Այն, ինչ կանենք, կանենք մեր ուժերով. Կոմանդոս

Երբ ինչ-որ իրադարձություններ են տեղի ունենում, ապա այդ ամենից պետք է անպայման դասեր քաղել, Araratnews.am-ի հետ զրույցում ասաց գեներալ-մայոր, Արցախի հերոս Արկադի Տեր-Թադևոսյանը (Կոմանդոս):
«Առաջին դասն այն է, որ մեր զինվորները, որոնք կանգնած են դիրքերում, փայլուն կատարեցին իրենց առջև դրված առաջադրանքը: Իրենք հիացմունքի են արժանի»,-նշեց Արցախի հերոսը:
Բանակում առկա թերություններից Կոմանդոսը չխոսեց, ասաց՝ դրա իրավունքն ունեն ռազմական մասնագետները:
Հարցին, թե ի՞նչ սպասել առաջիկայում հակառակորդից, Կոմանդոսն ասաց.
«Թշնամին շախմատային քայլեր չի անում, ավելի հասարակ է գործում: Մենք այդ հնարավորությունը չունենք, սակայն զինվորական հրամանատարությունն ունի հնարավորություն պարզելու այդ քայլերը: Չիմացող մարդուն կթվա, թե անակնկալներ կլինեն, իսկ իմացող մարդը, որ տեղյակ է ռազմական գործերից, կանի հակադարձ քայլեր»:
Ադրբեջանական կողմից հնարավոր հարձակման պարագայում, Կոմանդոսն ասաց՝ կան ծրագրեր, որոնք կաշխատեն:
«Այն, ինչ կանենք, կանենք մեր ուժերով: Մենք չենք սպասի, որ մեզ օգնեն Բելառուսը, Ղազախստանը կամ Ղրղզստանը: Մեր հույսը կդնենք միայն մեզ վրա: Կարծում եմ՝ այս պատերազմում, երբ Ռուսաստանը հայտարարեց՝ Ադրբեջանն իրենց ռազմավարական գործընկերն է, Հայաստանը՝ նույնպես, դժվար է ասել՝ ինչ է սպասվում, չնայած դա ոչ միայն հայերի դեմ, այլ նաեւ՝ Ռուսաստանի»:
Չնայած հակառակորդը իր նպատակին չի հասնում, սակայն Կոմանդոսը խորհուրդ տվեց չթերագնահատել թշնամուն:
«Իրենք ունեն հզոր աջակից, հզոր սպառազինություն եւ այլն, իսկ ամենաթույլը գիտե՞ք ինչն է, զինվորների բարոյական ոգին: Դա գալիս է նրանից, որ Ադրբեջանում կան կրոնական եւ այլ տարաձայնություններ, իրար չեն վստահում, իսկ եթե մի տեղ վստահություն չկա՝ հաջողություն չի լինի»,- նշեց Արցախի հերոսը:
Անդրադառնալով Թուրքիայի ԱԳՆ ղեկավար Մեվլութ Չավուշօղլույի այն հայտարարությանը, որ «Իսլամական համագործակցության կազմակերպության» անդամ պետությունները պետք է ակտիվ մասնակցություն ունենան ղարաբաղյան կոնֆլիկտի կարգավորման գործընթացում, Կոմանդոսն ասաց՝ Թուրքիան որևէ նոր բան չի ասել:

araratnews.am