Անջատեք բարձր երաժշտությունը.հերոսի թաղման թափորն է գալիս

Ապրիլի 2-8-ը ղարաբաղա-ադրբեջանական շփման գծում   զոհվել է արդեն 4 տասնյակից ավելի զինծառայող, որոնցից 8-ը գյումրեցիներ: Այս օրերին քաղաքը կարծես կանգնած է. բոլորը շունչները պահած սպասում են նորությունների սահմանից: Եվ ամեն մի զոհվածի անուն լսելիս ավելի մեծ ցավ ու ափսոսանք է ապրում յուրաքանչյուր ոք:

Բայց ցավոք այս լարված ու ծանր ժամանակահատվածում էլ հասարակական տրանսպորտում կարելի է լսել բարձր և ուրախ երաժշտություն: Գուցե վարորդները չեն պատկերացնում, որ այդ պահին իր մեքենան է նստում զոհվածի հարազատ: Ի՞նչ կզգա նա. լրացուցիչ հոգեբանական ճնշում, հարգանքի բացակայություն դեպի նա, ով իր կյանքն է տվել նրա համար, ով հիմա անհոգ ու բարձր տրամադրությամբ վայելու է բարձրաձայն ու ուրախ երգ-երաժշտություն:

IGyumri-ն միանում է «Գյումրի-2» շրջանային կազմակերպության խորհրդի տարածած հայտարարությանը, որի մեջ մասնավորապես ասվում է.

«Այս օրերին, երբ ամբողջ հայ ժողովրդի ուշադրությունը, ցասումն ու վիշտը ուղղված է դեպի արցախյան առաջնագիծ , երբ բոլորս յուրաքանչյուր օր ողբում ենք մեր զոհված հերոս որդիների և ընկերների համար, ցավոք սրտի որոշ «հարսնաքավորներ» և «օբյեկտատերեր» կազմակերպում են «գլամուռ» հարսանիքներ և ողջ գիշեր քեֆ են քաշում:

Իհարկե ողջունելի է, որ նոր ընտանիքներ են ստեղծվում, սակայն կարծում ենք այս օրերին պետք է զերծ մնալ ազդանշաններով ուղեկցվող հարսանիքներից, հրավառություններից:Մասնավորապես այս օրերին երբ յուրաքանչյուր մեկ նոր մահացած զինվորի տան հարևանությամբ օբյեկտներում հրավառություն է կազմակերպվում:Այս պահին զերծ ենք մնում օբյեկտների և անհատների անուններ նշելուց, բայց երևույթը կրկնվելու դեպքում արդեն կհրապարակենք և անուններ և կդիմենք ավելի կտրուկ միջոցների:

Հ.Գ. Անընդունելի և դատապարտելի է նաև որ այս օրերին Գյումրու երթուղային տաքսիների մեջ հնչում են ուրախ երաժշտություններ…»

ՀՀԿ «Գյումրի-2» շրջանային կազմակերպության խորհուրդ