Աթոռակռի՞վ, թե՞ քաղաքական «ռազբորկաներ»

Այն ինչ օրերս կատարվեց Ազգային ժողովում խորհրդարանական ընդդիմության ներկայացուցիչների միչև քաղտեխնոլոգ Արմեն Բադալյանը գնահատում է որպես նորմալ երևույթ` քաղաքական գործընթացներում:

Fnews.am-ի հետ զրույցում անդրադառնալով ՀԱԿ խմբակցության պատգամավոր Նիկոլ Փաշինյանի և ՕԵԿ խմբակցության ղեկավար Հեղինե Բիշարյանի վիճաբանությանն ու «ռազբորկաներին» քաղտեխնոլոգը նկատեց, որ երույթն իր բնույթով ճիշտ չէ, բայց նորմալ է, ոչ միայն Հայաստանի, այլ բոլոր երկրների համար: Նա բերում է Ուկրաինայի օրինակը, որտեղ նիստի ժամանակ «իրար են սպանում»:

«Իսկ ո՞վ ասաց, որ մարդիկ, եթե ընդդիմադիր են` իրար նկատմամբ պետք է հարգանք ունենան. էդպիսի բան չկա: Հատկապես Հայաստանում, հատկապես նախընտրական քարոզարշավների նախաշեմին կարելի է նորմալ համարել, երբ քաղաքական ուժերն իրար հետ հարաբերվելիս` դուրս են գալիս սահմամներից. սա քաղաքական գործընթացներում ընդունված տարբերակ է»,-նկատում է Արմեն Բադալյանը: Ճշտող հարցին` նման կռիվները նորմալ են գնահատվում որպես աթոռակռի՞վ, թե՞ ժողովրդին կեղծ ուժերի իրական դեմքը ցույց տալու և հենց այդ ժողովրդի մասին մտածելու մղումից ելնելով, քաղտեխնոլոգը նկատեց, որ այս հարցի պատասխանը հարաբերական է, քանի որ բոլոր ուժերն էլ, ինչ որ անում են` ասում են, թե հանուն ժողովրդի են անում: Դիտարկմանը, թե քաղաքական ուժերի տարաձայնությունների ֆոնին` խորհրդարանական ընտրություներին ընդառաջ շարունակում են նոր կուսակցություններ ձևավորվել, և լուրեր են շրջանառվում, թե հերթական նոր կուսակցությունը պատրաստվում է հիմնել ԱԺ նախկին պատգամավոր Վիկտոր Դալլաքյանը, քաղտեխնոլոգը նկատեց, որ ոչ մի քաղաքական ուժ ինքնանպատակ չի ձևավորում:

Նա չգիտի, թե կոնկրետ ովքեր կարող են ընդգրկվել Վիկտոր Դալլաքյանի կողմից ստեղծվելիք կուսակցության կազմում և ինչ ծրագրեր իրենց առաջ կդնեն, բայց նկատում է, որ ձևավորվող գրեթե բոլոր ուժերի հիմնական նպատակը մեկն է` մտնել խորհրդարան ու հաջողության դեպքում նաև մեծամասնություն կազմել: «Ինչ վերաբերում է այս կամ այն անձի կողմից ստեղծված քաղաքական ուժին, ապա դա կախված է նրանից, թե 10 ամսվա մեջ ինչ աշխատանքներ կանի ու ինչ հաջողություններ կգրանցի, քանի որ գրեթե այդքան ժամանակ է մնացել մինչև հաջորդ ընտրություններ: Հասարակության և արտաքին կենտրոնների հետ գրագետ աշխատանքի դեպքում, ըստ իր աշխատանքի որակի, կուսակցությունը կարող է համապատասխան տեղ զբաղեցնել խորհրադարոնում»,-ասում է քաղտեխնոլոգը` նշելով, որ այնուամենայնիվ որոշ կուսակցություններ ստեղծվում են, ոչ թե խորհրդարան մտնելու, այլ գործող որևէ կուսակցության նախընտրական քարոզարշավին խանագարելու համար: Արմեն Բադալյանն այսօր դեռ չի կարող հստակ ասել, թե ինչ նպատակներ իր առջև կդնի Վիկտոր Դալլաքյանի կողմից ձևավորվող քաղաքական ուժը. «Այդ նպատակն այսպես թե այնպես 10 ամսվա ընթացքում կերևա»: