Արգամիչի կառավարությունը կազմավորվեց քրեա-օլիգարխիկ հեղաշրջման արդյունքում. լրագիր

Վերջերս հաճախակիացել են կառավարության փոփոխության մասին տեղեկությունները: Հայկական մամուլում տեղեկություններ կան, որ կառավարությունը ներկայում գրեթե կաթվածահար վիճակում է, նախարարները սպասողական վիճակում են եւ փորձում են հասկանալ իրենց հետագա ճակատագիրը, միջնորդներ փնտրել:

Հովիկ Աբրահամյանի կառավարությունը կազմավորվեց քրեա-օլիգարխիկ հեղաշրջման արդյունքում, որի նպատակը ոչ թե տնտեսական խնդիրների լուծումն էր, այլ համապատասխան պայմաններ ստեղծելով՝ հեղաշրջումը մինչեւ վերջ հասցնելը: Ներկայում սակայն, ԲՀԿ-ն ու եռյակը վերացնելուց հետո, նրա այս միակ գործառույթը սպառվել է, եւ կառավարությունը գտնվում է «իներցիայի» մեջ:

Ինչ վերաբերվում է նրա բուն գործառույթներին, ապա կառավարությունը մեղմ ասած տապալվել է բոլոր ուղղություններով: Ավելին, եթե նույնիսկ մի կողմ թողնենք բոլոր օբյեկտիվ ու սուբյեկտիվ պատճառները, կառավարությունը չի մշակել անգամ ճգնաժամը հաղթահարելու որեւէ կարճաժամկետ ծրագիր, չենք խոսում արդեն միջնաժամկետ ու երկարաժամկետ ծրագրերի մասին: Արվել են առանձին քայլեր, որոնք սակայն եղել են զուտ «հեղաշրջման» տրամաբանության մեջ եւ ուղղված են եղել դաշտում «գույքագրում» անելուն:

Այսպիսով, այս կառավարությունը լիովին անիմաստ է դարձել բոլոր տեսակետներից, եւ նրա գոյության ամեն մի օրը ծանր կորուստներ է պատճառում Հայաստանին:

Հայաստանին  առաջիկայում սպասվում են ավելի ծանր ժամանակներ, նկատի առնելով թե Ռուսաստանի ու ԵՏՄ-ի առաջիկա սոցիալ-տնտեսական փլուզումը, թե արեւմտյան կառույցների ու ԱՄՆ-ի կողմից ֆինանսական օգնության հնարավոր դադարեցումը, թե ներքին դեգրադացիան: Հայաստանը «թողնվելու» է ինքն իրեն, դրանից բխող հետեւանքներով:

Ռուսաստանը Հայաստանի հարցում լուծել է իր բոլոր խնդիրները, իսկ Արեւմուտքը չի պատրաստվում օգնել մի երկրի, որը կամավոր հրաժարվել է իր ինքնիշխանությունից ու արտաքին ինքնուրույն կապերից: Այս մասին լիովին համոզիչ հասկացնել են տվել թե Ռուսաստանը, թե Արեւմուտքն ու մասնավորապես ԱՄՆ-ն: Միակ ելքը, որ մատնանշվում է, ներդրումներն են: Սակայն, ներդրումներ էլ չեն կարող արվել մի երկրում, որտեղ տիրում են կոռուպցիան ու քվոտավորված հարչաբերությունները, չկա արդարադատություն եւ այլն: Իսկ ներկա կառավարության գոյության հիմքը հենց այս երեւույթներն են, որոնք նա չի կարող վերացնել, եւ ընդամենը փորձում է ինչ որ ծաղրանկարային հանձնաժողովներով նման տպավորություն թողնել:

Սրանք խնդիրներ են, որոնք ներկայիս կառավարությունն ի վիճակի չէ լուծել: Իհարկե, այդ խնդիրները կառավարությանը չեն էլ հետաքրքրում: Բավական է թեթեւ հայացք նետել վարչապետի ու նախարարների բնույթին ու մոտիվացիային, եւ ամեն ինչ հասկանալի կդառնա: Այնպես որ, կառավարությունում տիրող ներկայիս խուճապային վիճակը կապված է ոչ թե երկրի խնդիրների, այլ բավական մերկանտիլ հանգամանքների հետ. Այս կառավարությունն «արժեցել» է մի քանի հարյուր միլիոն դոլար, եւ հնարավոր է նախարարներն այդ փողը դեռ «չեն հանել»: Եւ եթե լինի կառավարության փոփոխություն, նրանք «տակ կտան»: Եվ ահա, ըստ տեղեկությունների, նախարարներն իրենց հասանելի բոլոր միջոցներով փորձում են պարզել իրենց ճակատագիրը:

Նյութի աղբյուրը `  Lragir.am