Աշխարհի որ ծայրում էլ ապրի հայը, կարևորն այն է, որ նա հայ մնա․ Րաֆֆի Մեգերյան

Այս տարի լրանում է «Ծագումով հայեր» հաղորդաշարի տասնամյակը։ Հաղորդաշարի հեղինակ Մանանա Հակոբյանի հրավերով և ակտիվ ջանքերով Հայաստան են ժամանել ավելի քան 120 ծագումով հայեր, ովքեր եղել են հաղորդման «հերոսներ»։

Այսօր մամուլի ասուլիս էր հրավեիրվել, որին ներկա էին հոլիվուդյան դերասան Մարկո Խանը, վերականգնողական բժշկության ոլորտում հայտնի մասնագետ Վիգեն Սեփիլյանին, երգչուհի Ռոզի Արմենը, «Մեգերյան կարպետ» ընկերության սեփականատեր Րաֆֆի Մեգերյանը, վերջինիս որդին՝ Հովիկ Մեգերյանը, ինչպես նաև հայտնի ոսկերիչ Ժան Վանդոմը:
Մարկո Խանն իր խոսքում ընդգծեց՝ Հայաստան գալը իր համար պարզապես երազանք է եղել, ավելին, երբ ոտքը հայող հողի վրա է դրել, ակամա արտասվել է։

«Ես հիմա, իսկապես, տուն եմ եկել: Ինձ հայրենիք է բերել սերը․ ուրախ եմ, որ սեպտեմբերի 21-ին մասնակցելու եմ Անկախության 26-րդ տարեդարձին»,-ասաց Մակրո Խանը։

Երգչունի Ռոզի Արմենն իր հերթին շեշտեց՝ Հայաստանում եղել է դեռ 1965 թվականից ու հայերեն սովորել է ամեն անգամ Հայաստաում եղած ժամանակահատվածներում։

Վիգեն Սեփիլյանը նշեց՝ գրեթե 10 տարին է, ինչ տարեկան 1-2 անգամ Հայաստան է ժամանում։ Սեփիլյանը շեշտեց՝ համագործակցում է «Արագիլ » հիմնադրամի հետ, որը գործում է առաջին տիկին Ռիտա Սարգսյանի հովանու ներքո։ Սեփիլյանը հիշեցրեց՝ ինքը մասնագիտացած է վերատադրողական բժշկության ոլորտում, ապա հպարտորեն ավելացրեց՝ «Արագիլ» վերարտադրողական բժշկության աջակցության հիմնադրամի շնորհիվ արդեն 300 բալիկ է լույս աշխարհ եկել։

Րաֆֆի Մեգերյանն իր խոսքում շեշտեց ՝ ուրախ է, որ «Մեգերյան կարպետ» ընկերության հիմնադրման 100-ամյակը համընկել է «Ծագումով հայեր» հաղորդաշարի հոբելյանի հետ:
Րաֆֆի Մեգերյանը շեշտեց՝ աշխարհի որ ծայրում էլ ապրի հայը, կարևորն այն է, որ նա հայ մնա:
Նրա որդին` Հովիկը ընդգծեց՝ թեև ինքը Նյու Յորքում է ծնվել, այդուամենայնիվ, իրենց տանը խոսել են հայերեն։

Ավանգարդիստ ոսկերիչ Ժան Վանդոմը ընդգծեց՝ դեռևս հայերեն չի սովորել, բայց անպայման սովորելու է, քանի որ, ի վերջո, ամեն հայ պետք է տիրապետի իր մայրենի լեզվին։