Բաղրամյանի բնակիչները ԱԺ պատգամավոր Առաքել Մովսիսյանի ու ՀՀԿ-ի կողիքն են

Սահմանադրական բարեփոխումներին նվիրված հանրային քննարկումներն այսօր շարունակվեցին Արմավիրի մարզի Բաղրամյան համայնքում: Կազմակերպված հանդիպման ժամանակ, ներկաներին Սահմանադրական բարեփոխումների հայեցակարգային դրույթները ներկայացրեցին ԱԺ ՀՀԿ խմբակցության քարտուղար Գագիկ Մելիքյանն ու ԱԺ պատգամավոր Առաքել Մովսիսյանը: Պատգամավորները յուրովի ներկայացրեցին Սահմանադրական բարեփոխումներին «Այո» ասելու անհրաժեշտության ու «Ո՛չ,»-ի հետեւից գնալու հնարավոր ու վատթարագույն զարգացումների ու հեռանկարների մասին: 

«Սահմանադրական փոփոխությունները ենթադրում են մեծ, գլոբալ փոփոխություններ՝ հասարակական ու քաղաքական կյանքում: Սա կառավարման մի մոդել է, որ գործում է եվրոպական մի շարք առաջադեմ երկրներում, և ես ինքս էլ կարծում եմ, որ այն մի մեծ քայլ է դեպի առաջ»,-Բաղրամյան համայնքում կարծիք հայտնեց ՀՀԿ խմբակցության քարտուղար Գագիկ Մելիքյանը, անհիմն համարելով ընդդիմախոսների կողմից շրջանառության մեջ դրված այն տեսակետը, թե այսպիսով իշխանությունները սահմանափակում են ժողովրդի մասնակցությունը երկրի կառավարման գործընթացին: Անլրջություն է, երբ ասում են,  թե ժողովրդի ձայնն այլևս տեղ չի հասնելու.«Գաղտնիք չէ, որ անկախ Հայաստանի պատմության մեջ յուրաքանչյուր նախագահական ընտրությունների ժամանակ հասարակությունը չափազանց մեծ սթրեսների է ենթարկվել, մեծ ցնցումներ են եղել, որոնցից կարող ենք խուսափել այս պարագայում, այսինքն՝ կառավարման խորհրդարանական մոդելին անցնելու դեպքում»,- ասաց նա:

ՀՀԿ-ական պատգամավորի կարծիքով՝ նոր Սահմանադրության ամենակարևոր դրույթներից է նաեւ համամասնական ընտրակարգին անցնելը. «Ես հիշում եմ, թե տարիներ շարունակ ինչպես էին ընդդիմադիրները բոցաշունչ ելույթներ ունենում՝ ի օգուտ այդ համակարգի: Բայց հիմա կա՛մ լռություն է, կա՛մ քննադատություն: Եթե մենք կարողանանք քաղաքական ուժերին պատրաստել 2017թ.-ի խորհրդարանական ընտրություններին ու կարողանանք այնպես անել, որ հասարակությունն այս փաստաթղթին «այո՛» ասի հանրաքվեով, ապա մեր կառավարման համակարգն ավելի առաջադեմ կդառնա»,- վստահեցրեց Գագիկ Մելիքյանը:

ԱԺ պատգամավոր Առաքել Մովսիսյանն էլ, ով իր ընտրատարածքում իսկապես լուրջ հետեւորդների ու համակիրների մեծ բանակ ուներ, նկատեց, որ ամենակարևորը հանրային իրազեկումն է, քանի որ մարդը, ով գնում է ընտրության, հանրաքվեի, պիտի իմանա՝ ինչու է ասում այո՛, ինչու է ասում ո՛չ»:

Նրա խոսքով՝ եթե ժողովուրդն այո՛ ասի Սահմանադրական բարեփոխումներին, ապա բավարար ժամանակ կլինի՝ 2017թ.-ի խորհրդարանական ընտրություններին պատրաստվելու համար.«Կարծում եմ՝ բոլոր քաղաքական ուժերը կլարեն իրենց հնարավորությունները, և կկարողանան այնպես անել, որ նվիրյալները գնան Ազգային ժողով: Դրա համար մեզ պարզապես քաղաքական կամք է պետք և մեծ ցանկություն, ու ամենակարեւորն է՝ միասնություն»: Հանդիպման մասնակիցները միահամուռ կերպով համաձայնեցին պատգամավորի կողմից արված դիտարկումների հետ ու բարձրաձայնեցին. «Պարոն Մովսիսյա՛ն, դուք ոնց կասեք, տենց կանենք: Շնորհակալ ենք, որ դուք պատգամավորներով այսօր մեզ իրազեկում եք՝ դեկտեմբերի 6-ին կայանալիք հանրաքվեի մասին»: Ներկաներից մեկն էլ խոստովանեց, որ պատգամավոր Առաքել Մովսիսյանի շնորհիվ այսօր իրենք ունենք ջեռուցվող ու բարեկարգ դպրոց, ունեն կազմակերպված համայնք, ու որ ամենակարեւորն է, իրենց պատգամավորը միշտ հասանելի է իրենց ընտրատարածքի բնակչության ցանկացած ներկայացուցչի համար: Հենց դրա համար էլ իրենք «Այո» են ասելու Սահմանադրական բարեփոխումներին:
Ներկաներից տիկին Գոհարն էլ հավելեց, որ շնորհակալ են նաեւ ՀՀԿ խմբակցության քարտուղար Գագիկ ՄԵլիքյանին, ով շատ մատչելի կերպով, ու համբերատար ձեւով պատասխանեց Սահմանադրական բարեփոխումներին վերաբերող հարցերին, խոսելով նաեւ (արդարադատության ոլորտում սպասվող բարեփոխումների մասին) ընդգծելով, որ ուրախալի է, երբ քաղաքական գործիչը պատրաստված ու թրծված է լինում:
Հ. Գ. Ի դեպ, հանդիպման վերջում տեղեկացանք, որ Բաղրամյան համայնքում ընդամենը մի քանի օր առաջ, բավականին գեղեցիկ  խաչքար է տեղադրվել՝դարձյալ Առաքել Մովսիսյանի նախաձեռնության ու հետեւողականության շնորհիվ:

Հանդիպման այլ մանրամասները՝ առաջարկվող տեսանյութերում: