Առողջ մարդն այնտեղ մտնի՝ գիժ դուրս կգա

Ի դեպ վաղուց էի ուզում այս մասին գրել և խնդիրներով լի նամակներն այնքան շատ են, որ այս թեման անընդհատ դուրս էր մնում օրակարգից։ Երբ ամենօր համացանցում հրապարակվում է առողջապահության նախարար պարոն Թորոսյանի դրական որոշումներն ու դրանց իրականացումը, շատ ուրախանում եմ ու ամեն անգամ սպասում այս բուժ հիմնարկի կարգավորման խնդրին, էլի կսպասեի, եթե համացանցում երեկ չտարածվեր ժամկետային զինծառայող Յուրի Բրոյանի տեսանյութը, որի հոգեբանական վիճակն ավելի վատթարացել է համապատասխան բուժ հիմնարկներում բուժվելու արդյունքում։ Դեռ Կանազի հոսպիտալը թողնում եմ մի կողմ, մասնագետների որակը չգիտեմ, բայց գոնե պայմանները մարդկային են։

Ուզում եմ անդրադառնալ Նուբարաշենի հոգեբուժարանի և բուժ անձնակազմի ու շենքի որակին։ Ինձ հետաքրքիր է պետական մակարդակով ի՞նչ է արվում դրա շուրջ։ Առողջ մարդն այնտեղ մտնի գիժ դուրս կգա։ Եվ այնտեղ ուղարկվում են կամ ,,հարուստների,, բալեքը գժի թուղթ հանելու համար, որ չծառայեն հայրենիքի համար, այն հայրենիքի, որտեղ ծնվում մեծանում և թալանում են կամ էլ այն նորակոչիկներին են ուղարկում եռօրյա բուժհետազոտման, ովքեր նյարդային խնդիրներ ունեն և հոգեկան խնդիր ունեցող հիվանդներին։

Ահավոր է, երբ 2014֊ ին եղա այնտեղ և ցանկացա բարձրաձայնել այդ խայտառակ վիճակը, անձնակազմը իրենց լեզվով ասած, թաղային հեղինակությունների ուղարկեց վրաս։ Հասկացա, որ նույն լափամանից մի ամբողջ թիմ է լափում և մենակ անզոր էի այդ հանցակազմի դեմ, բա հիմա, հիմա չի փոխվելու՞, այս հարցը միթե՞ այն կարևորներից մեկը չէ, որ պետք է դրվի առաջնակարգ քննարկվողների ցանկում։ Եվ ամենաահավորն էլ այն է, երբ խնդիր ես բարձրաձայնում և առաջարկում, նոր իշխանավորները կամ անտեսում են կամ հեգնում ու մոռանում, թե ժողովուրդն ինչ պայմանով և ինչի համար է ոտքի կանգնել։ Իհարկե ցավում եմ, որ ԱՆ֊ ը այսքան դրական գործընթացի մեջ չի անդրադարձել այս բուժհիմնարկին։ Ամեն դեպկում ԱՆ֊ ի աշխատանքը մեծ նկատելի է։

ՄԱՆՈՒՇԱԿ ՍՏԵՓԱՆՅԱՆ