Ադրբեջանի ՊՆ-ն լրտեսական ծրագիր է գնել. WikiLeaks

Ադրբեջանական պաշտպանության նախարարությունն իտալական ընկերությունից գնել է DaVinçi լրտեսական ծրագիր։ Ավելի վաղ միջազգային մամուլը հայտնել էր, որ ցանցահեններին հաջողվել է տիրել իտալական Hacking Team ընկերության ողջ տեղեկատվական բազային, որը մասնագիտացած է Իտալիայի անվտանգության մարմինների համար լրտեսական ծրագրերի պատրաստման մեջ։

WikiLeaks-ի նյութերի համաձայն՝ այդ ընկերությունն Ադրբեջանին վաճառել է հեռակառավարման լրտեսման համակարգ, այսպես կոչված՝ DaVinçi կամ Galileo։ Օրեր առաջ ցանցահենները համացանցում տեղադրեցին Hacking Team ընկերության ողջ տեղեկատվական բազան և այդպիսով հայտնի դարձավ, որ DaVinçi ծրագիրն իտալական ընկերությունից գնել է Ադրբեջանի պաշտպանության նախարարությունը՝ միջնորդավորված։ 

Լրտեսական այդ ծրագրերը կարող են պատճենել Windows, OS X կամ Linux օպերացիոն համակարգերով գործող համակարգիչներում եղած ողջ տեղեկատվությունը։Բացի դրանից՝ դրանք կարող են պատճենել Android, iOS, Blackberry ու Windows Phone հարթակներով գործող սմարթֆոնների ամբողջ տեղեկատվությունը։ Այդ ծրագիրը ձայնագրում է Skype-ով, Facebook-ում, Twitter-ում, WhatsApp-ում, Line-ով, Viber-ով բոլոր խոսակցությունները։ Ծրագիրն առանց տիրոջ իրազեկվածության միացնում է սմարթֆոնի տեսախցիկն ու բարձրախոսը, ինչպես նաև ցույց է տալիս գաջետի տիրոջ գտնվելու վայրը։ Հաղորդվում է, որ լրտեսական այդ ծրագրերի միջոցով Ադրբեջանի ՊՆ-ն կարող է իրականացնել էլեկտրոնային հետախուզություն։