Ադրբեջանցիների կողմից գլխատված զինվորների հարազատները դիմել են ՄԻԵԴ

Ապրիլի 2-ին սանձազերծված 4-օրյա պատերազմի հետևանքով զոհված և ադրբեջանցիների կողմից խոշտանգված զինվորների հարազատները պատրաստվում են դիմել Մարդու իրավունքների եվրոպական դատարան: Այս մասին 1in.am-ը տեղեկացել է ՀՀ պաշտպանության նախարարի ավագ օգնական Ալիկ Ավետիսյանից: Վերջինս նաև ասաց, որ ադրբեջանցիների կողմից գլխատված երեք զինծառայողների գործերով դիմումներն արդեն ուղարկվել են ՄԻԵԴ:
Արդեն հրապարակվել է, որ գլխատված են եղել 19-ամյա ժամկետային զինծառայող Քյարամ Սլոյանի, 30-ամյա մայոր Հայկ Թորոյանի և 68-ամյա վարորդ Հրանտ Ղարիբյանի մարմինները: Գլխատված զինվորներին հուղարկավորվել են այդ վիճակում, ադրբեջանցիները վերադարձրել են միայն ժամկետային զինծառայող 19-ամյա Քյարամ Սլոյանի գլուխը:
Ադրբեջանցիների կողմից խոշտանգված մյուս հայ զինծառայողների գործերով դեռ քննություն է գնում: Ինչպես հայտնի է՝ քննչական կոմիտեում այդ առթիվ քրգործ է հարուցվել: ՀՀ քննչական կոմիտեի լրատվական բաժնից ճշտեցինք, որ խոշտանգումների գործով դատաբժշկական փորձաքննությունների եզրակացությունների արդյուքները դեռ առկա չեն: Դատաբժշկական փորձաքննության արդյունքներից հետո պարզ կլինի, թե զինվորներն ու Թալիշի 3 խաղաղ բնակիչները կենդանության օրոք խոշտանգվել են, թե ոչ:
Օրերս ադրբեջանական կողմը վերադարձրեց 23-ամյա կապիտան, վաշտի հրամանատար Արգիշտի Գաբոյանի մարմինը: Քննչական կոմիտեից տեղեկացանք, որ նրա գործը միացվել է մյուս զինծառայողների սպանության առթիվ հարուցված քրգործին և այդ առթիվ ևս դատաբժշկական փորձաքննություն է իրականացվում՝ պարզելու, թե հնարավոր բռնություն կիրառվել է, թե ոչ: Գաբոյանի մարմնի վրա տեսանելի բռնության հետքեր չեն արձանագրվել:
«Գաբոյանի դեպքում գլխի, վզի ու ոտքերի հատվածում հրազենային վնասվածքներ է եղել: Դատաբժշկական փորձաքննություն է նշանակվել՝ պարզելու մահվան օրը և հնարավոր բռնությունը, արտաքին զննությամբ բռնության դեպքեր չեն հայտնաբերվել»,- մեզ հետ զրույցում ասաց ՀՀ պաշտպանության նախարարի ավագ օգնական Ալիկ Ավետիսյանը:
Նշենք, որ ԼՂՀ ռազմագերիների, պատանդների և անհայտ կորածների հարցերով զբաղվող պետական հանձնաժողովը հանդես է եկել հայտարարությամբ՝ ասելով, որ ադրբեջանական կողմից հանձնված զոհվածների բոլոր մարմինները ենթարկվել են խոշտանգման ու անարգանքի։ «Կարմիր խաչի միջազգային կոմիտեի աշխատակիցների ներկայությամբ ԼՂՀ ռազմագերիների, պատանդների և անհայտ կորածների հարցերով զբաղվող պետական հանձնաժողովի կողմից արձանագրվել է, որ ադրբեջանական կողմից հանձնված զոհվածների բոլոր մարմինները ենթարկվել են խոշտանգման ու անարգանքի»,- ասել է հանձնաժողովը՝ հավելելով. «Այս արարքը, հանդիսանալով հակահումանիզմի աղաղակող դրսևորում, հակասում է պատերազմի օրենքներին ու սովորույթներին և կոպտորեն ոտնահարում միջազգային մարդասիրական իրավունքի, մասնավորապես՝ 1949 թ. Գործող բանակներում վիրավորների և հիվանդների վիճակի բարելավման մասին Ժնևյան 1-ին կոնվենցիայի, 1949 թ․ Ռազմագերիների հետ վարվելակերպի մասին Ժնևյան 3-րդ կոնվենցիայի և 1977 թ․ Միջազգային զինված ընդհարումների զոհերի պաշտպանության մասին 1949թ. օգոստոսի 12-ի Ժնևի կոնվենցիայի 1-ին արձանագրության պահանջները»։
Ըստ այդմ՝ Ղարաբաղյան կողմը հետամուտ է լինելու, որպեսզի ադրբեջանական կողմի նման պահվածքը ենթարկվի միջազգային հանրության և մասնագիտացված կառույցների խստագույն դատապարտմանը, իսկ մեղավորները կրեն պատասխանատվություն։
Ապրիլյան քառօրյա պատերազմի հետևանքով բազմաթիվ տեղահանվածներ կան: Միայն Արցախի ներսում առկա է մոտ 1000 տեղահանված: Այս մասին մեզ հետ զրույցում ասաց «Ընդդեմ իրավական կամայականությունների» ՀԿ նախագահ Լարիսա Ալավերդյանը: Ըստ նրա՝ Արցախի ներսում տեղահանվածները հիմնականում Թալիշի ու սահմանամերձ այլ շրջանների բնակիչներ են:
Հայաստան տեղափոխված արցախցիների հարցով զբաղվում է «Առաքելություն Հայաստան» ՀԿ-ն: «Առաքելություն Հայաստան»-ը ՄԱԿ-ի հայաստանյան գրասենյակի աջակցությամբ դրամական օժանդակություն է տրամադրել Ղարաբաղից տեղահանված ու Հայաստանում հանգրվանած շուրջ 100 ընտանիքների: