Ավտոպատահարների վերաբերյալ կեղծ տեղեկություններ են ներկայացվել. հարուցվել են քրեական գործեր

Վարորդների կողմից ՃՏՊ-ների մասնակիցների, ավտոմեքենաների ապահովագրության և տեխնիկական զննության վերաբերյալ վարույթն իրականացնող մարմնին, ինչպես նաև ապահովագրական ընկերություններին կեղծ տեղեկություններ ներկայացնելու դեպքերի առթիվ հարուցվել են քրեական գործեր:

ՀՀ քննչական կոմիտեի տարածքային քննչական վարչությունների գործունեության վերահսկողության գլխավոր վարչությունում ամփոփվել է վերջին ամիսների ընթացքում Հայաստանի Հանրապետությունում արձանագրված ճանապարհատրանսպորտային պատահարներով նախապատրաստված նյութերի ընթացքում վարույթն իրականացնող մարմնին, ինչպես նաև ապահովագրական ընկերություններին դեպքի մասնակիցների, ավտոմեքենայի ապահովագրության և տեխնիկական զննության վերաբերյալ վարորդների կողմից կեղծ տեղեկություններ ներկայացնելու դեպքերի առթիվ հարուցված քրեական գործերի ընթացքը:

Ամփոփումը կատարվել է ՀՀ քննչական կոմիտեի Երևան քաղաքի և մարզային քննչական վարչություններից ստացված տեղեկատվությունների հիման վրա: Այս մասին տեղեկացնում է ՀՀ քննչական կոմիտեի տեղեկատվության և հասարակայնության հետ կապերի բաժինը:

Պարզվել է, որ վերջին ամիսներին արձանագրված ճանապարհատրանսպորտային պատահարներով նախապատրաստված նյութերի ընթացքում վարորդների կողմից վարույթն իրականացնող մարմնին, ինչպես նաև ապահովագրական ընկերություններին դեպքի մասնակիցների, ավտոմեքենայի ապահովագրության և տեխնիկական զննության վերաբերյալ կեղծ տեղեկություններ ներկայացնելու 12 դեպքից 10-ով ՀՀ քրեական օրենսգրքի 34-178-րդ հոդվածի 2-րդ մասի 1-ին և 2-րդ, 34-178-րդ հոդվածի 2-րդ մասի 3-րդ կետերով, 34-184-րդ հոդվածի 1-ին մասի և 325-րդ հոդվածի 1-ին մասի հատկանիշներով հարուցվել է քրեական գործ՝ խարդախության եղանակով դրամական միջոցների հափշտակության փորձ կատարելու վերաբերյալ:

Հարուցված 10 քրեական գործից 8-ի նախաքննությունը շարունակվում է, մեկ քրեական գործի վարույթը կարճվել է` ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետով՝ տուժողի բողոքի բացակայության հիմքով, մեկ քրեական գործ, ըստ մեղադրանքի Հակոբ Ավետիսյանի և Նարեկ Թամոյանի, ուղարկվել է դատարան և կայացվել է մեղադրական դատավճիռ, մեկ նյութով քրեական գործի հարուցումը մերժվել է հանցակազմի բացակայության հիմքով, իսկ մեկ նյութ ուղարկվել է ըստ ենթակայության:

Արձանագրված դեպքերը գրանցվել են Արմավիրի, Վայոց ձորի, Գեղարքունիքի, Տավուշի մարզերում, ինչպես նաև` Երևան քաղաքի Էրեբունի և Նուբարաշեն, Ավան և Նոր Նորք վարչական շրջաններում:

Օրինակ՝

- Արմավիրի մարզի Հուշակերտ գյուղի բնակիչներ Հ.Ավետիսյանի և Ն.Թամոյանի կողմից նախնական համաձայնությամբ իրենց վարած ավտոմեքենաների վթարի հանգամանքները դիտավորությամբ խեղաթյուրելով և «Նաիրի ինշուրանս» ապահովագրական ընկերության աշխատակիցներին կեղծ տեղեկություններ ներկայացնելով՝ խաբեությամբ ընկերությունից խոշոր չափի՝ 560.000 դրամ հափշտակելու փորձ կատարելու փաստի առթիվ 2014թ. փետրվարի 7-ին հարուցվել է քրեական գործ՝ ՀՀ քրեական օրենսգրքի 34-178-րդ հոդվածի 2-րդ մասի 1-ին և 2-րդ կետերի հատկանիշներով, որի շրջանակներում մեղադրանք է առաջադրվել Հ.Ավետիսյանին և Ն.Թամոյանին՝ ՀՀ քրեական օրենսգրքի 34-178-րդ հոդվածի 2-րդ մասի 1-ին և 2-րդ կետերով։ Քրեական գործը մեղադրական եզրակացությամբ ուղարկվել է դատարան, կայացվել է մեղադրական դատավճիռ: