Ահազանգ.Ոստիկանությունը փորձում է լռեցնել հանրային խնդիր բարձրաձայնած լրագրողին.IRAVUNK.com

 Այսօր «Իրավունք» թերթի խմբագրություն է դիմել լրագրող Գոհար Նուրիջանյանը, ով ահազանգում է, որ ներկայիս իշխանության օրոք գործում է ամենաթողություն, իսկ Ոստիկանությունը փոխանակ իրավախախտին պատասխանատվության ենթարկելու միջոցներ ձեռնարկի` բաժին է հրավիրում լրագրողին, ով փորձում է բարձրաձայնել իրեն դիմած քաղաքացիների խնդիրը տարբեր ատյաններում:

Մասնավորապես մեր զրուցակցի խոսքով.

- Երկու ամիս առաջ ինձ դիմել են Մազմանյան 22 հասցեում բնակվող մի խումբ բնակիչներ` խնդրելով, որպես լրագրող բարձրաձայնեմ, որ իրենց շենքին կից կառուցվում է ապօրինի կառույց: Տվյալ շենքի հետնամասում եղել է մանկական հրպարակ, որտեղ եղել են հաստաբուն ծառեր, որոնք հատվել են: Ասվածս ներկայացնում եմ փաստերով:

 Բնակիչները վախենում են այդ ապօրինի կառույցը կառուցել փորձող անձից, ասելով, որ իշխանությունների հովանավորչությունը վայեյլող այդ անձը հաշվեհարդար կտեսնի:

- Ո՞վ է այդ անձնավորությունը եւ ինչո՞ւ բնակիչները նման մտավախություն ունեն:

- Այդ անձը ոմն Վահե Մարտիրոսյան է, ով վայելում ներկայիս իշխանավորների բարձր հովանավորչությունը: Երկու ամսվա ընթացքում ես դիմել եմ մի քանի գերատեսչություն, բայց ապարդյուն, ոչ մի արձագանք: Ավելին, մի քանի օր առաջ կրկին բնակիչը բողոքեց` ասելով, որ պատն արդեն շարում են, չգիտենք ինչ են ուզում կառուցել:
Բայց սա դեռ ամենաթողության վերջը չէ: Դրա հաջորդ օրը նամակ եմ ստանում Ոստիկանությունից, որ ինձ հրավիրում են Ոստիկանության բաժին` ոչ ավել ոչ պակաս ցուցմունք տալու համար: Տեղեկացնելով, որ իմ ահազանգը ոչ այլ ինչ է քան զանցանք եւ, որ այդ զանցանքը պատժելի է: Այսինքն Ոստիկանությունը ուզում է ինձ` լրագրողիս լռեցնել: Անկեղծ ասած ապշեցի, հարցրեցի, թե ինչու մի բան էլ ես պետք է վարչական տույժերի ենթարկվեմ: Այդ ոստիկանը ինձ ի պատասխան ասաց, որ ես պետք է գնամ ցուցմունք տալու:

- Ինչի՞ համար ցուցմունք տաք:

-Ես չգիտեմ, ես այդ ոստիկանին ասացի, որ ես երրորդ կողմ եմ, լրագրող եմ: Ով պետության եւ քաղաքացու միջեւ միջնորդ օղակ է, ով հանրային շահի խնդիրն է բարձրաձայնում: Փաստորեն ստացվում է, որ ոստիկանությունը փոխանակ իրավախախտին հարցաքննությունների կանչի` լրագրողին է փորձում լռեցնել, ու սա այսօր Հայաստանում: Իրենք կարող են լրագրողին տույժի ենթարկել եթե իր ասածը չի համապատասխանում իրականությանը` տվյալ դեպքում ես որեւէ օրենք չեմ խախտել եւ սխալ տեղեկատվություն չեմ հայտնել պետությանը:

- Ի վերջո գնացի՞ք, թե՞ ոչ:

-Ո՛չ, բնականաբար: Ասեցի` հարգելի ոստիկան չեք ամաչում ես լրագրող եմ ու խնդիր եմ բարձրաձյում, իսկ Դուք փոխանակ գնաք ապօրինի շինություն քանդեք` գնում եք լրագրողի «պատժելու», լռեցնելու ճանապարհով:

- Ո՞վ էր այդ ոստիկանը:

- Եթե չեմ սխալվում անունը Դավիթ էր, ծրարը ինձ մոտ է` հարկ եղած դեպքում լրացուցիչ կարող եմ տրամադրել: Սա ցնցող բան է, հիմա եթե սա լիներ նախկին վարչակարգի օրոք ներկայիս իշխանավորները մեծ սկանդալ կսարքեին, բայց հիմա` Նոր Հայաստանում հետապնդել, փորձել լռեցնել լրագրողին միայն նրա համար, որ խնդիր ես բարձրաձայնել` ապշեցնող է: Ձեզ ավելին ասեմ Ոստիկանության իրար խառնվելուց հետո ես հայտնաբեեցի Ֆեյսբուք սոցիալական ցանցում մի նկար, որտեղ այդ Վահե Մարտիրոսյանը ջերմ` ուս-ուսի տված նկարված է ԱԺ նախագահ Արարատ Միրզոյանի եւ մեկ այլ ինձ անհայտ անձի հետ:

- Լավ, ի վերջո տեղյա՞կ եք ով է այդ Վահե Մարտիրոսյանը, ինչո՞վ է զբաղվում:

-Չգիտեմ ով է, բայց էն որ լկտի է` դեմքից երեւում է: Այս նկարը տեսնելուց հետո հասկացա, որ Ոստիկանությունը Վահեի համար է որոշել ինձ լռեցնել, վախեցնել տույժերով: Ես հասկացա, որ իրենք հիմա ինձ են հետապնդելու: Ավելին ասեմ, վերջերս տղաս ծեծկռտուքի մեջ էր ընկել եւ ես կասկածում եմ, որ հնարավոր է, որ իրենք լինեն: Դրան գումարած մեքենայիս թափքն էին կոտրել: Ու էս պայմաններում Ոստիկանությունը մի բան էլ ինձ է հետապնդում փոխանակ գնան այս Վահե կոչվածին պատասխանատվության ենթարկելու միջոցներ ձեռնարկեն: Ես չեմ լռելու, հիմա հայտարարում եմ:

-Այսինքն մտավախություն ունեք, որ Ձեր ընտանիքի անդամների վրա էլ ճնշումներ բանեցվում` նրա համար, որ Դուք փորձել եք հանրային խնդիր բարձրաձայնել:

-Ես ամեն ինչ մտածելու, կասկածելու իրավունք ունեմ: Դուք էլ լինեիք իմ տեղը այդպես կմտածեիք:

 IRAVUNK.com 

Զրույցը` ԻԼՈՆԱ ԱԶԱՐՅԱՆԻ