Անցել են Հովիկ Աբրահամյանի իշխանության ամենաթողության խայտառակ ժամանակները. նա պետք է պատասխան տա

«Հատուկ քննչական ծառայությունը Հովիկ Աբրահամյանի դեմ քրեական գործը ոչ թե օդից է ստեղծել, այլ փաստերի ծանրության տակ»,- «Առաջին լրատվական»-ի հետ զրույցում ասաց «Ավազահատիկ» ՍՊԸ-ի հիմնադիր, ՀԱԿ անդամ, ԱԺ նախկին պատգամավոր Գևորգ Գևորգյանը՝ անդրադառնալով Հովիկ Աբրահամյանի դիտարկումներին։

Հիշեցնենք, որ հենց Գևորգյանի դիմումի հիման վրա են իրավապահ մարմինները քրեական գործ հարուցել, որով անցնում է նախկին վարչապետ Հովիկ Աբրահամյանը։ Հովիկ Աբրահամյանին այս գործով մեղադրանք է առաջադրվել երկու հոդվածով՝ ՔՕ 309 հոդվածի 1-ին մասով՝ պաշտոնեական լիազորությունների չարաշահում, և ՔՕ 310 հոդվածով՝ ձեռնարկատաիրական գործունեությանն ապօրինի մասնակցելը։

Ավելի վաղ մենք գրել էինք, որ «Ավազահատիկ» ընկերության տնօրենը հաղորդում էր ներկայացրել իրավապահներին, որի հիման վրա հարուցվել էր քրեական գործ, պարզվել էր, որ 2000 թվականին հիմնադրված ընկերությունն Արարատի մարզում զբաղվել է հանքարդյունաբերությամբ՝ ներգրավելով վարկային միջոցներ, կատարել է շուրջ 80 հազար ԱՄՆ դոլարի ներդրում, ձեռք է բերել ավազի լվացման և մաղման հոսքագծեր։ Սակայն 2008 թվականին բարձրաստիճան պաշտոնատար անձինք՝ նախկին վարչապետ Հովիկ Աբրահամյանը, նախկին ոստիկանապետ, ներկայումս ԱԺ ՀՀԿ-ական պատգամավոր Ալիկ Սարգսյանը, հարկային մարմնի աշխատակիցներ ու համայնքապետեր ստեղծել են արհեստական խոչընդոտներ՝ պահանջելով ընկերության բաժնեմասերի 60 տոկոսը՝ նշելով, որ հակառակ պարագայում հանքերը չեն շահագործվի, ընդ որում, բաժնեմասերի 60 տոկոսը պահանջել են ձևակերպել երկու տարբեր անձանց անունով՝ յուրաքանչյուրին 30 տոկոս։

«Մի օր ինձ զանգահարեց Հովիկ Աբրահամյանի վարորդը՝ հայտնի Գոքորը, և ասաց, որ Հովիկ Աբրահամյանը ուզում է տեսնել ինձ։ Բաղրամյան 26-ում Հովիկ Աբրահամյանի հետ հանդիպման ժամանակ վերջինս առաջարկեց խնդիրը լուծել իր առաջարկած տարբերակով՝ «Ավազահատիկ» ՍՊԸ-ի բաժնեմասի 30 տոկոսն իրեն տրամադրել, 30-ը՝ Ալիկ Սարգսյանին, 40-նն էլ թողնել ինձ։ 2008-ի հուլիս ամսին այս տարբերակով գործունեությունը շարունակելու առաջարկին ստիպված համաձայնեցի, որից հետո կարճվեց նաև ՍՊԸ-ի նկատմամբ հարուցված քրեական գործը, բայց բնականոն աշխատանքը տևեց ընդամենը 2-3 ամիս: Ջոնիկ Աբրահամյանի հրահանգով ուղեկալը կրկին փակվեց, ապա մյուս բաժնետիրոջ՝ Ալիկ Սարգսյանի եղբոր՝ Անդրանիկ Սարգսյանի միջոցով ինձ տեղեկացրին, որ հանքավայրում այլևս անելիք չունեմ և պետք է հեռանամ։ Ի վերջո, մեր մուտքը հանք վերջնականապես արգելվեց, իսկ հանքի սարքավորումները և տարածքի մի մասը ապօրինաբար շարունակում են շահագործել Աբրահամյանների ընտանիքը և Ալիկ Սարգսյանը՝ հրաժարվելով ինձ որևէ շահաբաժին վճարել»,- մեզ հետ զրույցում պատմել էր Գևորգյանը։

Ի դեպ, Հատուկ քննչական ծառայությունում Գևորգյանը և այլ վկաներ իրենց ցուցմունքներում առերևույթ չարաշահումներին առնչություն ունեցած անձանց թվում մատնանշել են նաև Հովիկ Աբրահամյանի եղբոր՝ Ջոնիկ Աբրահամյանի և Ալիկ Սարգսյանի անունները։

«Այդ գործով ես տվել եմ մանրամասն ցուցմունք, մինչ այդ հայտարարություն էի տարածել։ Տեղյակ եմ, որ հարուցված քրեական գործով հարցաքննվել է նաև ինքը՝ Հովիկ Աբրահամյանը, ցուցմունքներ են տվել ավազահանքի աշխատակիցները, Նորամարգ գյուղի նախկին գյուղապետը և հավանաբար այլ անձինք էլ։ Հետևաբար, եթե ՀՔԾ-ն գործ է հարուցել, ուրեմն համարել է, որ ունի հիմնավոր փաստեր դա անելու համար»,- այսօր մեզ հետ զրույցում ասաց Գևորգյանը՝ հավելելով. «Անցել են արդեն Հովիկ Աբրահամյանի իշխանության ամենաթողության խայտառակ ժամանակները, մերկապարանոց հայտարարություններ կատարելու փոխարեն թող պատրաստվի արդարադատության իրականացմանը, նա պետք է պատասխան տա գործած հանցանքների համար»։

Նշենք, որ երեկ Հովիկ Աբրահամյանը հայտարարություն էր տարածել, որ իրեն հրավիրել են ՀՔԾ, հարցաքննել են վկայի կարգավիճակում, այնուհետև մեղադրանք առաջադրել։ Խափանման միջոց է ընտրվել ստորագրությունը չհեռանալու մասին: «Զավեշտալի է, երբ ոչ ականջահաճո հարցազրույցից հետո մարդուն հրավիրում են ՀՔԾ, ակնհայտ կեղծ մեղադրանք առաջադրում՝ նպատակ ունենալով լռեցնել ցանկացած այլակարծություն: Առայժմ արձանագրեմ, որ ՀՀ իշխանությունների կողմից իրականացվող «մարդաորսը», ազատ խոսքի ու այլակարծության ճնշմանն ուղղված գործողությունները լավ հանգրվան չեն ունենալու»,- գրել էր նախկին վարչապետը։

մանրամասն՝այստեղ: