Անհեթեթ ձեւակերպումներ են. Թեւան Պողոսյանի պատասխանը՝ Զարուհի Փոստանջյանին

Ազգային ժողովի «Ժառանգություն» խմբակցության պատգամավոր Թեւան Պողոսյանն առաջարկում է իր հասցեին հնչած պիտակավորումներին հումորով վերաբերվել, քանի որ քաղաքականությամբ զբաղվող յուրաքանչյուր անհատ պետք է պատրաստ լինի լսել իր հասցեին տեղին եւ անտեղին հնչող պիտակավորումներ:

Այս մասին Թեւան Պողոսյանն ասաց Armtimes.com-ի հետ զրույցում՝ արձագանքելով նույն խմբակցության պատգամավոր Զարուհի Փոստանջյանի այն հայտարարությանը, որ «Ժառանգություն» խմբակցությունում Թեւան Պողոսյանը ներկայացնում է Սերժ Սարգսյանի քաղաքական ուղղվածությունը:

Նշենք, որ Զարուհի Փոստանջյանը շաբաթ օրը Հ3 հեռուստաընկերության եթերում անդրադառնալով «Ժառանգություն» խմբակցությունում Թեւան Պողոսյանի գործունեությանը՝ ասել էր. «Թեւանը, չգիտեմ, ուղղակի ինչ-որ քաղաքացիական հասարակություն է ներկայացնում, կարծում եմ՝ ներկայացնում է Սերժ Սարգսյանի քաղաքական, այսպես ասենք, ուղղվածությունը»:

Թեւան Պողոսյանը կարծում է, որ ամեն մի քաղաքական գործչի որեւէ մի կարծիքի հետեւից պետք չի ամեն անգամ վազել եւ ինչ-որ արձագանք անել: «Այլ խնդիր պետք է մենք նայենք. ե՞րբ ենք մենք սովորելու մարդկանց գնահատել իրենց արածներով, այլ ոչ թե ով ինչ ասեց: Վաղը երբ մեկն ասի, օրինակ, դուք ուղտ եք, նստելու եք սկսել աշխարհով մեկ ապացուցել, որ դուք ուղտ չե՞ք: Ինձ թվում է ուղղակի, որ մարդ միշտ մի բան պետք է պատկերացնի եւ գիտակից: Երբ որ մենք ծնվում ենք, մենք ինչ-որ դաստիարակություն ենք ստանում՝ սկսելով մեր մանկապարտեզից, մեր ընտանիքից, դպրոցից, համալսարանից, մեր աշխատանքից... ամեն մարդու վրա իր անցած ուղին է ազդում, ձեւավորում է իր բարոյականությունը, իր մտածելակերպը, պատկերացումները եւ էթիկայի իր ընկալումները: Հիմա այս ամեն ինչի մեջ ես նստեմ քննարկեմ ինչ-որ բաներ, ինձ թվում է՝ անիմաս բան է»,- ասաց պատգամավորը՝ կոչ անելով հումորով վերաբերվել նման բաներին, քանի որ Հայաստանում հազարավոր լուրջ խնդիրներ եւ պրոբլեմներ կան:

«Ես ավելի շատ նախընտրում եմ որեւէ մի խնդրի լուծման վրա ժամանակ ծախսել, փորձել որեւէ մի քաղաքացու համար մի օգտակար բան անել, մի տեղ մի նամակ գրել, մի պետական ինստիտուտում մի բան բարձրաձայնել, մի օրենքում մի ստորակետ, մի բան ավելացնել, քան ընկնեմ ինչ-որ անհեթեթ ձեւակերպումների հետեւից, այն էլ արդեն քանի տարի է սովորել եմ ու իմունիտետ եմ ձեռք բերել տարբեր պիտակավորումներին»,- եզրափակեց Թեւան Պողոսյանը: