Արամ Սարգսյանն սպանել է իր մանկության ընկերոջը

Փաստինֆոն գրում է. Վանաձորի բնակիչ 37-ամյա Արամ Սարգսյանը շուրջ մեկ տարի առաջ՝ 2013թ. հունվարի 8-ին, սպանել էր իր մտերիմ մանկության ընկերոջը, ինչպես նախաքննությամբ էր պարզվել՝ խանդի հողի վրա:

Արամի կինը հենց նոր տարվա գիշերն նրան պատմել էր, թե տարիներ առաջ նրա ընկեր Մհերը իրեն սեռական հարաբերություն ունենալու առաջարկ է արել: Ու թեև կինն ասել էր, որ մերժել է ամուսնու ընկերոջ առաջարկը, բայց ամուսինը նախ ապտակել էր կնոջը, ապա սկսել ընկերոջից վրեժ լուծելու ծրագիր կազմել:

Հետագայում Արամն իր նախաքննական ցուցմունքում պատմել է, թե նախ որոշել է մի լավ ծեծել ընկերոջը կամ նվաստացնել նրան, բայց հետո վճռել է սպանել, քանի որ, իր խոսքով, նման սրբապղծություն անող մարդը չպետք է ապրի:

Եվ ահա հունվարի 8-ին գալով ընկերոջ մոտ՝ նրա մեքենայով միասին գործով գնացել են բանկ: Այստեղ էլ ճանապարհին, հենց ավտոմեքենայի մեջ էլ Արամը հանել էր դանակն ու հարվածել ընկերոջ կրծքավանդակի աջ կեսին, ապա ևս 9 անգամ՝ ձախ ազդրին:

Այդ ընթացքում ավտոմեքենան դուրս է եկել ճանապարհից և սկսել գահավիժել: Բայց Արամը սառնասրտորեն համբուրել է իր ձեռքով սպանված մանկության ընկերոջ այտը և, ասելով՝ «հաջող, ապե՛ր, գնա՛», դուրս եկել ավտոմեքենայից ու դիմել փախուստի:

Հետո նաև կնոջն է զանհագարել ու ասել, որ «իր անելունն արել է» ու Վանաձոր վերադառնալու փոխարեն՝ գնացել է Տավուշի մարզի Ծաղկավան գյուղ:

Ի դեպ, հետաքրքրական է, որ սպանվածի այրին այս պատմության սեփական տարբերակն է ներկայացրել դատարանում՝ հայտնելով, թե ամուսնու ընկերոջ կինն ինքն է նրան հետապնդել, իսկ իր ամուսինը մերժել է նրան ու խուսափել նրա հետ հանդիպելուց, ինչի հետևանքով 2 ընկերների ընտանիքների երբեմնի մտերմական հարաբերությունները վերջին շրջանում սառել էին:

Սպանվածի այրին ասել էր նաև, որ անձամբ է տեսել Արամի կնոջ՝ իր ամուսնուն դեռևս 2008թ. գրած SMS հաղորդագրությունը, որտեղ նա իր ամուսնուն իր հետ մի գիշեր անցկացնելու առաջարկ էր արել: Այս փաստն, ի դեպ, հետագայում հաստատվել է նաև Մհեր Գրիգորյանի բջջային հեռախոսահամարի զանգերի վերծանումներով:

Ինչևէ, դատարանը Արամ Սարգսյանին մեղավոր է ճանաչել կանխամտածված սպանություն կլատարելու մեջ և դատապարտել 13 տարվա ազատազրկման: