ԱԺ-ն ընդունեց 2016թ.-ից նոր թանկացումների հանգեցնող վիճահարույց օրինագիծը

ՀՀ կառավարության նախաձեռնությամբ հունվարի 15-ից հրավիրված Ազգային ժողովի արտահերթ նստաշրջանի աշխատանքները կշարունակվեն գալիք երկուշաբթի՝ հունվարի 22-ին՝ ժամը 11-ից: Շաբաթ և կիրակի նիստեր չեն լինի: Այս մասին այսօր՝ նիստի սկզբում, հայտարարեց ԱԺ նախագահ Գալուստ Սահակյանը:
Այս հայտարարությանը տեղերից արձագանքող պատգամավորներին ԱԺ նախագահը հարց ուղղեց, թե «ինչ է՝ ուզում եք շաբաթ, կիրակի էլ աշխատե՞ք», ապա, ի պատասխան դահլիճում շարունակվող աղմուկի, արձանագրեց. «Շատ աշխատասեր եք»:
ԱԺ նախագահը հայտնեց, որ «Ողջիի, Փխրուտի, Արծվանիկի պոչամբարներում կուտակված և կուտակվող, ինչպես նաև «Զանգեզուրի պղնձամոլիբդենային կոմբինատ» փակ բաժնետիրական ընկերության գործունեության արդյունքում գոյացած և գոյացող արտադրական լցակույտերի մշակման ներդրումային ծրագրի մասին» կառավարության հեղինակած օրինագծի՝ առաջին ընթերցմամբ քվեարկությունը պատգամավորների պահանջով հետաձգվում է մինչև հունվարի 22-ը: Նա նշեց, որ այդ ընթացքում պատգամավորների բարձրացրած հարցերը կառավարության հետ կքննարկվեն, և կարծիք հայտնեց, որ նախագիծը փոփոխությունների կենթարկվի:
Խորհրդարանն ընդունեց նախօրեին քննարկված բոլոր նախագծերը: Վիճահարույց մի շարք նախագծերին կողմ էր միայն ՀՀԿ-ն:
Վերջինների թվում էր նաև «Ակցիզային հարկի մասին» օրենքում լրացումներ և փոփոխություններ կատարելու մասին կառավարության հեղինակած օրինագիծը, որով, մասնավորապես, նախատեսվում է 2016թ.-ից բարձրացնել ալկոհոլային խմիչքների, բենզինի և դիզելային վառելիքի ու ծխախոտային արտադրանքի համար սահմանված ակցիզային հարկի դրույքաչափերը, ինչպես նաեւ ընդլայնել ենթաակցիզային ապրանքների ցանկը՝ վերջինում ամրագրելով տրանսպորտային միջոցներում որպես վառելիք օգտագործվող սեղմված բնական գազը:
Ընդդիմադիր պատգամավորներն ընդգծեցին, որ առաջարկվող փոփոխություները կհանգեցնեն գների, հատկապես՝ տրանսպարտի, բարձրացմանը և սպառողական շուկայում նոր ցնցումների առիթ կհանդիսանան:
ԱԺ նախագահն արձագանքեց, թե ինքը և քաղաքական մեծամասնությունն էլ է գտնում են, որ լրացուցիչ հիմնավորումների կարիք կա, բայցև հիշեցրեց, որ երկրորդ ընթերցմամբ նախագիծը կքննարկվի աշնանը, ուստի խորհրդարանը դեռ ժամանակ ունի քննարկելու այն: Արձագանքելով պատգամավորների՝ շտապողականություն չցուցաբերելու կոչերին, Գալուստ Սահակյանը պարզաբանեց, որ նախագիծը հիմա է ներկայացվել խորհրդարան, քանի որ այն պետք է կիրառվի 2016թ.-ից, «դրա համար պետք է օրենք լինի, որպեսզի հաշվարկվի 2016թ.-ի պետական բյուջեում»:
«Օրինաց երկիր» խմբակցության ղեկավար Հեղինե Բիշարյանը նշեց, որ ԱԺ նախագահի նախօրեի խոսքից թվաց, թե նա միանում է խորհրդարանին: «Այսօր դուք պահում եք ձեր քաղաքական գիծը, փորձում եք ձեր կառավարության ներկայացուցիչներին աջակցել քվեարկությամբ: Մենք դեմ ենք, որ այսօր առաջին ընթերցմամբ քվեարկվի այս նախագիծը: Առավել ևս քաղաքական մեծամասնության խոհեմ մտածող մեր գործընկերները նույնպես միացան՝ ասելով, որ սրա ժամանակը չէ, ուստիև մենք առաջարկում ենք 20 րոպե ընդմիջում: Բոլոր քաղաքական թիմերը թող քննարկեն, հետո նոր որոշենք՝ արդյոք պետք է այսօր քվեարկել, առավելևս այսօր դրսում կան միտինգներ՝ էլեկտրաէներգիայի հետ կապված»,-հայտարարեց Հ.Բիշարյանը:
«Գնահատում եմ՝ հերոսական առաջարկ է»,-ասաց ԱԺ նախագահը՝ հայտարարելով 20 րոպե ընդմիջում:
«Ակցիզային հարկի մասին» օրենքում լրացումներ և փոփոխություններ կատարելու մասին օրինագիծն առաջին ընթերցմամբ ընդունվեց. «կողմ» քվեարկեց միայն ՀՀԿ-ն:  

Աղբյուր` Slaq.am