Ամերիկահայերը կարող են դատական գործերի գրոհ սկսել Թուրքիայի դեմ

Թուրքական ընդդիմադիր «Ժողովրդահանրապետական» կուսակցության անդամ, Թուրքիայի Ազգային մեծ ժողովի պատգամավոր Ֆարուք Լողօղլուն, խոսելով Հայոց ցեղասպանության մասին, նշել է, որ թեև ԱՄՆ-ի օրենսդիրների քայլերի հետևանքով հողային վերադարձը հայերին իրատեսական չէ, սակայն այլ վտանգներ Թուրքիայի համար կարող են առաջանալ։ Այս մասին գրում է թուրքական «Հաբերլեր» կայքը։

Ըստ Լողօղլուի՝ մինչ օրս ԱՄՆ Սենատը հրաժարվել է Ցեղասպանության վերաբերյալ բանաձևերից, քանի որ ԱՄՆ նախագահական ապարատն առաջ է քաշել պետության ազգային շահերը պաշտպանելու անհրաժեշտությունը։ Սակայն թուրք պատգամավորը մտահոգություն է հայտնել, որ թուրքական իշխանությունների ներքին և արտաքին քաղաքական տարբեր պատճառներով այս անգամ Թուրքիայի դաշնակիցը կարող է և հաշվի չառնել «ազգային շահը»։ Արդյունքում չի բացառվում, որ հայերը կարող են դատական հայցերով «գրոհել» ամերիկյան դատարանները՝ փոխհատուցում ստանալու և Թուրքիայի դեմ որոշում կայացնելու ակնկալիքով։

«Ճիշտ է՝ հողերի վերադարձն իրատեսական չէ, սակայն Թուրքիայի համար կարող են առաջանալ այլ վտանգներ։ Եթե ԱՄՆ-ը Ցեղասպանության հարցում որևէ հայամետ որոշում կայացնի, արդյունքը կլինի այն, որ հայերը հանդես կգան բազմաթիվ դատական հայցերով և գույքային ու հողային պահանջներ կներկայացնեն», – ասել է Լողօղլուն։

Հիշեցնենք. օրերս հայտնի դարձավ, որ Դիարբեքիրի օդանավակայանը կառուցվել է այն հողատարածքի վրա, որը նախկինում պատկանել է հայ ընտանիքի։ Այժմ ազգությամբ հայ ԱՄՆ քաղաքացի Զվարթ Սուջյանը փորձում է դատական գործընթացների միջոցով հետ ստանալ իր նախնիներին պատկանող այդ տարածքը։