Աննան պատմում է, որ սպանությունը կատարվել է իր աչքի առաջ

էքստրասենս Անի Մաջնունյանի սպանության գործով կալանավորված Մուշեղ Մխիթարյանը հունվարի 29-ից հացադուլ է հայտարարել: Այս մասին Fnews.am-ի հետ զրույցում հայտնեցին Արդարադատության նախարարության քրեակատարողական վարչությունից:

Հիշեցնենք, որ նախորդ տարվա օգոստոսի 5-ին Մազմանյան 5 շենքի թիվ 20 բնակարանում հայտնաբերվել էր «Վեցերորդ զգայարան» հաղորդաշարին մասնակցող էքստրասենս, 53-ամյա Անի Մաջնունյանի դին՝ բազմաթիվ վնասվածքներով:
«Յանուս» թատրոնի 20-ամյա գեղարվեստական ղեկավարին մեղադրանք էր առաջադրվել՝ քրեական օրենսգրքի 104-րդ հոդվածի 2-րդ մասի 8-րդ կետով (սպանություն՝ զուգորդված ավազակությամբ): Օգոստոս ամսից կալանքի մեջ գտնվող Մուշեղ Մխիթարյանը չի ընդունում իր մեղքը:

Նշենք, որ դեռևս շարունակվում են քննչական և դատավարական անհրաժեշտ գործողությունները՝ սպանության բոլոր հանգամանքների բազմակողմանի, օբյեկտիվ և լրիվ հետազոտումն ապահովելու համար: Մուշեղ Մխիթարյանի պաշտպան Մարինե Ֆարմանյան էլ ներկայացրեց հացադուլի պատճառները. <դատարանը հունվարի 29-ին երկու ամսով երկարացրել է Մուշեղի կալանքը: Մուշեղը դատարանի այդ քայլը անօրինական է համարում, այդ իսկ պատճառով էլ նման քայլի է դիմել: Չեմ կարող ասել թե որքան ժամանակ նա հացադուլ կանի, բայց մինչ այս պահը չի դադարեցրել: Դատարանը կալանքի ժամկետը երկարացրել է հիմք ընդունելով վկայի ցուցմունքը>,-ասաց պաշտպանը: Խոսելով գործի ընթացքից պաշտպանն տեղեկացրեց, որ վկան իր ցուցմունքում ներկայացրել է մանրամասներ, թե ինչպես է Մուշեղը սպանությունը իրականացրել: <Աննան  ցուցմունքում պատմել է, թե ինչպես է Մուշեղը սպանությունը կատարել, սպանությունը կատարվել է Աննայի աչքերի առաջ: Իր ցուցմունքում Աննան նշել է նաև, որ վախենում է Մուշեղից և նրա ազատության մեջ հայտնվելը իր համար վտանգավոր է>,-ասաց պաշտպանը: Ֆարմանյանը  տեղեկացրեց, որ դատակենսաբանական փորձաքննության արդյունքները ստացել են, այժմ սպասում են հոգեբանական-հոգեբուժական համալիր փորձաքննության արդյունքներին: