ԱԺ նախագահ. Նորից մի ուրվակա՞ն է շրջում դահլիճում

ԵՏՄ-ին Հայաստանի միանալու բանակցությունների ողջ գործընթացում Լեռնային Ղարաբաղի հետ մաքսային սահմանի խնդիր երբևէ չի եղել:

Այս մասին քիչ առաջ Ազգային ժողովի նիստում` ԵՏՄ-ին Հայաստանի միանալու հարցի քննարկման ժամանակ, կրկին վստահեցրեց հարակից զեկուցող, ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը` ի պատասխան «Ժառանգություն» խմբակցության ղեկավար Ռուբիկ Հակոբյանի հարցի:

Ընդդիմադիր պատգամավորը, մասնավորապես, հետաքրքրվել էր, թե եթե վաղը ԵՏՄ կողմերից մեկը, ասենք` Ղազախստանը, բարձրացնի Հայաստանի և Արցախի միջև մաքսակետի տեղակայման հարց, ինչո՞վ մենք հակառակվենք դրան:

«Եթե մենք հիփոթեթիկ մոտենանք խնդրին և փորձենք նաև ապագայում հասկանալ մեր անելիքները, ապա պետք է ասեմ, որ այդ պահանջը տեսական դաշտում չառաջացնի նոր իրավիճակ, նոր կարգավիճակ: Բնականաբար, դա կենթադրի, որ միության անդամ երկրները փորձում են որոշակի կարգավիճակ տալ Լեռնային Ղարաբաղի Հանրապետությանը»,- նշեց Ա.Զաքարյանը:

Ի դեպ, նշենք, որ նիստի մեկնարկին «Ժառանգություն» խմբակցության անդամ Զարուհի Փոստանջյանը, ինչպես և նախօրեին, ընդդեմ ԵՏՄ-ին Հայաստանի միանալու թռուցիկներ էր բաժանում, ինչին արձագանքեց ԱԺ նախագահ Գալուստ Սահակյանը` հարց ուղղելով, թե այս ի՞նչ է` «նորից մի ուրվակա՞ն է շրջում դահլիճում»: