«Բանդայի գործով» մեղադրողն ընդհանուր առմամբ պնդեց մեղադրանքը

Փաստինֆոն գրում է. Մեղադրող Սասուն Խաչատրյանն այսօր իր մեղադրական ճառում պնդեց «բանդայի գործով» մեղադրանքը՝ գրեթե ողջ ծավալով:

Բացառություն կազմեց միայն, ըստ գործի նյութերի, բանդայի պարագլուխ Արտուշ Հակոբյանի մեղադրանքի մեկ հոդվածը՝ ՀՀ քրեական օրենսգրքի 268-րդ հոդվածի երկրորդ մասի 2-րդ կետով՝ առանց իրացնելու նպատակի խոշոր չափերով թմրանյութերի ապօրինի շրջանառություն, որից մեղադրողը հրաժարվեց:

Փոխարենը մեղադրողը պնդեց ամբաստանյալին առաջադրված մեղադրանքը՝ 222-րդ հոդվածի 1-ին մասով՝ բանդիտիզմ, 175-րդ 3-րդ մասի 1-ին կետով՝ ավազակություն, որը կատարվել է առանձնապես խոշոր չափերով գույք հափշտակելու նպատակով, 175-րդ հոդվածի 3-րդ մասի 2-րդ կետով՝ կազմակերպված խմբի կողմից ավազակություն, 35-175-րդ հոդվածի 3-րդ մասի 1-ին և 2-րդ կետերով՝ ավազակության նախապատրաստություն, 183-րդ հոդվածի 3-րդ մասի 2-րդ կետով՝ կազմակերպված խմբի կողմից ավտոմեքենային ապօրինաբար տիրանալը՝ առանց հափշտակելու նպատակի, և 183-րդ հոդվածի 3-րդ մասի 3-րդ կետով՝ ավտոմեքենային ապօրինաբար տիրանալը, որը կատարվել կյանքի կամ առողջության համար վտանգավոր բռնություն գործադրելով կամ դա գործադրելու սպառնալիքով:

Մեղադրողը միջնորդեց նրան դատապարտել 15 տարվա ազատազրկման:

Մեղադրողը նույնպիսի պատժաչափ կիրառելու միջնորդություններ արեց նաև ամբաստանյալներ Դավիթ Գալստյանի և Սամվել Դավթյանի նկատմամբ:

Մեղադրողը պնդեց Դավիթ Գալստյանի և Սամվել Դավթյանի մեղադրանքը ՀՀ քրեական օրենսգրքի 222-րդ հոդվածի 1-ին մասով, 175-րդ հոդվածի 3-րդ մասի 1-ին և 2-րդ կետերով, 35-175-րդ հոդվածի 3-րդ մասի 1-ին և 2-րդ կետերով, 183-րդ հոդվածի 3-րդ մասի 2-րդ և 3-րդ կետերով և 268-րդ հոդվածի 2-րդ մասի 2-րդ կետով:

Ամբաստանյալ Արթուր Մանուկյանի մասով մեղադրողը նույնպես պնդեց նրան առաջադրված մեղադրանքի ողջ ծավալը՝ ՀՀ քրեական օրենգրքի 222-րդ հոդվածի 1-ին մասով, 35-175-րդ հոդվածի 3-րդ 1-ին կետով և 35-175-րդ հոդվածի 3-րդ մասի 2-րդ կետով, և միջնորդեց դատապարտել նրան 11 տարվա ազատազրկման:

Հաջորդ դատական նիստում ճառերով հանդես կգա պաշտպանական կողմը: