Արդարադատության նախարարը պարզաբանում է՝ ինտեգրման նախարարության ստեղծման նպատակը (Video)

1in.am-ը գրում է. Հայաստանի ինտեգրացիոն պրոցեսները ԵՏՄ-ի և այլ ֆորմատներով ամենևին չեն ենթադրում որ մեր պետական համակարգը պետք է համապատասխանեցնենք անդամ որևէ երկրի ստրուկտուրային: Այս մասին այսօր ՀՀ Ազգային ժողովում քննարկման ժամանակ հայտարարեց արդարադատության նախարար Հովհաննես Մանուկյանը՝ հավելելով, որ պարզապես ԵՏՄ անդամակցությամբ որոշակի չափանիշներով որոշակի պարտավորություններ ենք վերցնում մեզ վրա:

Նախարարը տեղեկացրեց, որ կառավարության կառուցվածքում փոփոխություններ են կատարվել, ըստ որի ՀՀ կառավարության կառուցվածքից հանել են ՀՀ արտակարգ իրավիճակների նախպարարությունը և միացրել ՀՀ տարածքային կառավարման նախարարությանը: Բացի այդ, առաջարկվում է կառավարության կազմում ստեղծել նոր նախարարություն, որը կանվանվի միջազգային տնտեսական ինտեգրման և բարեփոխումների նախարարություն:
«Այս օրենքի ընդունմամբ բյուջետային նոր ծախսեր չեն առաջանում»,-ասաց նախարարը:

ՀԱԿ խմբակցության պատգամավոր Գագիկ Ջհանգիրյանը նկատեց, որ հիմնավորումներում գրված է «հանել» բառը, բայց իրականում երկու նախարարություն միավորվել են: Այս դիտարկմանը Հովհաննես Մանուկյանը համաձայնեց:

«Ժառանգություն» խմբակցության պատգամավոր Զարուհի Փոստանջյանը նոր նախարարության ստեղծման մասին հարց ուղղեց՝ ինչո՞ւ հենց հիմա անհրաժեշտություն առաջացավ ստեղծել ինտեգրման նախարարություն: «Այս նախարարությունը չի անվանված ԵՏՄ գծով ինտեգրացիոն նախարարություն, որովհետև մեր երկիրը ինտեգրացիոն այլ գործընթացներում նույնպես կարող է ներգրավված լինել և մասնավորապես ԵՄ-ի հետ մեր նոր հարաբաերությունների նոր ֆորմատների առումով»,-ընդգծեց նախարարը:

Զարւհի Փոստանջյանի հարցին, թե ո՞ր ժամանակահատվածում պետք է այս նոր նախարարությունը սպասարկի, Մանուկյանը պատասխանեց. «Ինտեգրացիոն պրոցեսները անընդհատ պրոցեսներ են, կյանքը դինամիկ զարգանում է: Կարծում եմ, այս նախարարությունը միշտ աշխատանք կունենա»: Այս պահին մենք գտնում ենք, որ հատկապես ԵՏՄ ինտեգրացիոն պրոցեսների շրջանակներում, ինչը ահռելի ծավալի աշխատանք է, մենք այնուամենայնիվ, մեկ մասնագիտացված ոլորտային նախարարություն պետք է ունենանք»: