիազ» հիվանդությունը, որի սրացման պատճառով Արսեն Խոջոյանը պարբերաբար բուժօգնություն է ստանում Երևանում: Մեկամսյա հիվանդանոցային բուժման ընթացքում Արսենն անցել է անհրաժեշտ բուժման կուրսը: Այս պահին, ըստ բժիշկ-մասնագետի, հիվանդությունը ռեմիսիայի (հետզարգացման) փուլում է: Նշանակված համապատասխան դեղորայքի ընդունումը Արսեն Խոջոյանը կշարունակի տնային պայմաններում` միաժամանակ գտնվելով գիտաբժշկական կենտրոնի դիսպանսեր հսկողության ներքո` 15-օրյա պարբերականությամբ հետազոտություն անցնելով նույն բուժհաստատությունում: