Ամուսնուս ասաց դուրս արի. թե չէ հեսա բենզինը կլցնեմ ավտոտդ էլ կվառեմ, քեզ էլ, կնկադ էլ...

«Մութ էր դրսում էդ ժամին, տեսա, որ բակի դիմաց մի տղա է կանգնած, ում մոտավորապես երկու օր առաջ տեսել էի, երբ ամուսինս մեքենայի վրա գործ էր անում, մոտեցավ ասեց ինչով կարող եմ օգնել, ամուսինս թե ոչնչով, շհնորհակալություն: Չէինք էլ ճանաչում, դեպքի օրն էլ խնդիրը ընդամենը նա էր, որ նա խմած-անջատված եկավ ամուսնուս շորերից բռնեց ու բա թե դուրս արի մեքենայից, էդ խի՞ ես ավտոն խոդ արել, կայֆավատ ես լինում: Կարեն էլ ասեց, ես խոդի եմ տվել, որ էրեխեքին հավաքեմ գնանք գյուղ: Մեկ էլ էդ խոսքի վրա, տեսա ինքը ամուսնուս քաշքշում է, էդ պահին ես առաջն ընկա: Ու տեսնելով հղի վիճակս ինքը ինձ գլխիս տվեց ու հրեց գցեց գետնին: Տեսնելով էդ սկեսուրս մեքենայից իջավ, եկավ, որ առանձնացնի, բայց էդեղ էլ իրեն չկորցրեց սկեսուրիս հարվածեց` գլխին մեծ այտուց ունի մինչ օրս: Ես ընկածս տեղից վեր կաց ա, նորից խառնվեցի, որ հանդարտեցն եմ, բայց իրեն հանգստացնել չէր լինում, ընենց այլանդակ հայհոյանքներ էր տալիս, որ էլ չասելու: Ամուսինս նորից նստեց մեքենան, ասեց եկեք գնանք, բանի տեղ մի դրեք: Էս էլ նորից ամուսնուս թե դուրս արի մեքենայից` թե չէ հեսա բենզինը կլցնեմ ավտոտդ էլ վառեմ, քեզ էլ վառեմ, կնկադ էլ: Մի խոսքով խմած-անջատված մարդ, էլ միջամտեցի ասեցի` հանգիստ թող գնա, երբ լրջանաս այդ ժամանակ կգաս կխոսաս: Ինքն էլ, բա ես հիմա պետք է խոսեմ, ու նորից ինձ հրեց գցեց գետնին ու բռունցքով տվեց փորիս, ամուսինս վրա հասավ, ինքը ամուսնուս գցեց գետնին: Ես էլ տեսնելով, որ հնարավոր է ամուսնուս լուրջ վնաս հասցնի չգիտեմ ինչ ընկավ ձեռքս գլխին տվեցի, որ օյաղանա: Հետո իրեն սթափեցնելու համար ասեցինք, եթե ըստեղից չգնաս կզանգենք համապատասխան տեղեր ու քո հարցերը կլուծեն: Դրանից հետո նոր ինքը գնաց:Էդ հարբածի պատճառով էսօր ես վիժման վտանգի տակ եմ կանգնած»,- անդրադառնալով օրերս Լոռու մարզի Օձուն գյուղում հարեւանների միջեւ տեղի ունեցած վեճի մանրամասներին,Fnews.am-ի հետ զրույցում  ասաց վեճին միջամտած հղի կինը`Սուսաննան:

Հիշեցնենք, որ ավելի վաղ հայտնել էինք, որ նոյեմբերի 17-ին, ժամը 23.35-ին, հիվանդանոցից ոստիկանության Թումանյանի բաժնում հաղորդում է ստացվել, որ իրենց է դիմել 36-ամյա Սուսաննա Ի.-ն, ով հայտնել է, որ ժամը 20.35-ի սահմաններում տան աստիճաններից ընկել եւ հիվանդանոց է դիմել, քանի որ գտնվում է հղիության վիճակում:Նյութերի նախապատրաստման ընթացքում պարզվել է, որ նոյեմբերի 17-ին, ժամը 20.00-ի սահմաններում, Օձուն գյուղում 38-ամյա Տիգրան Դ.-ն վիճաբանել է 33-ամյա Կարեն Մ.-ի հետ, այդ ընթացքում միջամտել է վերջինիս կինը` Սուսաննա Ի.-ն, եւ Տիգրան Դ.-ն ձեռքերով ու ոտքերով հարվածներ է հասցրել նրան:Նշանակվել է դատաբժշկական փորձաքննություն: Կատարվում է հետաքննություն:

Նոնա   Ադամյան