Ամիրյանը կմասնակցի քարոզարշավին, թե ոչ՝ կորոշի ՀՀԿ-ն

ՀՀԿ համամասնական ցուցակի կազմում՝ 5-րդ տեղում, ընդգրկված է նաեւ մշակույթի նախարար Արմեն Ամիրյանը, ով լրագրողների հետ զրույցում անդրադառնալով տասնյակում տեղ զբաղեցնելու փաստին՝ մասնավորապես նշեց, որ որեւէ մեկը չի կարող ստիպել մարդուն անդամագրվել այս կամ այն կուսակցությանը, եւ ինքն իր կողմից որեւէ պայմաններ չի թելադրել. «Կուսակցության մեջ պայմաններ չեն առաջադրում, որովհետեւ կուսակցությունը նաեւ գաղափարախոսական ընդհանուր համաձայնություն է, եւ ընդհանուր համաձայնության մեջ առաջադրել կամ դնել պայմաններ՝ առնվազն բարոյական չէ»,-ասաց Ամիրյանն ու չհամաձայնեց, որ Հանրապետական կուսակցությունը հեղինակազրկվել է. «Ցանկացած կուսակցություն պետք է ունենա նոր շունչ, նոր արյուն ներարկելու հնարավորություն, նոր մարդիկ նոր կուսակցությունների մեջ բերում են նոր մտածողություն»։

Ամիրյանը նշեց, որ, հավանաբար, կմասնակցի քարոզարշավին, իսկ ավելի կոնկրետ՝ ինչպես որոշի կուսակցությունը։ Ընտրություններից հետո կգնա՞ խորհրդարան, թե՞ կմնա նախարարությունում, Ամիրյանը դարձյալ մատնանշեց ՀՀԿ-ին, ասելով՝ ինչպես կորոշի կուսակցությունը։ Այնուամենայնիվ, ո՞րը կլինի իր որոշումը, եթե այն կայացնի ինքը եւ ոչ թե կուսակցությունը՝ խորհրդարա՞ն, թե՞ նախարարություն։ «Ես այս պահին չեմ կարող որոշում ընդունել»,-ասաց նա ու ի պատասխան այն հարցին, թե որ աշխատանքն է իրեն ավելի հոգեհարազատ, նշեց. «Անշուշտ, հեռուստատեսությունն ու ռադիոն, սա ազնվորեն խոստովանանք էր, բայց այս պահին ինչով որ զբաղված եմ, իսկապես շատ հոգեհարազատ է, որովհետեւ մարդիկ, ում հետ աշխատում եմ, նկատի ունեմ արվեստի ներկայացուցիչներին, շատ լավ կարողանում են արձագանքել այն դրական փոփոխություններին, որ փորձում ենք նախանշել»։   

Hraparak.am