«Բացի Գևորիկից ու ՀՀԿ տատիկից՝ բոլորին էլ տեսնում եմ լիդերի դերում»

Ընդամենը մի քանի օր առաջ Րաֆֆի Հովհաննիսյանը հայտարարեց՝ Հայաստանում հետընտրական շրջանում քաղաքական եւ հասարակական ուժերի կոնսոլիդացիայի կարիք կա:

«Ստեղծված իրավիճակում հարկավոր է խորհրդարանական, արտախորհրդարանական ուժերի ու քաղաքացիական լայն կոնսոլիդացիա: «Օհանյան-Րաֆֆի-Օսկանյան» կուսակցությունների դաշինքը նախընտրական դաշինք էր, եւ այժմ նոր ուժ ստեղծելու խնդիր կա», - լրագրողների հետ զրույցում մայիսի 28-ին նշեց Րաֆֆի Հավհաննիսյանը՝ հավելելով, որ հանդիպել է Վարդան Օսկանյանի ու Սեյրան Օհանյանի հետ ՝ վերջիններիս առաջարկելով միավորվել ու շարունակել պայքարը:

Հիշեցնենք՝ մոտ մեկ ամիս անց տեղի կունենա «Ժառանգության» համագումարը: Մամուլում շրջանառվում է այն վարկածը, որ հնարավոր է՝ առաջիկայում ստեղծվի նոր քաղաքական ուժ՝ իր մեջ միավորելով ՕՐՕ դաշինքում հայտնված քաղաքական ուժերին:

Անդրադառնալով վերոնշյալ թեմային՝ Գերագույն խորհրդի նախկին պատգամավոր Ազատ Արշակյանը Fnews.am-ի թղթակցի հետ զրույցում նշեց. «Բնականաբար, «Ժառանգություն» կուսակցությունը նախ պետք է համագումար անի, որոշի՝ ինչ ծրագրեր ունի և ուզո՞ւմ է ՕՐՕ դաշինքի ծրագրերը ընդունել. հիշե՛նք, որ այդ դաշինքը նախընտրական ծրագրերով էր հանդես եկել, իսկ կուսակցության քաղաքական ծրագիրը լրիվ այլ է լինում: Ուզում եմ ասել՝ նախ պետք է սկսել «Ժառանգությունից» և հարկավոր է հասկանալ՝ Րաֆֆի Հովհաննիսյանն ունի՞ այդպիսի «մանդատ», որ ինքը կարողանա առաջարկել, որ ինչ –որ քաղաքական ուժ ստեղծվի: Եթե ունի, եթե կա ծրագիր, ուրեմն դա պետք է քննարկման դրվի: Տվյալ ծրագիրը պետք է քննարկվի նաև մյուս քաղաքական ուժերի հետ: Եթե նրանց գաղափարները մոտ լինեն միմյանց, ինչո՞ւ ոչ, հնարավոր է, որ միավորնեն: Բայց, կրկնում եմ՝ մինչ այս՝ ծրագիր է պետք: Հարկավոր է հասկանալ՝ ո՞րն է այդ քաղաքական ուժը ստեղծելու նպատակը. դա լուրջ քաղաքական հրավեր է, ու այն հիմնավորել է պետք»:

Հարցին՝ եթե ստեղծվի նման քաղաքական ուժ, Րաֆֆի Հովհաննիսյանին պատկերացնո՞ւմ եք լիդերի դերում, Ազատ Արշակյանը կես կատակ-կես լուրջ պատասխանեց. «Բացի Գևորիկից ու ՀՀԿ տատիկից՝ բոլորին էլ տեսնում եմ լիդերի դերում: Եթե Րաֆֆի Հովհաննիսյանն է առաջարկում այդ ծրագիրը, բնական է, որ կա հավանականություն, որ հենց ինքը լինի լիդերը, բայց կրկնում եմ՝ կարևոր մի հարց կա. ինքն ունի՞ որևէ ծրագիր: Բայց չէ մտածել՝ եթե պարապ ենք մնացել, եկե՛ք զբաղվենք պայքարով… նմանատիպ մոտեցումը ընդունելի լինել չի կարող. սովորաբար այսպես է:
Եթե կա ծրագիր, այդ ծրագիրը հրապարակում են: Եթե կան մարդիկ, ովքեր դրա կողմնակիցն են, ուրեմն միավորվում են դրա շուրջ, իսկ ես հիմա այդպիսի ծրագիր չեմ տեսնում, որը որ կարող է լայն ճակատի նպատակ դառնալ»: