Բաց նամակ Սերժ Սարգսյանին՝ ընդդեմ Հերմինե Նաղդալյանի եվ նրա ամուսնու Hraparak.am

Hraparak.am-ը գրում է .

«Նորաշեն 2007» կոոպերատիվի կողմից կառուցված Գեւորգ Չաուշի 14/3 շենքի բնակիչները բաց նամակ են ուղղել ՀՀ նախագահ Սերժ Սարգսյանին։
«Մեծարգո պարոն նախագահ, դիմում ենք Ձեզ, քանզի սպառվել են բոլոր հնարավոր ղեկավարներին դիմելու վայրերը, եւ այդ ամենը՝ ապարդյուն։ Խնդիրն այն է, որ Ձեր կողմից վստահելի եւ հովանավորվող տիկին Հերմինե Նաղդալյանը, անցնելով բոլոր սահմանները, օգտվելով Ձեր հովանավորությունից եւ իր պաշտոնական դիրքից, բռնի կերպով փորձում է մեզանից խլել տարիների տառապալից, դժվարին եւ դառը քրտինքով վաստակած գումարներով ձեռք բերված մի փոքրիկ անկյուն՝ բնակարան, որը մեր վերջին հույսն է՝ մեր ընտանիքների հետ մնալ եւ ապրել մեր հայրենիքում։

Տիկին Նաղդալյանը, սակայն, փորձելով խլել մեր բնակարանը, մեզ դրդում է, որպեսզի մենք ստիպված լինենք լքել մեր հայրենիքը։ Չէ՞ որ Հայաստանը միայն տիկին Նաղդալյանների համար չէ, սա մեր ծննդավայրն է, մեր հայրենիքն էլ է, եւ մենք հպարտ ենք, որ Հայաստանի քաղաքացի ենք։ Մեր վերջին հույսը Դուք եք, որպեսզի սաստեք տիկին Նաղդալյանին եւ ստիպեք, որ վերադարձնի մեր բնակարանները, հակառակ դեպքում՝ մենք ստիպված կլինենք դիմել բոլոր երկրների դեսպանատներին՝ քաղաքական ապաստան տալու խնդրանքով։ Հուսով ենք՝ Դուք չեք հանդուրժի նման անարդարությունը Ձեր կողքին, քանի որ տիկին Նաղդալյանը դրանով ոտնահարում է ոչ միայն մեր՝ ՀՀ քաղաքացիներիս իրավունքները, այլեւ միաժամանակ սպառնում է ինչպես Ձեր հեղինակությանը, այնպես էլ ՀՀԿ-ի անվան հետ է խաղում։ Մի՞թե հնարավոր չէ այս երկրում կարգի հրավիրել մի կնոջ, ով իր քայլերով խաղում է թե Ձեր, թե մի ամբողջ կուսակցության անվան հետ։ Ասվածի վերաբերյալ ապացույցներ ունենք եւ անհրաժեշտության դեպքում կարող ենք հատկացնել։ Կանխավ շնորհակալ ենք եւ կարծում ենք, որ Ձեր միջամտությամբ կլուծվի այս հարցը, եւ ստիպված չենք լինի լքել մեր հայրենիքը»,- ասված է նամակում։

Նամակը խմբագրություն բերած անձի՝ Մովսես Մովսիսյանի հետ զրույցից իմացանք, որ նա տուժողներից Գրիշա Մկրտչյանի ներկայացուցիչն է։ Նա ասաց, որ 7 տարի առաջ դիմել են «Նորաշեն-2007» կոոպերատիվին, իրենց փողերով շենքը կառուցվել է, հետո պարզվել է, որ կոոպերատիվի տերերը ֆինանսական խնդիրներ ունեն, եւ որոշել են տարբեր տեղերից գումարներ հայթայթել։ «Ու հանդիպել են տիկին Հերմինեին եւ նրա ամուսնուն, որոնք ցանկացել են այս գործում շահույթ ունենալ, տոկոսով գումար են տրամադրել կոոպերատիվին, որը կարողացել է էդ գումարներով շինարարությունը շարունակել, չնայած մինչեւ էդ պահն արդեն շենքը կանգուն ա եղել։ Մեր գումարներով ա էդ շենքը կառուցվել, տիկին Հերմինեն ու իրա ամուսինը սկի տեղյակ էլ չեն՝ որտեղ ա գտնվում էդ շենքը, ինչ բնակարաններ են, գումար են տվել ուղղակի տոկոսով ու դարձել են բնակարանատեր»,- ասում է նա՝ նշելով, որ 5 տարի է՝ դատն ընթանում է, շուտով դատավճիռը կկայացվի, սակայն դատի ընթացքում ոչ մի հստակ լուծում չի տրվել։ Նրանք կարծում են, որ Հերմինե Նաղդալյանը, չարաշահելով իր պաշտոնական դիրքն ու օգտվելով նախագահի հովանավորչությունից, շարունակում է իր «սեւ գործը» եւ ամեն ինչ անում է դատն իր ուզած հունով տանելու համար։

Մեր հարցին, թե դատական հայց կա՞ Հերմինե Նաղդալյանի կամ նրա ամուսնու դեմ, մեր զրուցակիցն ասաց․ «Կոնկրետ դատական հայց չկա, սակայն գործի սկզբում քննչականում նրա ամուսինը որպես վաշխառու էր ներգրավված, սակայն մի գիշերվա մեջ տիկին Հերմինեն, այցելելով քննիչ Ջանազյանին ու նրան էլ վախեցնելով, թե «էդ ո՞ւմ ամուսնու վրա ես գործ սարքում, քեզ մի գիշեր ժամանակ՝ գործը փոխվի», ու էդ ամեն ինչը կազմակերպված արեցին իրենք, ու իր ամուսինը վաշխառուից դարձավ վկա, որպես բարեխիղճ գնորդ»։

Նա նաեւ նշեց, որ Նաղդալյանին եւ իր ամուսնուն տրվել է 14 վկայական, որոնցից յուրաքանչյուրը երկու տուն է ներառում։ «Մենք ամեն ձեւի պայքարելու ենք ու թույլ չենք տալու, որ ինչ-որ տիկին Հերմինե, օգտագործելով իր պաշտոնական դիրքը, սենց խեղճուկրակ մարդկանց, որ կոպեկ-կոպեկ հավաքելով, տարիների տանջանքով հազիվ տուն են գնել, ինքը եկել՝ թաթը դրել ա վրան։ Ես նաեւ կոչ եմ անում նախագահին, պարո՛ն նախագահ, զսպեք Ձեր կողքը կանգնած էս թալանչիներին, գոնե մի քիչ երկրում արդարություն պիտի լինի՞, թե՞ չէ, մենք հույս ունենք, որ էս հարցը Դուք կլուծեք, ոչ թե Ռուսաստանի նախագահը միջամտի կամ Եվրադատարանը, մենք հույսով ենք, որ Դուք՝ անձամբ, ի զորու եք, եթե ի զորու չեք, նոր մենք ստիպված կլինենք դիմել այլ երկրների»,- եզրափակեց Մովսես Մովսիսյանը։

Մեր զրուցակցից բացի, նամակի տակ ստորագրել են նաեւ այլ տուժողներ՝ Մելիք, Վահե, Կարեն, Լարիսա, Մխո, Շուշան անուններով։