Արմենիա հեռուստաընկերության նոր «Մոխրոտիկը»

Կարելի՞ է մի անգամ հայ աղջկա կերպար բերել սերիալ, որն աչքերը չի փակում ու ողբում բոլոր իրավիճակներում: Որտեղի՞ց եք գտնում դուք ձեր հորինած կերպարներին այդքան «համահունչ» դերասանուհիներ (թող ներվի ինձ այս բառն օգտագործելու համար): Տվյալ դեպքում խոսքս Մարիամի՝ Էթերի Ոսկանյանի մասին է: Ո՞վ է ձեզ ասել, որ մեր երկրում հարուստի ու աղքատի տարբերությունն այդքան ակնհայտ է դրված, դուք՝ ստրկամտությամբ տառապողներդ ու ֆեոդալական կարգերից եկածներդ, ի՞նչ իրավունքով եք ձեր տաղտկալի սերիալների միջոցով նման կարգեր հաստատում մեր երկրում: Դուք տեսե՞լ եք երբեւէ Երեւանի փողոցում ինչ-որ հարցի համար դուրս եկած, պայքարող վառ աղջիկների կամ մտե՞լ եք որեւէ բուհ ու տեսել, թե ինչ սիրունիկ ու սովորող, խելացի ու ճարպիկ սերունդ է մեծանում ու հատկապես աղջիկները... Ես մտածում էի, թե Էլենից հետո (Շուշան Թովմասյան, «Դժվար ապրուստ») այլեւս նման «դժբախտություն» չի գա «գլխներիս», բայց արի ու տես, որ Էթերին իր դարդերով ու տարաբախտությամբ անցավ Շուշանին: